Kwa nini tunafanya historia ya familia

3 Nefi 25:5–6

Yesu Kristo, akiwanukulia Wanefi maneno ya Malaki

Tazama, nitawatumia Eliya nabii kabla ya kuja kwa ile siku kubwa na ya kutisha ya Bwana. Na atageuza mioyo ya baba iwaelekee watoto, na mioyo ya watoto iwaelekee baba zao, nisije na kupiga dunia na laana.

Mwokozi aliyefufuka anarudia ahadi ya Malaki kuhusu Eliya kwa watu wa Amerika, akionyesha umuhimu wake.

Tazama, nitaufunua kwenu Ukuhani, kwa mkono wa Eliya, nabii, kabla ya kuja kwa siku ile kuu na ya kutisha ya Bwana. Naye atapandikiza katika mioyo ya watoto ahadi zilizofanywa kwa baba, na mioyo ya watoto itawageukia baba zao. Kama si hivyo, dunia yote ingeliangamia kabisa wakati wa kuja kwake.

Maneno ya Moroni kuhusu unabii wa Malaki: Eliya angerejesha mamlaka ya ukuhani na kupanda katika mioyo ya watoto ahadi zilizofanywa kwa baba zao.

Joseph Smith—Historia ya 1:38–39

Joseph Smith, akisimulia maneno ya Moroni

Na tena, alinukuu mstari wa tano hivi: Tazama, nitakufunulieni Ukuhani, kwa mkono wa Eliya nabii, kabla ya kuja kwa siku ile iliyo kuu na ya kuogofya ya Bwana. Na pia alinukuu mstari unaofuata tofauti: Naye atapanda katika mioyo ya watoto ahadi zilizofanywa kwa baba, na mioyo ya watoto itawageukia baba zao. Kama haingekuwa hivyo, dunia yote ingeliharibiwa kabisa wakati wa kuja kwake.

Simulizi ya Joseph Smith kuhusu Moroni akimnukulia unabii wa Malaki juu ya Eliya mwaka 1823.

Baada ya ono hili kufungwa, ono jingine kubwa na tukufu likatukia juu yetu; kwani Eliya nabii, aliyechukuliwa mbinguni bila ya kuonja mauti, alisimama mbele yetu, na kusema: Tazama, wakati umetimia kikamilifu, ambao ulinenwa kwa kinywa cha Malaki—ukishuhudia kwamba yeye [Eliya] lazima atatumwa, kabla ya kuja kwa siku ile iliyo kuu na ya Bwana— Kuigeuza mioyo ya baba iwaelekee watoto, na ya watoto iwaelekee mababu, dunia yote isije ikapigwa kwa laana— Kwa hiyo, funguo za kipindi hiki zimekabidhiwa mikononi mwenu; na kwa hili ninyi mpate kujua kwamba siku ile iliyo kuu na ya kutisha ya Bwana i karibu, hata milangoni.

Eliya anatokea katika Hekalu la Kirtland mwaka 1836 na kuwakabidhi Joseph Smith na Oliver Cowdery funguo za kazi hii.

Mafundisho na Maagano 98:16

Bwana, kupitia Joseph Smith

Kwa hiyo, ikataeni vita na tangazeni amani, na tafuteni kwa bidii kuigeuza mioyo ya watoto kuwaelekea baba zao, na mioyo ya baba iwaelekee watoto wao;

Bwana anawaagiza Watakatifu kufanya kazi kwa bidii ili kuigeuza mioyo ya watoto na ya baba iwaelekee wenzao.

Mafundisho na Maagano 138:47–48

Joseph F. Smith, akieleza ono lake la wafu

Nabii Eliya alikuwa apande katika mioyo ya watoto ahadi zilizofanywa kwa baba zao. Ikionyeshwa dalili ya kazi kuu itakayofanyika katika mahekalu ya Bwana katika kipindi cha utimilifu wa nyakati, kwa ajili ya ukombozi wa wafu, na kuwafunga watoto kwa wazazi wao, isije dunia yote ikapigwa kwa laana na kuharibiwa kabisa wakati wa kuja kwake.

Utume wa Eliya ulionyesha mapema kazi ya hekaluni kwa ajili ya wafu na kuunganishwa kwa watoto na wazazi wao.

