Deɛ enti a yɛyɛ abusua abakɔsɛm

3 Nifae 25:5–6

Yesu Kristo, a ɔrebɔ Malaki nsɛm akyerɛ Nifaefoɔ

Monhwɛ, mɛsoma Elia ɔkɔmhyɛni no ansaana na Awurade da a ɛyɛ kɛseɛ na ɛyɛ hu yie no aba; Na ɔbɛdane agyanom akoma aba wɔn mma so, na mma nso akoma aba agyanom so, na mamma amɛfa nomee ammɔ asaase no.

Agyenkwa a wasɔre no san ka Malaki bɔhyɛ a ɛfa Elia ho kyerɛ nnipa a wɔwɔ Amerika, na ɛkyerɛ sɛdeɛ ɛho hia.

Hwɛ, mɛda asɔfɔdie no adi akyerɛ mo, nam nkɔmhyɛni Elia nsa so, ansa na Awurade da kɛseɛ, na ɛyɛ hu no aba. Na ɔbɛdua wɔ mma no akoma mu bɔhyɛsɛm a wɔyɛ maa agyanom no, na mma no akoma bɛdane akɔ wɔn agyanom so. Sɛ anyɛ saa a, asase no nyina ara bɛsɛe korakora wɔ ne mmaeɛ no.

Moronae kaa Malaki nsɛm no sei: Elia bɛsan de asɔfodie tumidie aba, na wadua bɔhyɛ a wɔde hyɛɛ agyanom no wɔ mma no akoma mu.

Joseph Smith—Abakɔsɛm 1:38–39

Joseph Smith, a ɔreka Moronae nsɛm

Na bio, ɔsan nso srɛ kaa nkyekyɛmu a ɛtɔ so num no sei: Hwɛ, mɛda Asɔfodie no adi akyerɛ mo, nam nkɔmhyɛni Elia nsa so, ansa na Awurade da kɛseɛ, na ɛyɛ hu no aba. Ɔsan nso srɛ kaa nkyekyɛmu a ɛtoa soɔ no kwan foforɔ so: Na ɔbɛdua wɔ mma no akoma mu bɔhyɛsɛm a wɔyɛ maa agyanom no, na mma no akoma bɛdane akɔ wɔn agyanom so. Sɛ anyɛ saa a, asase no nyina ara bɛsɛe korakora wɔne mmaeɛ no.

Joseph Smith ka sɛdeɛ Moronae bɔɔ Malaki nkɔmhyɛ a ɛfa Elia ho kyerɛɛ no wɔ 1823.

Saa anisoadehunu yi baa awieɛ no, anisoadehunu kɛseɛ foforɔ a ɛyɛ animuonyam wɔ mu baa yɛn so; na Elia nkɔmhyɛni no a wɔfaa no kɔɔ soro a wannka owuo annhwɛ no bɛgyinaa yɛn anim, na ɔkaa sɛ: Hwɛ, berɛ no aba awie, deɛ Malaki de n’ano kaaeɛ no—ɔno a ɔdii adanseɛ sɛ wɔbɛsoma ɔno [Elia], ansa na Awurade da kɛseɛ a ɛyɛ hũ no bɛba— Sɛ ɔbɛdane agyanom akoma akɔ mma no so, na mma no akoma akɔ agyanom so, ama wɔammfa nnome ammɔ asase mũ no nyina ara— Ne saa nti, wɔde saa asɛmpa berɛ yi nsafoa ahyɛ mo nsa; na ɛnam yei so no mobɛhunu sɛ Awurade da kɛseɛ na ɛyɛ hu no abɛn, mpo ɛwɔ apono ano.

Elia yi ne ho adi wɔ Kirtland Tɛmpol mu wɔ 1836 na ɔde saa adwuma yi nsafoa hyɛ Joseph Smith ne Oliver Cowdery nsa.

Nkyerɛkyerɛ ne Apam 98:16

Awurade, ɛnam Joseph Smith so

Ne saa nti, mompo ɔko na mommɔ asomdwoeɛ ho dawuro, na momfa nsiyɛ nhwehwɛ sɛ wobɛdane mma no akoma akɔ agyanom so, na agyanom akoma akɔ mma no so;

Awurade hyɛ Ahotefoɔ no sɛ wɔmfa nsi ntena so nnane mma ne agyanom akoma nkɔ wɔn ho wɔn ho so.

