No te aha tātou e rave ai i te ’āamu ’utuāfare

3 Nephi 25:5–6

Iesu Mesia, i te fa’ahitira’a i te parau a Malaki i te mau ati Nephi

Inaha, e tono atu vau i te peropheta ra ia Eliaha ia ’outou na, hou te taera’a mai o te mahana rahi ’e te mata’u o te Fatu ; ’Ia fa’afāriu ’oia i te ’ā’au o te mau metua i te mau tamari’i, ’e te ’ā’au o te mau tamari’i i tō rātou mau metua, ’o te haere mai ho’i au e tā’iri i te fenua nei i te ’anatemara’a.

E fa’ahiti fa’ahou te Fa’aora ti’afa’ahou i te parau fafau a Malaki nō Eliaha i te feiā i te fenua Marite, ma te fa’a’ite i tōna faufa’a.

Inaha, e fa’aho’i atu vau i te Autahu’ara’a ia ’oe, nā roto i te rima o Eliaha te peropheta, hou te taera’a mai o te mahana rahi ’e te ri’ari’a o te Fatu ra. E nāna e tu’u i roto i te ’ā’au o te mau tamari’i te mau fafaura’a i fafauhia i te mau metua, ’e e fāriu te ’ā’au o te mau tamari’i i tō rātou ra mau metua. ’Āhiri ’aita te reira e tupu, e riro te fenua tā’āto’a nei ’ei mea faufa’a ’ore i tōna taera’a mai.

Te parau a Moroni nō Malaki: e fa’aho’i mai Eliaha i te mana autahu’ara’a ’e e tanu i roto i te ’ā’au o te mau tamari’i i te mau parau fafau i hōro’ahia i te mau metua.

Iosepha Semita—’Ā’amu 1:38–39

Iosepha Semita, i te fa’ahitira’a fa’ahou i te mau parau a Moroni

’E ’ua fa’ahiti ato’a mai ’oia i te ’īrava pae, i te nā-’ō-ra’a ē : Inaha, e heheu atu vau i te Autahu’ara’a ia ’outou nā roto i te rima o te peropheta ra ’o Elia, hou te taera’a mai te mahana rahi ’e te ri’ari’a o te Fatu ra. ’Ua fa’ahiti fa’ahuru ’ē ri’i ato’a mai ’oia i te ’īrava i raro mai : ’E e tu’u ho’i ’oia i roto i te ’ā’au o te mau tamari’i i te mau fafaura’a i fa’aauhia i tō rātou metua, ’e e fāriu ho’i te ’ā’au o te tamari’i i tō rātou mau metua. ’Āhiri ’aita rā, e ha’amouhia te fenua i tōna taera’a mai.

Te ’āamu a Iosepha Semita nō Moroni i te fa’ahitira’a iāna i te parau tohu a Malaki nō Eliaha i te matahiti 1823.

I muri iho i te ’ōpanira’ahia atu teie nei ’ōrama, ’ua fa’a’itehia mai ia māua te tahi atu ā ’ōrama rahi ’e te hanahana ; ’e ’ua ti’a mai ra ’o Eliaha te peropheta, ’o tei fa’atāhitihia atu i ni’a i te ra’i ma te ’ite ’ore i te pohe, i mua ia māua nei, ’e ’ua nā ’ō mai ra : Inaha, ’ua tae roa mai te tau, ’o tei parauhia mai e te vaha o Malaki—i te fa’a’ite-pāpū-ra’a mai ē, e tonohia mai ’oia [o Eliaha te peropheta], hou te mahana rahi ’e te ri’ari’a o te Fatu e tae mai ai— Nō te fa’afāriu mai i te ’ā’au o te mau metua i te mau tamari’i, ’e tō te mau tamari’i ho’i i te mau metua, ’o te tā’irihia mai te ao nei i te ’anatema— Nō reira, tē tu’uhia atu nei te mau tāviri nō teie tau tu’ura’a ’evanelia i roto i tō ’ōrua nā rima ; ’e nā roto i teie e ’ite ai ’ōrua ē, ’ua fātata mai te mahana rahi ’e te ri’ari’a o te Fatu ra, ’oia tei te pae ’ōpani ïa.

E fā mai Eliaha i roto i te Hiero nō Kirtland i te matahiti 1836 ’e e hōro’a i te mau tāviri o teie ’ohipa ia Iosepha Semita ’e ia Oliver Cowdery.