Sasa, kuhusu hali ya roho kati ya kifo na ufufuo—Tazama, nimejulishwa na malaika, kwamba roho za watu wote, mara zinapotoka kwa mwili huu wa muda, ndiyo, roho za watu wote, zikiwa njema au ovu, zinachukuliwa nyumbani kwa yule Mungu ambaye alizipatia uhai. Na ndipo itakuja kuwa kwamba roho za wale walio haki zinapokelewa kwa hali ambayo ni ya furaha, ambayo inaitwa peponi, hali ya kupumzika, hali ya amani, ambapo zitapumzikia kutoka kwa taabu zao zote na kutoka kwa mashaka yote, na masikitiko.

Alma anafundisha kwamba roho huendelea kuishi baada ya kifo, na wenye haki huingia katika hali ya pumziko iitwayo paradiso.

Mafundisho na Maagano 137:7–9

Bwana, katika ono kwa Joseph Smith

Na hivyo sauti ya Bwana ikanijia ikisema: Wote waliokufa bila kuifahamu injili hii, ambao wangeliipokea kama wangeruhusiwa kuishi, watakuwa warithi wa ufalme wa selestia wa Mungu; Pia wale wote watakaokufa sasa na kuendelea bila kuifahamu, ambao wangeliipokea kwa moyo wao wote, watakuwa warithi wa ufalme huo; Kwani Mimi, Bwana, nitawahukumu watu wote kulingana na matendo yao, kulingana na tamaa za mioyo yao.

Wale waliokufa bila kuisikia injili lakini ambao wangeipokea hawatengwi; Mungu huhukumu kwa matamanio ya moyo.

Mafundisho na Maagano 138:11

Joseph F. Smith, akieleza ono lake la wafu

Nilipokuwa nikitafakari juu ya mambo haya ambayo yameandikwa, macho yangu ya ufahamu yakafunguliwa, na Roho wa Bwana akatulia juu yangu, na nikaona jeshi la waliokufa wote, wadogo na wakubwa.

Ono la Rais Joseph F. Smith la mwaka 1918 la ulimwengu wa roho linaanza anapotafakari maandiko.

Mafundisho na Maagano 138:30

Joseph F. Smith, akieleza ono lake la wafu

Bali tazama, kutoka miongoni mwa wenye haki, aliunda jeshi lake na akawateua wajumbe, waliovikwa uwezo na mamlaka, na akawapa mamlaka ya kwenda na kupeleka nuru ya injili kwa wao ambao walikuwa gizani, hata kwa roho zote za wanadamu; na hivyo ndivyo injili ilivyohubiriwa kwa wafu.

Mwokozi aliziunda roho zenye haki ili kuipeleka injili kwa wafu wote.

Mafundisho na Maagano 138:32–34

Joseph F. Smith, akieleza ono lake la wafu

Hivyo ndivyo injili ilivyo hubiriwa kwa wale ambao walikufa katika dhambi zao, pasipo ufahamu wa ukweli, au katika uvunjaji wa sheria, wakiwa wamewakataa manabii. Hawa walifundishwa imani kwa Mungu, toba ya dhambi, ubatizo ufanywa kwa niaba ya wafu kwa ajili ya ondoleo la dhambi, kipawa cha Roho Mtakatifu kwa kuwekewa mikono; Na kanuni nyingine zote za injili ambazo zilikuwa muhimu kwao kuzijua ili kujithibitishia wenyewe kwamba waweze kuhukumiwa kulingana na wanadamu katika mwili, lakini waishi kulingana na Mungu katika roho.

Roho katika ulimwengu wa roho hufundishwa injili kamili, ikiwemo ubatizo kwa niaba.

Mafundisho na Maagano 138:53–54

Joseph F. Smith, akieleza ono lake la wafu

Nabii Joseph Smith, na baba yangu, Hyrum Smith, Brigham Young, John Taylor, Wilford Woodruff, na roho wengine wateule ambao walihifadhiwa ili kuja katika kipindi cha utimilifu wa nyakati kushiriki katika kuweka misingi ya kazi kuu ya siku za mwisho, Pamoja na ujenzi wa mahekalu na utekelezaji wa ibada zake kwa ajili ya ukombozi wa wafu, walikuwa pia katika ulimwengu wa roho.

Roho teule zilihifadhiwa ili kuweka misingi ya kazi ya siku za mwisho, ikiwemo mahekalu na ibada kwa ajili ya wafu.