Nkyerɛkyerɛ ne Apam 138:47–48

Joseph F. Smith, a ɔreka n’anisoadehunu a ɛfa awufoɔ ho

Na ɛwɔ sɛ nkɔmhyɛni Elia dua bɔhyɛ a wɔde hyɛɛ wɔn agyanom no wɔ mma no akoma mu, Ɛno na ɛkyerɛ adwuma kɛseɛ a na wɔrebɛyɛ wɔ Awurade tɛmpol mu asɛmpa berɛ mu mahyɛ no mu, ayɛ ɔgyeɛ ama awufoɔ, ayɛ mma nsɔano ama wɔn awofoɔ, anyɛ saa a wɔde nnome bɛbɔ asase no nyina ara ma asɛe korakora wɔ ne mmaeɛ no.

Elia adwuma no kyerɛɛ tɛmpol adwuma a wɔbɛyɛ ama awufoɔ ne mma nsɔano ma wɔn awofoɔ ho nsɛnkyerɛnne.

Afei, ɛfa ɔkra tebea wɔ owuo ne owusɔreɛ no ntam—Hwɛ ɔbɔfoɔ ama mahunu sɛ sɛ nnipa biara wu a ntɛm pa no ara na wɔn honhom afiri honamdua a ɛwuo yi mu, aane, nnipa nyina ara honhom, sɛ wɔyɛ papa anaasɛ bɔne no, san kɔ fie wɔ saa Nyankopɔn no a ɔde nkwa maa wɔn no nkyɛn. Na afei ɛbɛba sɛ wɔn a wɔyɛ ateneneefoɔ no, wɔbɛgye wɔn honhom akɔ anigyeɛ tebea, a wɔfrɛ no paradise, tebea a ahomegyeɛ wɔ, asomdwoeɛ tebea, ɛhɔ na wɔbɛgye wɔn ahome afiri wɔn haw ne wɔn adwendwene nyina ara, ne awerɛhoɔ mu.

Alma kyerɛkyerɛ sɛ ahonhom kɔ so te ase wɔ owuo akyi, na atreneefoɔ kɔ ahomegyeɛ tebea a wɔfrɛ no paradise mu.

Nkyerɛkyerɛ ne Apam 137:7–9

Awurade, wɔ anisoadehunu a ɔde maa Joseph Smith mu

Sei na Awurade nne a ɛbaa me hɔ no kaaeɛ: Wɔn a wɔwuui a wɔannya saa asɛmpa yi ho nimdeɛ no nyina ara no, wɔn a sɛ wɔmaa wɔn kwan tenaa ase a anka wɔgyeeɛ no bɛnya Onyankopɔn sɛlɛstia ahemman no; Wɔn nso a firi saa berɛ yi de rekorɔ wɔbɛwuwu a wɔnni ɛho nimdeɛ no, wɔn a anka wɔde wɔn akoma nyina ara bɛgye no, bɛnya saa ahemman no; Ɛfiri sɛ me Awurade, mɛbu nnipa nyina ara atɛn sɛdeɛ wɔn nnwuma teɛ sɛdeɛ wɔn akoma apɛdeɛ teɛ.

Wɔn a wɔwuiɛ a wɔnteeɛ asɛmpa no nanso anka wɔbɛgye atom no, wɔnto wɔn mmɔ nkyɛn; Onyankopɔn bu atɛn sɛdeɛ akoma mu apɛdeɛ teɛ.

Nkyerɛkyerɛ ne Apam 138:11

Joseph F. Smith, a ɔreka n’anisoadehunu a ɛfa awufoɔ ho

Berɛ a meredwennwene saa nneɛma a wɔatwerɛ yi ho no, wɔbuee me nteaseɛ ani, na Awurade honhom baa me so, na mehunuu awufoɔ akuoakuo, nketewa ne akɛseɛ nyina ara.

Titenani Joseph F. Smith anisoadehunu a ɛfa honhom wiase ho wɔ 1918 no hyɛɛ aseɛ berɛ a na ɔredwennwene atwerɛsɛm no ho.