Te Ha’api’ira’a Tumu ’e te mau Fafaura’a 98:16

Te Fatu, nā roto ia Iosepha Semita

Nō reira, ’a fa’a’ore atu i te tama’i, ’e ’a poro i te parau nō te hau, ’e ’a tītau itoito ’ia fa’afāriu i te ’ā’au o te mau tamari’i i tō rātou ra mau metua, ’e te ’ā’au ho’i o te mau metua i te mau tamari’i ;

E arata’i te Fatu i te Feiā Mo’a ’ia rave itoito i te fa’afāriura’a i te ’ā’au o te mau tamari’i ’e o te mau metua te tahi i te tahi.

Te Ha’api’ira’a Tumu ’e te mau Fafaura’a 138:47–48

Iosepha F. Semita, i te fa’ata’ara’a i tāna ’ōrama nō te feiā i pohe

’Ua tītauhia te peropheta ra ’o Eliaha ’ia tanu i roto i te ’ā’au o te mau tamari’i i te mau parau fafau i fafauhia i tō rātou ra mau metua, ’Ei fa’a’itera’a ātea nō te ’ohipa rahi ’o tē ti’a ’ia ravehia i roto i te mau hiero o te Fatu i te tau tu’ura’a ’evanelia nō te ’īra’a o te mau tau, nō te fa’aorara’a i te feiā i pohe, ’e te tā’atira’a i te mau tamari’i i tō rātou ra mau metua, ’ia ’ore te fenua tā’āto’a nei ’ia ’anatemahia ’e ’ia riro ’ei mea faufa’a ’ore i tōna ra taera’a mai.

’Ua fa’a’ite-’ē-hia te ’ohipa hiero nō te feiā i pohe ’e te tā’atira’a i te mau tamari’i i ni’a i te mau metua nā roto i te misioni a Eliaha.

I teienei, nō ni’a i te vaira’a o te vārua ta’ata i rōpū i te pohera’a ’e te ti’afa’ahoura’a—Inaha, ’ua fa’a’itehia mai ïa iā’u e te hō’ē melahi, ’o tei nā ’ō mai iā’u ē, ’ia reva atu te mau vārua o te mau ta’ata i teie tino tāhuti nei ; ’oia ïa, te mau vārua o te mau ta’ata ato’a ra, te mea maita’i ’e te mea ’ino ato’a ho’i, e ’āfa’ihia ïa rātou i mua i taua Atua ra ’o tei hōro’a mai i te ora nō rātou. ’E i reira, a muri a’era, e fāri’ihia te mau vārua o te feiā parauti’a i roto i te hō’ē vāhi ’oa’oa, ’o tei parauhia e pāradaiso, te hō’ē vāhi fa’afa’aeara’a, te hō’ē vāhi hau, ’e i reira rātou e fa’afa’aea ai i tō rātou pe’ape’a ’e te mau ’ati ato’a, ’e te ’oto ho’i.

E ha’api’i Alama ē e ora noa te mau vārua i muri a’e i te pohe, ’e e tomo te feiā parau-ti’a i roto i te hō’ē huru fa’afa’aeara’a i pi’ihia paradaiso.

Te Ha’api’ira’a Tumu ’e te mau Fafaura’a 137:7–9

Te Fatu, i roto i te hō’ē ’ōrama ia Iosepha Semita

Nō reira ’ua tae mai ra te reo o te Fatu iā’u, nā ’ō mai ra : ’O rātou ato’a ’o tei pohe ma te ’ite ’ore i teie nei ’evanelia, ’o tei fāri’i rā i te reira ’āhiri rātou i fa’ati’ahia ’ia ora noa, e riro ïa rātou ’ei feiā ’āi’a nō te bāsileia tiretiera o te Atua ; ’Oia ato’a ’o rātou ato’a ’o tē pohe mai teie atu taime ma te ’ite ’ore i te reira, ’o tei ti’a rā ’ia fāri’i i te reira ma tō rātou ’ā’au ato’a, e riro ïa rātou ’ei feiā ’āi’a nō te reira bāsileia ; Nō te mea nā’u, nā te Fatu, e ha’avā i te mau ta’ata ato’a mai te au i tā rātou ra mau ’ohipa, ’e mai te au ho’i i te hina’aro o tō rātou ra mau ’ā’au.