Mafundisho na Maagano 138:57–59

Joseph F. Smith, akieleza ono lake la wafu

Niliona kwamba wazee waaminifu wa kipindi hiki, wakati wakiondoka kutoka maisha katika mwili wenye kufa, huendelea na kazi zao katika kuhubiri injili ya toba na ukombozi, kupitia dhabihu ya Mwana Pekee wa Mungu, miongoni mwa wale walio gizani, na chini ya utumwa wa dhambi katika ulimwengu mkuu wa roho za wafu. Wafu wanaotubu watakombolewa, kwa njia ya utii kwa ibada za nyumba ya Mungu. Na baada ya kulipia adhabu ya uvunjaji wao wa sheria, na kuoshwa safi, watapokea thawabu kulingana na matendo yao, kwa kuwa wao ni warithi wa wokovu.

Waaminifu huendelea kufundisha baada ya kifo, na wafu wanaotubu hukombolewa kupitia ibada za hekaluni.

Na roho nyingi zilizokuwa kifungoni zilitoka, na kusimama mkono wa kuume wa Mungu; na waliosalia walihifadhiwa katika minyororo ya giza hadi hukumu ya ile siku iliyo kuu.

Katika ono la Henoko, roho zilizo kifungoni zinakuja kwenye mkono wa kuume wa Mungu kuhusiana na kazi ya Mwokozi.

Mafundisho na Maagano 124:29–30

Bwana, kupitia Joseph Smith

Kwani kisima cha ubatizo hakiko juu ya dunia, ili wao, watakatifu wangu, waweze kubatizwa kwa ajili ya wale waliokufa— Kwani ibada hii ni mali ya nyumba yangu, na haiwezi kukubaliwa kwangu, isipokuwa tu katika siku ya ufukara wenu, ambapo hamna uwezo wa kunijengea nyumba.

Bwana anatangaza kwamba ubatizo kwa ajili ya wafu ni wa hekalu Lake.

Mafundisho na Maagano 128:5

Joseph Smith, katika barua kwa Watakatifu

Ninyi pengine mnaweza kudhani utaratibu huu wa mambo kuwa ni mrefu sana; lakini acha niwaeleze ya kuwa hii ni kujibu tu mapenzi ya Mungu, kwa kufuata maagizo na matayarisho ambayo Bwana ameagiza na kutayarisha kabla ya kuwekwa kwa msingi wa ulimwengu, kwa ajili ya wokovu wa wafu ambao watakufa bila kuifahamu injili.

Wokovu kwa ajili ya wale waliokufa bila injili ulipangwa kabla ya ulimwengu kuumbwa.

Mafundisho na Maagano 128:15

Joseph Smith, katika barua kwa Watakatifu

Na sasa, wapendwa ndugu na dada zangu, acheni nikuhakikishieni kwamba kanuni hizi zihusianazo na wafu na walio hai kwamba haziwezi kupuuzwa, kwa vile zinahusu wokovu wetu. Kwa kuwa wokovu wao ni wa lazima na ni muhimu kwa wokovu wetu, kama vile Paulo asemavyo juu ya mababu—kwamba wao pasipo sisi hawakamiliki—wala sisi hatuwezi kuwa wakamilifu pasipo wafu wetu.

Wokovu wetu na wokovu wa mababu zetu umefungamana; hakuna unaoweza kukamilika bila mwingine.

Mafundisho na Maagano 132:46

Bwana, kupitia Joseph Smith

Na amini, amini, ninakuambia, kwamba lolote utakalolifunga duniani litakuwa limefungwa mbinguni; na lolote utakalolifunga duniani, katika jina langu na kwa neno langu, asema Bwana, litakuwa limefungwa milele mbinguni; na dhambi zozote utakazozisamehe duniani zitakuwa zimesamehewa milele mbinguni; na dhambi zozote mtakazo ziacha pasipo msamaha duniani zitakuwa hazina msamaha mbinguni.

Bwana anathibitisha kwamba kile kinachounganishwa duniani kwa mamlaka Yake huunganishwa milele mbinguni.

Mafundisho na Maagano 127:6–7

Bwana, katika barua ya Joseph Smith

Amini, hivyo ndivyo asemavyo Bwana kwenu ninyi juu ya wafu wenu: Wakati mmoja wenu abatizwapo kwa ajili ya wafu wenu, acha awepo na mwandishi, naye awe shahidi wa macho wa ubatizo wenu; acha asikie kwa masikio yake, ili apate kuishuhudia kweli, asema Bwana; Ili kumbukumbu zenu zote zipate kuandikwa mbinguni; lolote mtakalolifunga duniani, litakuwa limefungwa mbinguni; na lolote mtakalolifungua duniani, litakuwa limefunguliwa mbinguni;

Ubatizo kwa niaba lazima ushuhudiwe na kuandikwa ili pia uandikwe mbinguni.