Nkyerɛkyerɛ ne Apam 138:30

Joseph F. Smith, a ɔreka n’anisoadehunu a ɛfa awufoɔ ho

Mmom hwɛ, ɔhyehyɛɛ ne dɔm firii ateneneefoɔ no ntam na ɔyii abɔfoɔ, maa wɔn tumi ne tumidie, na ɔmaa wɔn asodie sɛ wɔnkɔ na wɔmfa asɛmpa hann no nkɔma wɔn a na wɔn wɔ esum mu, mpo mma nnipa ahonhom nyina ara; na sei na wɔfaa so kaa asɛmpa no kyerɛɛ awufoɔ no.

Agyenkwa no hyehyɛɛ ahonhom treneeni sɛ wɔmfa asɛmpa no nkɔma awufoɔ nyinaa.

Nkyerɛkyerɛ ne Apam 138:32–34

Joseph F. Smith, a ɔreka n’anisoadehunu a ɛfa awufoɔ ho

Na sei na wɔfaa so kaa asɛmpa no kyerɛɛ wɔn a wɔwuwuui wɔ wɔn bɔne mu, a wɔannya nokorɛ no ho nimdeɛ, anaa wɔ wɔn mmaratoɔ mu, ɛnam sɛ wɔpoo nkɔmhyɛfoɔ no nti. Wɔkyerɛkyerɛɛ yeinom gyedie wɔ Onyankopɔn mu, bɔne ho nsakyeraeɛ, asubɔ a wɔgyina mu yɛ dema afoforɔ de nya bɔne fafiri, Sunsum Kronkron akyɛdeɛ a ɛnam nsa wɔde gu soɔ so no. Ne asɛmpa no nnyinasosɛm foforɔ biara a ɛhia sɛ wɔhunu ama wɔafata sɛ wɔbu wɔn atɛn sɛ nnipa a wɔn wɔ honam mu na wɔatena ase sɛdeɛ Onyankopɔn te wɔ Honhom mu.

Wɔkyerɛkyerɛ ahonhom a wɔwɔ honhom wiase asɛmpa no mũ, a ananmusi asubɔ ka ho.

Nkyerɛkyerɛ ne Apam 138:53–54

Joseph F. Smith, a ɔreka n’anisoadehunu a ɛfa awufoɔ ho

Nkɔmhyɛni Joseph Smith, ne me Papa, Hyrum Smith, Brigham Young, John Taylor, Wilford Woodruff, ne ahonhom afoforɔ a wɔsom bo a wɔkoraa wɔn sɛ wɔmfiri adi mmra wɔ mmerɛ mahyɛ mu na wɔmmɛka ho nto nna a ɛdi akyire adwuma kɛseɛ no fapem, Ɛne tɛmpol sie ne ayɛyɛdeɛ ho dwumadie a wɔyɛ no wɔ mu de gye awufoɔ no—nso wɔ honhom wiase hɔ bi.

Wɔkoraa ahonhom a wɔapaw wɔn sɛ wɔbɛto nna a ɛdi akyire adwuma no fapem, a tɛmpol ne ayɛyɛdeɛ ma awufoɔ ka ho.

Nkyerɛkyerɛ ne Apam 138:57–59

Joseph F. Smith, a ɔreka n’anisoadehunu a ɛfa awufoɔ ho

Mehunuu sɛ saa asɛmpa berɛ mpanin nokorɛfoɔ no, sɛ wɔfiri ewuo asetena yi mu a, wɔtoa wɔn nnwuma so ka nsakyeraeɛ ne ɔgyeɛ asɛmpa no a ɛnam Onyankopɔn Ba a Ɔwoo no Korɔ no afɔdeɛ no so, wɔ wɔn a wɔn wɔ esum mu na wɔhyɛ bɔne nkoasom ase wɔ awufoɔ ahonhom wiase kɛseɛ no mu. Awufoɔ a wɔsakyera no wɔbɛgye wɔn, nam setie a wɔyɛ ma ayɛyɛdeɛ a ɛwɔ Onyankopɔn fie no mu, Na akyire yi a wɔatua wɔn mmarato ho asotwe awie, na wɔahohoro wɔn ho ma wɔn ho ate no, wɔbɛnya akatua sɛdeɛ wɔn nnwuma teɛ, ɛfiri sɛ wɔyɛ nkwagyeɛ adedifoɔ.