Te feiā i pohe ma te ’ore i fa’aro’o i te ’evanelia, ’o tei fāri’i ïa i te reira, ’aita rātou e ’ōpanihia i rapae; e ha’avā te Atua mai te mau hina’aro o te ’ā’au.

Te Ha’api’ira’a Tumu ’e te mau Fafaura’a 138:11

Iosepha F. Semita, i te fa’ata’ara’a i tāna ’ōrama nō te feiā i pohe

’A feruri hōhonu ai au i teie mau mea ’o tei pāpa’ihia, ’ua ’ara’ara ihora te mata o tō’u nei ’itera’a, ’e ’ua pārahi mai ra te Vārua o te Fatu i ni’a iā’u, ’e ’ua ’ite atu ra vau i te tīria rahi o te feiā pohe, te ta’ata ri’i ’e te feiā rarahi.

E ha’amata te ’ōrama a te Peresideni Iosepha F. Semita nō te ao vārua i te matahiti 1918 ’a feruri ai ’oia i te mau pāpa’ira’a mo’a.

Te Ha’api’ira’a Tumu ’e te mau Fafaura’a 138:30

Iosepha F. Semita, i te fa’ata’ara’a i tāna ’ōrama nō te feiā i pohe

Inaha rā, mai rotopū mai i te feiā parauti’a, ’ua fa’anahonaho ’oia i tōna mau nu’u ta’ata ’e ’ua fa’ata’a ihora i tāna mau ve’a, ’o tei fa’a’ahuhia i te mana ’e i te ha’amanara’a, ’e ’ua tono atu ra ia rātou ’ia haere atu ’e ’ia ’āfa’i atu i te māramarama o te ’evanelia ia rātou ’o tē fa’aea ra i roto i te pōiri, ’e tae noa atu i te mau vārua ato’a o te ta’ata nei ; e mea nā reira ho’i te ’evanelia i te porora’ahia i te feiā i pohe.

’Ua fa’anaho te Fa’aora i te mau vārua parau-ti’a nō te hōpoi i te ’evanelia i te feiā ato’a i pohe.

Te Ha’api’ira’a Tumu ’e te mau Fafaura’a 138:32–34

Iosepha F. Semita, i te fa’ata’ara’a i tāna ’ōrama nō te feiā i pohe

E mea nā reira ho’i te ’evanelia i te porora’ahia i te feiā ’o tei pohe i roto i tā rātou ra mau hara, ma te ’ite ’ore i te parau mau, ’e ’aore rā ’o tei ’ōfati i te mau ture, nō te mea ’ua pāto’i rātou i te mau peropheta. ’Ua ha’api’ihia rātou i te fa’aro’o i te Atua, i te tātarahapara’a i te hara, i te bāpetizora’a e ravehia e te feiā ora nō te feiā pohe ’ia matara te hara, i te hōro’a nō te Vārua Maita’i nā roto i te tu’ura’a rima, ’E te tahi atu mau parau tumu nō te ’evanelia ’o tei tītauhia ia rātou ’ia ’ite ’ia nehenehe ia rātou ’ia fa’aineine ia rātou iho ’ia ti’a ia rātou ’ia ha’avāhia mai te au i te ta’ata i te tino nei, ’e ’ia ora mai te au i te huru o te Atua i te vārua ra.

E ha’api’ihia te mau vārua i roto i te ao vārua i te ’evanelia tā’āto’a, ’oia ato’a te bāpetizora’a ’ei mono.

Te Ha’api’ira’a Tumu ’e te mau Fafaura’a 138:53–54

Iosepha F. Semita, i te fa’ata’ara’a i tāna ’ōrama nō te feiā i pohe

Te peropheta Iosepha Semita, ’e tō’u metua tāne, ia Hyrum Smith, ’e Brigham Young, ’e John Taylor, ’e Wilford Woodruff, ’e te tahi atu mau vārua mā’itihia ’o tei fa’ahereherehia nō te haere mai i te ’īra’a o te mau tau nō te rave i te ’ohipa nō te ha’amaura’a i te mau niu nō te ’ohipa rahi i te mau mahana hope’a nei, Mai te patura’a ho’i i te mau hiero ’e te ravera’a i te mau ’ōro’a i roto nō te fa’aorara’a i te feiā i pohe, tei roto ato’a rātou i te ao vārua.