Mafundisho na Maagano 128:8

Joseph Smith, katika barua kwa Watakatifu

Sasa, kiini cha ibada hii kinategemea katika uwezo wa ukuhani, kupitia ufunuo wa Yesu Kristo, ambao ndani yake imetolewa kwamba lolote utakalolifunga duniani litafungwa mbinguni, na lolote utakalolifungua duniani litafunguliwa mbinguni. Au, kwa maneno mengine, mtazamo tofauti wa tafsiri hii, lolote utakaloliandika duniani litaandikwa mbinguni, na lolote usiloliandika duniani halitaandikwa mbinguni; kwani kutoka kwenye vitabu wafu wenu watahukumiwa, kulingana na matendo yao wenyewe, iwe wao wenyewe wametenda ibada hizo wao wenyewe, au kwa njia ya wawakilishi wao, kulingana na agizo ambalo Mungu amelitayarisha kwa ajili ya wokovu wao tangu kabla ya kuwekwa msingi wa dunia, kulingana na kumbukumbu walizoziandika juu ya wafu wao.

Ibada zinazoandikwa duniani kwa mamlaka ya ukuhani huandikwa mbinguni, ziwe zimepokelewa ana kwa ana au kwa niaba.

Mafundisho na Maagano 128:9

Joseph Smith, katika barua kwa Watakatifu

Yawezekana kwa wengine ikaonekana ni mafundisho yasiyo ya kawaida ambayo tunayazungumzia—uwezo ambao huandika au kufunga duniani na kufungwa mbinguni. Hata hivyo, katika umri wote wa ulimwengu, wakati wowote Bwana alipokuwa ametoa kipindi cha ukuhani kwa mtu yeyote kwa ufunuo halisi, au kwa kundi lolote la wanadamu, uwezo huu daima umekuwa ukitolewa. Kwa sababu hiyo, lolote watu wale walilolifanya katika mamlaka, katika jina la Bwana, na wakalifanya kwa ukweli na kwa uaminifu, na kutunza kwa usahihi na uaminifu kumbukumbu hiyo, ikaja kuwa sheria duniani na mbinguni, na haikuweza kuondolewa, kulingana na maamrisho ya Yehova mkuu. Hili ni neno la kuaminiwa. Ni nani awezaye kulisikia?

Uwezo wa kufunga duniani na mbinguni umetolewa katika kila kipindi, na kumbukumbu za uaminifu huifanya kazi iwe yenye kufunga.

Na ikawa kwamba baba yangu, Lehi, pia alipata kwenye mabamba ya shaba nyeupe nasaba ya babu zake; kwa hivyo akajua kwamba yeye ni wa kizazi cha Yusufu; ndiyo, hata yule Yusufu, ambaye alikuwa mwana wa Yakobo, ambaye aliuzwa Misri, na ambaye alihifadhiwa kwa mkono wa Bwana, ili amhifadhi baba yake, Yakobo, na wote wa jamii yake wasiangamie kwa njaa.

Lehi anagundua nasaba yake katika mabamba ya shaba na anajifunza kwamba ametokana na Yusufu wa Misri.

Tazama, wana wangu, ninataka kwamba mtii amri za Mungu; na ningetaka kwamba mwatangazie watu maneno haya. Tazama, nimewapatia majina ya wazazi wetu wa kwanza ambao walitoka nchi ya Yerusalemu; na nimefanya hivi ili mnapokumbuka majina yenu mtaweza kuwakumbuka; na mnapowakumbuka mngekumbuka kazi zao; na mkikumbuka kazi zao mngejua jinsi ilivyo semwa, na pia kuandikwa, kwamba walikuwa wema.

Helamani aliwapa wanawe majina ya mababu wenye haki ili kuyakumbuka majina yao kuwakumbushe wema wa mababu zao.

Sasa unabii huu Adamu aliusema, kama alivyoongozwa na Roho Mtakatifu, na historia ya nasaba ya watoto wa Mungu iliandikwa. Na hiki kilikuwa kitabu cha vizazi vya Adamu, kikisema: Katika siku ile ambayo Mungu alipoumba mtu, kwa mfano wa Mungu alimuumba;

Tangu siku za Adamu nasaba ya watoto wa Mungu ilitunzwa, kumbukumbu ya kwanza ya familia iliyoandikwa.