Nokwafoɔ no kɔ so kyerɛkyerɛ wɔ owuo akyi, na awufoɔ a wɔsakyera no, wɔnam tɛmpol ayɛyɛdeɛ so gye wɔn.

Na ahonhom dodoɔ no ara a na wɔn wɔ afiase no firii adi baae, na wɔgyinaa Onyankopɔn nsa nifa so; na wɔkoraa nkaeɛ no wɔ esum nkɔnsɔnkɔnsɔn mu de rekɔsi atemmuo da kɛseɛ no.

Wɔ Enok anisoadehunu mu, ahonhom a wɔwɔ afiase firi adi ba Onyankopɔn nifa so, a ɛne Agyenkwa no adwuma wɔ abusuabɔ.

Nkyerɛkyerɛ ne Apam 124:29–30

Awurade, ɛnam Joseph Smith so

Ɛfiri sɛ asubɔ-kyɛnsee nni asase so, a wɔn a wɔyɛ m’ahoteɛfoɔ no bɛtumi abɔ asu ama wɔn a wɔawuwuo no— Ɛfiri sɛ wɔyɛ saa ayɛyɛdeɛ yi wɔ me fie, na ɛrenntumi nnsɔ m’ani, gye sɛ mo hia nna mu, berɛ a morenntumi nnsi fie mma me.

Awurade ka sɛ awufoɔ asubɔ wɔ Ne tɛmpol mu.

Nkyerɛkyerɛ ne Apam 128:5

Joseph Smith, wɔ krataa a ɔtwerɛ maa Ahotefoɔ no mu

Mobɛdwene sɛ saa nneɛma yi ho nhyehyɛeɛ yɛ sononko; nanso, momma menka nkyerɛ mo sɛ yei bɛhyɛ Onyankopɔn pɛ ma, ɛnam sɛ ɛbɛyɛ sɛdeɛ Awurade ayɛyɛdeɛ ne ne nhyehyɛeɛ a wayi na wasiesie firi wiase fapem no ase, ama awufoɔ nkwagyeɛ, wɔn a wɔbɛwuo wɔ berɛ a wɔnnya asɛmpa no ho nimdeɛ.

Wɔhyehyɛɛ nkwagyeɛ maa wɔn a wɔwuiɛ a wɔnnyaa asɛmpa no ansa na wɔbɔɔ wiase.

Nkyerɛkyerɛ ne Apam 128:15

Joseph Smith, wɔ krataa a ɔtwerɛ maa Ahotefoɔ no mu

Na afei, me nuanom mmarima ne mmaa adɔfoɔ, ma mensi no pi nkyerɛ mo sɛ ɛnnsɛ sɛ wɔtoto saa nyinasosɛm yi a ɛfa awufoɔ ne ateasefoɔ, deɛ ɛfa yɛn nkwagyeɛ ho no ase koraa. Ɛfiri sɛ wɔn nkwagyeɛ hia na ɛfata ma yɛn nkwagyeɛ, sɛdeɛ Paulo kaae faa agyanom ho no—sɛ wɔnnka yɛn ho a wɔrenntumi nnyɛ pɛ-na yɛnnka yɛn awufoɔ ho a yɛrenntumi nnyɛ pɛ.

Yɛn nkwagyeɛ ne yɛn nananom nkwagyeɛ abɔ mu; baako ntumi nyɛ pɛ a foforɔ nka ho.

Nkyerɛkyerɛ ne Apam 132:46

Awurade, ɛnam Joseph Smith so

Na nokorɛ, nokorɛ, mese wo sɛ biribiara a wobɛsɔ ano wɔ asase so no wɔbɛsɔ ano wɔ soro; na biribiara a wobɛkyekyere wɔ asase so wɔ me din mu na ɛnam m’asɛm so no, Awurade na ɔseɛ, wɔbɛkyekyere no afebɔɔ wɔ ɔsoro; na obibiara a wode ne bɔne bɛfiri no wɔ asase so no wɔde bɛfiri no; na obibiara a woma ne bɔne tena hɔ wɔ asase so no wɔbɛma no atena hɔ wɔ soro.