’Ua tāpe’ahia te mau vārua mā’itihia nō te ha’amau i te niu o te ’ohipa o te mau mahana hope’a nei, ’oia ato’a te mau hiero ’e te mau ’ōro’a nō te feiā i pohe.

Te Ha’api’ira’a Tumu ’e te mau Fafaura’a 138:57–59

Iosepha F. Semita, i te fa’ata’ara’a i tāna ’ōrama nō te feiā i pohe

’Ua ’ite atu ra vau i te mau peresibutero fa’aro’o o teie nei tau tu’ura’a ’evanelia, ’a fa’aru’e mai ai rātou i te orara’a tāhuti nei, ’ua tāmau noa rātou i tā rātou mau ’ohipa nō te porora’a i te ’evanelia nō tē tātarahapara’a ’e te fa’aorara’a, nā roto i te tusia a te Tamaiti fānau tahi a te Atua, i rotopū i te feiā i roto i te pōiri ’e i raro a’e i te fa’atītīra’a nō te hara i roto i te ao rahi nō te mau vārua nō te feiā i pohe. Te feiā i pohe ’o tē tātarahapa e fa’aorahia ïa, nā roto i te ha’apa’ora’a i te mau ’ōro’a nō te fare o te Atua, ’E i muri a’e i tō rātou ’aufaura’a i te utu’a nō tā rātou mau ’ōfatira’a ture, ’e tō rātou horoi-mā-ra’a-hia, e fāri’i ïa rātou i te utu’a maita’i mai te au i tā rātou mau ’ohipa, nō te mea e mau fatu ’āi’a rātou nō te ora.

E ha’api’i noa te feiā ha’apa’o maita’i i muri a’e i te pohe, ’e e fa’aorahia te feiā i pohe ’o tē tātarahapa nā roto i te mau ’ōro’a hiero.

’E ’ua haere mai ra te mau vārua e rave rahi nō roto mai i te fare tāpe’ara’a, ’e ’ua ti’a i te pae ’atau o te rima o te Atua ; ’e te toe’a ra, ’ua tāpe’ahia ïa i te mau fifi o te pōiri, ē tae noa atu i te ha’avāra’a nō te mahana rahi ra.

I roto i te ’ōrama a Enoha, e haere mai te mau vārua i roto i te fare ’āuri i te rima ’atau o te Atua nā roto i te ’ohipa a te Fa’aora.

Te Ha’api’ira’a Tumu ’e te mau Fafaura’a 124:29–30

Te Fatu, nā roto ia Iosepha Semita

’Aita ho’i e vāhi bāpetizora’a e vai nei i ni’a i te fenua nei, e ti’a ai ia rātou, ’oia i tō’u feiā mo’a, ’ia bāpetizohia nō rātou ’o tei pohe na— Nō tō’u nei ho’i fare iho taua ’ōro’a nei, ’e e ’ore roa ho’i te reira e ti’a ’ia fāri’ihia e au, maori rā i te mau mahana nō tō ’outou vevera’a, i te tau e’ita e nehenehe ia ’outou ’ia patu i te hō’ē fare nō’u nei.

E parau te Fatu ē tei roto i Tōna hiero te vāhi nō te bāpetizora’a nō te feiā i pohe.

Te Ha’api’ira’a Tumu ’e te mau Fafaura’a 128:5

Iosepha Semita, i roto i te hō’ē rata i te Feiā Mo’a

E mana’o paha ’outou e mea ’eta’eta roa teie huru ha’apa’ora’a i te mau mea ato’a ; terā rā, e fa’a’ite atu vau ia ’outou ē nō te ha’apa’o ïa te reira i te hina’aro o te Atua, nā roto i te ha’apa’ora’a i te ’ōro’a ’e te fa’aineinera’a tā te Fatu i fa’ata’a ’e i fa’aineine hou roa te fa’atumura’a o te ao nei, nō te fa’aorara’a o te feiā i pohe ’o tē pohe ma te ’ite ’ore i te ’evanelia.

’Ua fa’anahohia te fa’aorara’a nō te feiā i pohe ma te ’ore i te ’evanelia hou te ao nei i hāmanihia ai.