Lakini kumbukumbu za mababu, hata mapatriaki, juu ya haki ya Ukuhani, Bwana Mungu wangu alizihifadhi mikononi mwangu mimi mwenyewe; kwa hiyo ufahamu wa mwanzo wa uumbaji, na pia wa sayari, na wa nyota, kama zilivyojulikana kwa mababu, nimezitunza hadi siku hii, nami nitajaribu kuandika baadhi ya mambo haya juu ya kumbukumbu hii, kwa manufaa ya wazao wangu watakaokuja baada yangu.

Ibrahimu alihifadhi kumbukumbu za mababu zake na aliandika kwa manufaa ya uzao wake.

Mafundisho na Maagano 128:18

Joseph Smith, katika barua kwa Watakatifu

Ningeweza kufanya tafsiri ya wazi ya hii, lakini ni wazi vya kutosha kukidhi madhumuni yangu kama vile ilivyo. Yatosha kujua, katika jambo hili, kwamba dunia itapigwa kwa laana isipokuwa pamekuwepo na muunganiko wa aina fulani kati ya mababu na watoto, juu ya jambo moja au jingine—na tazama jambo hilo ni lipi? Ni ubatizo kwa ajili ya wafu. Kwani sisi pasipo wao hatuwezi kukamilika; wala wao pasipo sisi hawawezi kukamilika. Si wao wala sisi tunaoweza kukamilika bila wale waliokufa katika injili pia; kwani ni muhimu katika kuingia kwa kipindi cha utimilifu wa nyakati, kipindi ambacho sasa kinaanza kuingia, kwamba muungano wote mzima na ulio mkamilifu, na muunganiko wa pamoja wa vipindi, na funguo, na uwezo, na utukufu yapaswa ufanyike, na kufunuliwa kutoka siku za Adamu hadi wakati huu. Na siyo hili tu, bali mambo yale ambayo kamwe hayajafunuliwa kutoka kuwekwa kwa msingi wa ulimwengu, lakini yamefichwa kwa wenye hekima na akili, yatafunuliwa kwa watoto wachanga na wanyonyao katika hiki, kipindi cha utimilifu wa nyakati.

Kazi kwa ajili ya wafu ndiyo “muunganiko” unaoviunganisha vizazi kuwa muungano mmoja mkamilifu.

Mafundisho na Maagano 128:22

Joseph Smith, katika barua kwa Watakatifu

Ndugu, je, si lazima sisi tuendelee katika kazi hii iliyo kuu? Twende mbele na siyo nyuma. Tuweni wajasiri, ndugu; na mbele, mbele kwenye ushindi! Acheni mioyo yenu ifurahi, na kuwa na furaha kupita kiasi. Acheni nchi ipasuke kwa kuimba. Acheni wafu waimbe nyimbo za sifa ya milele kwa Mfalme Imanueli, aliyeagiza, kabla ya ulimwengu kuwepo, kile ambacho kingetuwezesha sisi kuwakomboa kutoka kifungoni mwao; kwani wafungwa watawekwa huru.

Mwito wa furaha wa Joseph Smith wa kusonga mbele katika kuwakomboa wafu, kwani wafungwa watawekwa huru.

Mafundisho na Maagano 128:24

Joseph Smith, katika barua kwa Watakatifu

Tazama, siku iliyo kuu ya Bwana i karibu; na ni nani atakaye stahimili siku ya kuja kwake, na ni nani atakayesimama wakati atakapoonekana? Kwa maana yeye ni mfano wa moto wa mtu asafishaye, na mfano wa sabuni ya mtu afuaye; naye ataketi kama mtu asafishaye fedha, naye atawasafisha wana wa Lawi, na atawasafisha kama dhahabu na fedha, ili wapate kutoa kwa Bwana dhabihu katika haki. Kwa hiyo, sisi, kama kanisa na watu, na kama Watakatifu wa Siku za Mwisho, tumtolee Bwana dhabihu katika haki; nasi tuonyeshe katika hekalu lake takatifu wakati litakapomalizika, kitabu chenye kumbukumbu za wafu wetu, ambacho kitastahili kukubalika kote.

Watakatifu wanaalikwa kuonyesha katika hekalu kitabu kinachostahili chenye kumbukumbu za wafu wao.