Awurade si so dua sɛ deɛ wɔde Ne tumidie asɔ ano wɔ asase so no, wɔasɔ ano daa wɔ soro.

Nkyerɛkyerɛ ne Apam 127:6–7

Awurade, wɔ Joseph Smith krataa bi mu

Nokorɛ, sɛdeɛ Awurade se mo ɛfa mo awufoɔ ho nie: Sɛ mo mu bi bɔ asu ma mo awufoɔ a, monyi abasɛm twerɛfoɔ, na momma ɔnyɛ mo asubɔ ho dansefoɔ; momma ɔmfa n’aso ntie, ama wadi adanseɛ nokorɛ mu, Awurade na ɔseɛ; Ama wɔ mo atwerɛtwerɛ nyina ara mu no wɔatwerɛ no wɔ soro; biribiara a mobɛkyekyere wɔ asase so no, wɔbɛkyekyere no wɔ soro; biribiara a mobɛsane wɔ asase so no, wɔasane wɔ soro;

Ɛsɛ sɛ adansefoɔ hunu ananmusi asubɔ na wɔtwerɛ, sɛdeɛ wɔbɛtwerɛ no wɔ soro nso.

Nkyerɛkyerɛ ne Apam 128:8

Joseph Smith, wɔ krataa a ɔtwerɛ maa Ahotefoɔ no mu

Afei, saa ayɛyɛdeɛ fapem yi wɔ asɔfodie no tumi mu, nam Yesu Kristo adiyisɛm so, ɛno mu na wɔama ho kwan sɛ biribibiara a mobɛkyekyere wɔ asase so no wɔbɛkyekyere no wɔ soro, na biribibiara a mosane wɔ asase so no wɔbɛsane no wɔ soro. Anaa, nsɛm foforɔ mu no, sɛ yɛhwɛ no wɔ nkyereaseɛ foforɔ mu a, biribiara a mobɛtwerɛ wɔ asase so no wɔbɛtwerɛ no wɔ soro, na biribibiara a monntwerɛ wɔ asase so no wɔrenntwerɛ no wɔ soro; ɛfiri sɛ, nwoma no mu na wɔbɛbu mo awufoɔ atɛn, sɛdeɛ wɔn ankasa nnwuma teɛ, sɛ wɔnam wɔn ankasa nnipadua hwɛ yɛɛ ayɛyɛdeɛ no, anaa sɛ wɔnam wɔn ara ankasa wɔn ananmusifoɔ so, sɛdeɛ ayɛyɛdeɛ a Onyankopɔn asiesie ama wɔn nkwagyeɛ ansa na wɔrebɛto wiase fapem no teɛ, sɛdeɛ nwoma a wɔakora afa wɔn awufoɔ ho no teɛ.

Ayɛyɛdeɛ a wɔde asɔfodie tumidie atwerɛ wɔ asase so no, wɔatwerɛ wɔ soro, sɛ wɔn ankasa na wɔgyeeɛ anaa ɛyɛ ananmu.

Nkyerɛkyerɛ ne Apam 128:9

Joseph Smith, wɔ krataa a ɔtwerɛ maa Ahotefoɔ no mu

Ɛbinom bɛhunu no sɛ ɛyɛ akokoɔduro pa ara nkyerɛkyerɛ na yɛreka ho asɛm no—tumi a ɛtwerɛ anaa ɛkyekyere wɔ asase so na ɛkyekyere wɔ soro no. Nanso, wɔ wiase mmerɛ nyina ara mu no, berɛbiara a Awurade de asɔfodie no asɛmpa berɛ no ama onipa biara nam adiyisɛm ankasa so, anaa nnipa kuo biara no, wɔde saa tumi yi ma wɔn daa. Ɛno nti, biribibiara a saa nnipa yi yɛɛeɛ wɔ tumidie mu, wɔ Awurade din mu no, a wɔyɛɛ no nokorɛ ne nokorɛdie mu, na wɔkoraa yei ho twerɛtohɔ a ɛdi mũ na ɛyɛ nokorɛ no, ɛbɛyɛɛ mmara wɔ asase so ne soro, na wɔrenntumi mpepa, sɛdeɛ Yehowa kɛseɛ no mmara teɛ. Yei yɛ nokwasɛm. Hwan na ɔbɛtumi atie?