Te Ha’api’ira’a Tumu ’e te mau Fafaura’a 128:15

Iosepha Semita, i roto i te hō’ē rata i te Feiā Mo’a

’E i teienei, e au mau taea’e here e au mau tuahine here rahi, tē ha’apāpū atu nei au ia ’outou ē, e mau ha’api’ira’a tumu teie nō ni’a i te feiā i pohe ’e te feiā ato’a e ora nei ’o tē ’ore roa e ti’a ’ia ha’apa’o-’ore-hia, nō ni’a i tō tātou fa’aorara’a. Nō te mea ē ’ua tītauhia tō rātou fa’aorara’a nō tō tātou ato’a fa’aorara’a, mai te au i tā Paulo i parau mai nō ni’a i te mau metua—e ’ore e noa’a te maita’i rahi roa ia rātou ’ia ’ore tātou nei, e ’ore ato’a tātou e maita’i roa ’ia ’ore tō tātou feiā i pohe ra.

’Ua tā’atihia tō tātou fa’aorara’a ’e tō tō tātou mau tupuna; e ’ore te hō’ē e fa’ahope-roa-hia ’ia ’ore te tahi.

Te Ha’api’ira’a Tumu ’e te mau Fafaura’a 132:46

Te Fatu, nā roto ia Iosepha Semita

’E ’oia mau, ’oia mau, tē parau atu nei au ia ’oe na, ’o tā ’oe e tā’ati i ni’a i te fenua nei, e tā’atihia ïa i roto te ra’i ; ’e ’o tā ’oe e ru’uru’u i ni’a i te fenua nei, nā roto i tō’u nei i’oa ’e nā roto ho’i i tā’u nei parau, tē nā reira mai nei te Fatu, e ru’uru’uhia ïa te reira ē a muri noa atu i roto i te mau ra’i ; ’e te mau hara ato’a a te ta’ata nei tā ’oe e fa’a’ore i ni’a i te fenua nei, e fa’a’orehia ïa ē a muri noa atu i roto i te mau ra’i ; ’e te mau hara ato’a a te ta’ata nei tā ’oe e vaiiho noa i ni’a iāna i te fenua nei, e vaiihohia ïa i ni’a iāna i te ra’i ra.

E ha’apāpū te Fatu ē te mea e tā’atihia i ni’a i te fenua nā roto i Tōna mana, e tā’atihia ïa e a muri noa’tu i te ra’i.

Te Ha’api’ira’a Tumu ’e te mau Fafaura’a 127:6–7

Te Fatu, i roto i te hō’ē rata a Iosepha Semita

’Oia mau, tē nā ’ō mai nei te Fatu ia ’outou na nō ni’a i tō ’outou feiā i pohe ra : ’Ia bāpetizohia te hō’ē o ’outou nō tō ’outou feiā i pohe ra, ’ia fa’ata’ahia te hō’ē pāpa’i parau, ’e ’ia riro ’oia ’ei ’ite mata nō tā ’outou mau bāpetizora’a ; ’e ’ia fa’aro’o mai tōna tari’a, ’ia ti’a iāna ’ia fa’a’ite ma te parau mau, tē nā reira mai nei te Fatu ; ’Ia ti’a i tā ’outou mau pāpa’ira’a ato’a ’ia pāpa’ihia i te ra’i ra ; ’o tā ’outou e ha’amau i ni’a i te fenua nei ’ia ha’amau-ato’a-hia ïa i te ra’i ra ; ’o tā ’outou e ha’amatara i ni’a i te fenua nei, ’ia ha’amatara-ato’a-hia ïa i te ra’i ra ;

E ti’a ’ia ’itehia ’e ’ia pāpa’ihia te mau bāpetizora’a ’ei mono ’ia pāpa’i-ato’a-hia i te ra’i.