Wɔde tumi a ɛkyekyere wɔ asase so ne soro no ama wɔ asɛmpa berɛ biara mu, na twerɛtohɔ a ɛyɛ nokorɛ ma adwuma no kyekyere.

Na ɛbaa sɛ m’agya Lihae hunuu n’agya abusuasantene no nso wɔ yaawa mprɛte no so; ɛno nti ɔhunuu sɛ ɔyɛ Yosef aseni; aane, mpo saa Yosef no a ɔyɛ Yakob babarima no a wɔtɔnn no kɔɔ Misraim no, ɔno a Awurade de ne nsa koraa no, sɛdeɛ ɛbɛyɛ a ɔno nso bɛkora n’agya Yakob ne ne fiefoɔ sɛdeɛ ɛbɛyɛ a ɛkɔm nhye wɔn ase.

Lihae hunu n’abusua ntoatoasoɔ wɔ kɔbere nkrataa no mu na ohunu sɛ ɔfiri Yosef a ɔwɔ Misraim no mu.

Monhwɛ, me mmammarima, mepɛ sɛ mokae Onyankopɔn mmaransɛm no; na mepɛ sɛ moka saa nsɛm yi kyerɛ nkurɔfoɔ no. Monhwɛ, mede yɛn awofoɔ a wɔdi kan no a wɔfiri Yerusalem asaase so baaɛ no din ama mo; na meyɛɛ yei ama sɛ mokae mo din a moakae wɔn; na sɛ mokae wɔn a mobɛkae wɔn nwuma; na sɛ mokae wɔn nwuma a mobɛhunu sɛ wɔkaae, na wɔtwerɛɛe nso, sɛ na wɔyɛ nnipa papa.

Hilaman de nananom treneeni din too ne mma mmarima sɛdeɛ wɔn din a wɔbɛkae no bɛkae wɔn wɔn nananom papayɛ.

Afei saa nkɔmhyɛ yi na Adam hyɛɛe, berɛ a Sunsum Kronkron no hyɛɛ ne so no, na Onyankopɔn mma koraa anatoɔ. Na yei ne Adam awoɔntoatoasoɔ nwoma a ɛreka sɛ: Da a Onyankopɔn bɔɔ onipa no, Onyankopɔn nsɛsoɔ na ɔyɛɛ no;

Firi Adam berɛ so, wɔkoraa Onyankopɔn mma abusua ntoatoasoɔ, abusua twerɛtohɔ a ɛdi kan a wɔtwerɛeɛ.

Nanso agyanom no, mpo agya mpaninfoɔ no twerɛtohɔsɛm no a ɛfa Asɔfodie no hokwan, Awurade me Nyankopɔn koraa wɔ me ara ankasa nsam; ne saa nti nimdeɛ a ɛfa abɔdeɛ ahyɛaseɛ ho, ne akyinsoromma nso, ne nsoromma, sɛdeɛ, wɔdaa no adi kyerɛɛ agyanom no, makora mpo abɛsi saa da yi, na mɛbɔ mmɔden atwerɛ saa nneɛma yinom bi wɔ saa twerɛtohɔ yi so, ama ayɛ mfasoɔ ama m’asefoɔ a wɔbɛdi m’akyi aba no.

Abraham koraa n’agyanom twerɛtohɔ na ɔtwerɛ maa n’asefoɔ mfasoɔ.