Te Ha’api’ira’a Tumu ’e te mau Fafaura’a 128:8

Iosepha Semita, i roto i te hō’ē rata i te Feiā Mo’a

I teienei, te huru nō teie nei ’ōro’a tei roto ïa i te mana nō te autahu’ara’a, nā roto i te heheura’a a Iesu Mesia, tei fa’ati’a mai ’e ’o tā ’outou e ha’amau i ni’a i te fenua nei e ha’amau-ato’a-hia ïa i te ao ra, ’e ’o tā ’outou e ha’amatara i ni’a i te fenua nei, e ha’amatara-ato’a-hia ïa i te ao ra. ’E ’aore rā, nā roto i te tahi atu mau parau, nō te tahi atu huru ferurira’a nō te ’īritira’a, ’o tā ’outou e pāpa’i i ni’a i te fenua nei, e pāpa’ihia ïa i te ao ra, ’e ’o tā ’outou e ’ore e pāpa’i i ni’a i te fenua nei, e ’ore ato’a ïa e pāpa’ihia i te ao ra ; nō te mea nō roto mai i te mau buka tō ’outou feiā i pohe ra e ha’avāhia ai, ’ia au i tā rātou iho ’ohipa, mai te mea ra ē nā rātou iho i rave i tō rātou iho mau ’ōro’a ’a ora noa ai rātou i ni’a i te fenua nei, ’e ’aore rā nā roto i te rāve’a a tō rātou iho mau ta’ata ha’apa’o, mai te au i te ’ōro’a tā te Atua i fa’aineine ’ei fa’aorara’a nō rātou, hou te fa’atumura’a o te ao nei, mai te au ho’i i te mau pāpa’a parau tā rātou i ha’apa’o nō tō rātou feiā i pohe ra.

Te mau ’ōro’a i pāpa’ihia i ni’a i te fenua nā roto i te mana autahu’ara’a, e pāpa’ihia ïa i te ra’i, noa atu ē ’ua fāri’i-iho-hia ’aore rā ’ei mono.

Te Ha’api’ira’a Tumu ’e te mau Fafaura’a 128:9

Iosepha Semita, i roto i te hō’ē rata i te Feiā Mo’a

E feruri paha te tahi mau ta’ata ē e ha’api’ira’a tumu taiā ’ore mau tā tātou e parau nei—’oia ho’i, nō ni’a i te hō’ē mana ’o tē pāpa’i nei ’e ’aore rā ’o tē ha’amau nei i ni’a i te fenua nei ’e ’o tē ha’amau nei i te ao ra. Noa atu i te reira, i roto i te mau tau ato’a nō te ao nei, i te mau tau ato’a tā te Fatu i hōro’a mai i te tau tu’ura’a nō te autahu’ara’a i te hō’ē ta’ata nā roto i te heheura’a mau, ’e ’aore rā i te tahi pupu ta’ata, ’ua hōro’a-ato’a-hia mai teie nei mana. Nō reira, te mau mea ato’a tā taua mau ta’ata ra i rave nā roto i te ha’amanara’a, i roto i te i’oa nō te Fatu, ’e ’ua rave ho’i i te reira ma te parau mau ’e te ti’a, ’e ’ua ha’apa’o i te pāpa’a parau ti’a ’e te parau mau nō taua ’ohipa ra, ’ua riro ho’i ïa te reira ’ei ture i ni’a i te fenua nei ’e i te ao ra, ’e ’aore roa e ti’a ’ia fa’a’orehia atu, mai te au i te mau fa’auera’a mana a Iehova rahi. E parau mau roa teie nei parau. ’O vai tē ti’a ’ia fa’aro’o mai i te reira ?

’Ua hōro’ahia te mana nō te ha’amau i ni’a i te fenua ’e i te ra’i i roto i te mau tau tu’ura’a ’evanelia ato’a, ’e nā te mau pāpa’a parau ha’apa’o maita’i e fa’a’eta’eta i te ’ohipa.

’E i muri a’era, ’ua ’ite ato’a atu ra tō’u metua tāne o Lehi ē, tei ni’a iho i te mau ’api veo te tuatāpapara’a tupuna o tōna ra mau metua ; nō reira ’ua ’ite ’oia ē, e hua’ai ’oia nō Iosepha ; ’oia ho’i, ’o Iosepha te tamaiti a Iakoba, ’o tei ho’ohia i ’Aiphiti ra, ’e ’o tei fa’aorahia e te rima o te Fatu, ’ia ti’a iāna ’ia fa’aora i tōna ra metua tāne ia Iakoba, ’e tōna ’utuāfare pā’āto’a i te pohe o’e ra.

E ’ite Lehi i tōna papa tupuna i roto i te mau ’api veo ’e e ’ite ’oia ē nō roto mai ’oia ia Iosepha nō ’Aiphiti.

Inaha, e tā’u nā tamaiti, tē hina’aro nei au ’ia ha’amana’o ’ōrua ’ia ha’apa’o maita’i i te mau fa’auera’a a te Atua ; ’e tē hina’aro nei au ’ia a’o atu ’ōrua i teie mau parau i te mau ta’ata. Inaha, ’ua topa atu vau i te i’oa o tō tātou nā metua mātāmua i ni’a iho ia ’ōrua, ’e ’ua haere mai rātou mai te fenua ra nō Ierusalema ; ’e ’ua nā reira vau, nō te mea ’ia ha’amana’o ’ōrua i tō ’ōrua i’oa e ha’amana’o ato’a ’ōrua i tā rāua mau ’ohipa ; ’e ’ia ha’amana’o ’ōrua i tā rāua mau ’ohipa, e ’ite ato’a ’ōrua i tei parauhia ’e tei pāpa’ihia ho’i, ’o tei nā ’ō mai ē, e nā ta’ata maitata’i rāua.

’Ua pi’i Helamana i tāna mau tamaiti i te i’oa o te mau tupuna parau-ti’a ’ia ha’amana’o rātou, nā roto i te ha’amana’ora’a i tō rātou i’oa, i te maita’i o tō rātou mau tupuna.

I teienei ’ua parau mai ra Adamu i teie nei tohura’a ’a fa’auruhia ai ’oia e te Vārua Maita’i, ’e e tuatāpapara’a tupuna tei ha’apa’ohia nō te mau tamari’i a te Atua. ’E ’o te buka teie nō te mau u’i o Adamu, ’o tei nā ’ō mai ē : I te mahana ’a hāmani ai te Atua i te ta’ata nei, ’ua hāmani ’oia iāna mai tō te Atua huru ;

Mai te tau o Adamu mai, ’ua ha’apa’ohia te hō’ē papa tupuna nō te mau tamari’i a te Atua, te pāpa’a parau ’utuāfare mātāmua i pāpa’ihia.

’Āre’a rā te mau pāpa’a parau o te mau metua, ’e tō te mau patereareha nō ni’a i te ti’ara’a o te Autahu’ara’a, ’ua fa’aherehere ïa te Fatu tō’u Atua i te reira i roto i tō’u iho nei rima ; nō reira ’ua ha’apa’o vau, ē tae roa mai i teie mahana, te ’ite nō ni’a i te ha’amatara’a o te hāmanira’a o te mau mea ato’a ra, ’e nō ni’a ato’a i te mau palaneta, ’e te mau feti’a, mai tei fa’a’itehia atu i te mau metua ra, ’e e tāmata vau i te pāpa’i i te tahi pae o taua mau mea ra i ni’a teie nei pāpa’a parau, nō te maita’i o tō’u ra hua’ai ’o tē tae mai i muri iā’u.

’Ua ha’apa’o Aberahama i te mau pāpa’a parau a tōna mau metua ’e ’ua pāpa’i ’oia nō te maita’i o tōna huā’ai.

Te Ha’api’ira’a Tumu ’e te mau Fafaura’a 128:18

Iosepha Semita, i roto i te hō’ē rata i te Feiā Mo’a

’Ua nehenehe paha iā’u ’ia hōro’a atu i te hō’ē ’īritira’a māramarama a’e i teie, terā rā ’ua nava’i te māramarama nō te reira i teienei nō te fa’a’ite i te mea tā’u i hina’aro ’ia vaiiho-noa-hia mai te reira i teienei. ’Ua nava’i ïa ’ia ’ite ē e ’anatemahia te fenua nei maori rā ’ia vai noa mai te hō’ē ’ave fifi tū’atira’a mai te reira te huru i rōpū i te mau metua ’e te mau tamari’i, nō ni’a i te tahi tumu parau ’e ’aore rā i te tahi ’ē atu ra—’e inaha e aha ïa taua tumu parau ra ? ’O te bāpetizora’a ïa nō te feiā i pohe. Nō te mea ’ia ’ore rātou, e ’ore roa e ti’a ia tātou ia ha’amaita’i-roa-hia ; e ’ore ato’a ho’i rātou e ha’amaita’i-roa-hia ’ia ’ore tātou nei. E ’ore roa ho’i e ti’a ia rātou ’e ’aore rā ia tātou nei ’ia ha’amaita’i-roa-hia ’ia ’ore rātou ’o tei pohe ato’a atu i roto i te ’evanelia ; nō te mea ’ua tītauhia ïa nō te ha’amatara’a o te tau tu’ura’a ’evanelia nō te ’īra’a o te mau tau ato’a ’e tē ha’amata nei te reira tau tu’ura’a ’evanelia i teienei, ’ia fa’atupuhia te tāhō’ē-maita’i-roa-ra’a o te mau tau tu’ura’a ’evanelia, ’e te mau tāviri, ’e te mau mana, ’e te mau hanahana, ’e ’ia heheuhia mai ho’i, mai te mau mahana nō Adamu ē tae roa mai i teie ’anotau nei. ’E e ’ere ho’i teie ana’e, ’o taua mau mea ato’a rā ’o tei ’ore ā i heheuhia mai mai te fa’atumura’ahia mai ā o te ao nei, ’ua huna-’ē-hia rā i te feiā pa’ari ’e te ’ite ra, e heheuhia mai ïa i te mau tamari’i ri’i ’e te mau ’aiū i roto i teie, ’oia te tau tu’ura’a ’evanelia nō te ’īra’a o te mau tau.