Nkyerɛkyerɛ ne Apam 128:18

Joseph Smith, wɔ krataa a ɔtwerɛ maa Ahotefoɔ no mu

Anka mɛtumi ama nkyerɛaseɛ a ɛmu da hɔ ama yei, nanso ɛmu da hɔ yie a ɛbɛtumi afata me botae yi sɛdeɛ ɛteɛ yi. Ɛyɛ sɛ mobɛhunu, ɛfa saa asɛm yi ho, sɛ wɔde nnome bɛbɔ asase no gye sɛ wɔayɛ nsɔano a ɛmu yɛ den bi wɔ agyanom ne mma no ntam, wɔ asɛm bi ho anaa biribi foforɔ ho—na hwɛ deɛn ne saa asɛm yi? Ɛyɛ awufoɔ asubɔ, ɛfiri sɛ, sɛ wɔnnka yɛn ho a wɔrenntumi mma yɛnnyɛ pɛ; na saa ara nso na yɛnnka wɔn ho a ɛmma wɔnnyɛ pɛ. Na saa nso na wɔn anaa yɛn nntumi nnyɛ pɛ sɛ wɔn a wɔawu wɔ asɛmpa no mu no nso nnka ho a; ɛfiri sɛ ɛho hia ma mmerɛ mahyɛ no mu asɛmpa no nhyɛnmu no, saa asɛmpa berɛ a seesei ahyɛ aseɛ rehyɛn mu no, ama nkabom biara a ɛdi mu na ɛyɛ pɛ, ne asɛmpa mmerɛ nyina ara nsɔano, ne nsafoa, na animuonyam atumi aba, na wɔada no adi afiri Adam nna no mu mpo bɛsi saa berɛ yi. Na ɛnnyɛ yei nko ara, mmom nneɛma a wɔnnaa no adi da firi wiase fapem, na mmom wɔde asie anyansafoɔ ne mmadwemma no, wɔbɛda no adi akyerɛ mmotafowa ne nufomma, mmerɛ mahyɛ no mu asɛmpa.

Adwuma a yɛyɛ ma awufoɔ yɛ “nsɔano a ɛmu yɛ den” a ɛka awoɔ ntoatoasoɔ bom ma ɛyɛ nkabom baako a ɛyɛ pɛ.

Nkyerɛkyerɛ ne Apam 128:22

Joseph Smith, wɔ krataa a ɔtwerɛ maa Ahotefoɔ no mu

Anuanom, so yɛrennkɔ so wɔ saa dwumadie kɛseɛ yi mu? Monkɔ mo anim na ɛnnyɛ mo akyi. Monnya akokoɔduro, anuanom; na monkɔso, nkɔdi nkonim! Momma mo akoma nni ahurusie, na mo ani nnye pa ara! Momma asase nhyɛ aseɛ nto dwom! Momma awufoɔ nto ayeyie a ɛnni awieɛ nnwom mma Ɔhene Immanuel, ɔno a, ansa na wɔreyɛ wiase no, wɔahyehyɛ deɛ ɛbɛboa yɛn ma yɛagye wɔn afiri wɔn afiase no; ɛfiri sɛ nneduafoɔ bɛde wɔn ho.

Joseph Smith frɛ wɔ anigyeɛ mu sɛ yɛnkɔ yɛn anim wɔ awufoɔ gyeɛ mu, ɛfiri sɛ nneduafoɔ bɛde wɔn ho.

Nkyerɛkyerɛ ne Apam 128:24

Joseph Smith, wɔ krataa a ɔtwerɛ maa Ahotefoɔ no mu

Hwɛ, Awurade da kɛseɛ no abɛn; na hwan na ɔbɛtumi agyina ne mmaeɛ da no ano, na hwan na sɛ ɔpue a ɔbɛtumi agyina? Ɛfiri sɛ ɔte sɛ ɔnanefoɔ gya, ne ntomasifoɔ samina; na ɔbɛtena ase tesɛ ɔnanefoɔ a ɔte dwetɛ ho, na ɔbɛte Lewi mma mmarima no ho, na wayiyi wɔn mu tesɛ sika kɔkɔɔ ne dwetɛ, ama wɔatumi abɔ tenenee afɔdeɛ ama Awurade. Ne saa nti, momma, yɛn a yɛyɛ asɔre ne nnipa kuo, ne Nna a Ɛdi Akyire Ahoteɛfoɔ no, mmɔ afɔdeɛ mma Awurade wɔ tenenee mu; na momma yɛmfa nwoma a ɛkura yɛn awufoɔ twerɛtohɔ a ɛfata nkamfoɔ nyina ara no nkɔ ne tɛmpol kronkron no mu, berɛ a wɔbɛwie no.

Wɔto nsa frɛ Ahotefoɔ no sɛ wɔmfa nwoma a ɛfata a ɛkura wɔn awufoɔ twerɛtohɔ nkɔ tɛmpol mu.