Te ’ohipa nō te feiā i pohe, ’o te « ’ave fifi tū’atira’a » ïa e tā’ati i te mau u’i ’ei hō’ē tāhō’ēra’a maita’i roa.

Te Ha’api’ira’a Tumu ’e te mau Fafaura’a 128:22

Iosepha Semita, i roto i te hō’ē rata i te Feiā Mo’a

E au mau taea’e ē, e ’ere ānei i te mea ti’a ia tātou ’ia haere ā i roto i te hō’ē ’ohipa rahi roa mai teie te huru ? ’A haere i mua ’e ’eiaha e haere i muri. ’A rohi, e au mau taea’e ē ; ’a haere ā, ’a haere ā ē tae roa i te upō’ōti’ara’a ! ’Ia ’oa’oa tō ’outou ’ā’au, ’e ’ia ’oa’oa rahi roa. ’Ia tupu mai te reo hīmene o te fenua nei. ’Ia parau mai te feiā i pohe ra i te mau hīmene nō te ’āruera’a mure ’ore i te Ari’i ra ’o Imanuela, ’o tei fa’atōro’a mai, hou te ao nei i vai mai ai, i taua mau mea ra ’o tē fa’ati’a mai ia tātou ’ia fa’aora mai ia rātou mai roto mai i tō rātou fare tāpe’ara’a ; ’e ’ia fa’ati’amāhia ïa te feiā mau ’āuri ra.

Te pi’ira’a ’oa’oa a Iosepha Semita ’ia haere i mua i te fa’aorara’a i te feiā i pohe, nō te mea e fa’ati’amāhia te feiā ’āuri.

Te Ha’api’ira’a Tumu ’e te mau Fafaura’a 128:24

Iosepha Semita, i roto i te hō’ē rata i te Feiā Mo’a

Inaha, ’ua fātata mai te mahana rahi o te Fatu ; ’e ’o vai tē ti’a ’ia fa’a’oroma’i i te mahana nō tōna taera’a mai, ’e ’o vai tē ti’a ’ia ti’a noa mai ’ia fā mai ’oia ? ’Ua au ho’i ’oia i te auahi a te ta’ata tāmā ra, ’e mai te pu’a tāmāra’a ; ’e e pārahi ’oia mai te ta’ata tāmā ’e te ta’ata tāmā ’ārio, ’e e tāmā ’oia i te mau tamaiti a Levi, ’e e tāmā ho’i ia rātou mai te ’auro ’e te ’ārio, ’ia ti’a ia rātou ’ia pūpū atu i te ō i te Fatu nā roto i te parauti’a. Nō reira, ’ia pūpū atu tātou, ’oia te ’ēkālesia ’e te mau ta’ata, ’e te feiā mo’a i te mau mahana hope’a nei, i te ō i te Fatu nā roto i te parauti’a ; ’e ’ia pūpū atu tātou i roto i tōna hiero mo’a, ’ia oti te reira, te hō’ē buka tei roto i te reira te mau pāpa’a parau nō tō tātou feiā i pohe ra, ’o tē ti’a ’ia fāri’i-tā’āto’a-hia.

E ani-manihini-hia te Feiā Mo’a ’ia pūpū i roto i te hiero i te hō’ē buka ti’a tei roto te mau pāpa’a parau nō tō rātou feiā i pohe.