Impamvu dukora amateka y’umuryango

3 Nefi 25:5–6

Yesu Kristo, asubiramo amagambo ya Malaki abwira Abanefi

Dore, nzaboherereza Eliya w’umuhanuzi mbere y’ukuza kw’umunsi ukomeye kandi uteye ubwoba wa Nyagasani. Kandi azagarurira umutima wa ba se ku bana, n’umutima w’abana kuri ba se, ngo hato ntazaza maze ngakubitisha isi umuvumo.

Umukiza wazutse asubiramo isezerano rya Malaki ryerekeye Eliya ku bantu bo muri Amerika, bigaragaza akamaro karyo.

Dore, nzabahishurira Ubutambyi, nkoresheje ukuboko kw’umuhanuzi Eliya, mbere y’uko umunsi ukomeye kandi uteye ubwoba wa Nyagasani ugera. Kandi azatera mu mitima y’abana amasezerano yakorewe abasogokuruza, kandi imitima y’abana izahindukirire abasogokuruza babo. Bitabaye bityo, isi uko yakabaye yazahinduka itongo aje.

Uko Moroni yavuze amagambo ya Malaki: Eliya yari kugarura ubushobozi bw’ubutambyi no gutera mu mitima y’abana amasezerano yakorewe ba sekuruza.

Joseph Smith—Amateka:38–39

Joseph Smith, asubiramo amagambo ya Moroni

Kandi byongeye, yasubiyemo umurongo wa gatanu atya: Dore, nzabahishurira Ubutambyi, nkoresheje ukuboko kw’umuhanuzi Eliya, mbere y’ukuza k’umunsi ukomeye kandi uteye ubwoba wa Nyagasani. Kandi yasubiyemo umurongo ukurikiyeho mu buryo butandukanye ati: Kandi azatera mu mitima y’abana amasezerano yahawe ba se, kandi imitima y’abana izahindukirira ba se. Bitabaye bityo, isi uko yakabaye yazahinduka itongo igihe cy’ukuza kwe.

Inkuru ya Joseph Smith ivuga uko Moroni yamusubiriyemo ubuhanuzi bwa Malaki bwerekeye Eliya mu 1823.

Nyuma y’uko iri yerekwa ryari rimaze gufungwa, irindi yerekwa rikomeye kandi ryuzuye ikuzo ryaduturikiyeho; kuko Umuhanuzi Eliya, watwawe mu ijuru adasogongeye ku rupfu, yaduhagaze imbere, maze aravuga ati: Dore, igihe kiraje byuzuye, cyavuzwe n’akanwa ka Malaki—ahamya ko (Eliya) azoherezwa, mbere y’uko umunsi ukomeye kandi uteye ubwoba ugera— Kugira ngo ahindukirize imitima y’abasogokuruza ku bana, n’imitima y’abana ku basogokuruza, ngo hato isi uko yakabaye itazakubitwa n’umuvumo— Kubera iyo mpamvu, imfunguzo z’ubu busonga zishyizwe mu biganza byanyu; kandi kubw’ibi mushobora kumenya ko umunsi ukomeye kandi uteye ubwoba wa Nyagasani uri hafi, ndetse ku miryango.

Eliya abonekera mu Ngoro ya Kirtland mu 1836 maze aragiza Joseph Smith na Oliver Cowdery imfunguzo z’uyu murimo.

Inyigisho n’Ibihango 98:16

Nyagasani, abinyujije kuri Joseph Smith

Kubera iyo mpamvu, nimwamagane intambara kandi mutangaze amahoro, kandi mushakishe n’umwete kugarura imitima y’abana ku babyeyi, n’imitima y’ababyeyi ku bana;

Nyagasani ategeka Abera gukorana umwete mu guhindukiza imitima y’abana n’iy’ababyeyi ngo bareberane.

Inyigisho n’Ibihango 138:47–48

Joseph F. Smith, asobanura ibonekerwa rye ry’abapfuye

Umuhanuzi Eliya yagomba gutera mu mitima y’abana amasezerano yakorewe abasogokuruza babo, Byerekanaga umurimo ukomeye ugomba gukorerwa mu ngoro za Nyagasani mu busonga bw’ubusendere bw’ibihe, kubw’ugucungurwa kw’abapfuye, n’ukomekanywa kw’abana ku babyeyi babo, ngo hato isi uko yakabaye idakubitwa n’umuvumo maze ikononekara ku ukuza kwe.

Umurimo wa Eliya washushanyaga umurimo w’ingoro ukorerwa abapfuye n’ukomekanywa kw’abana ku babyeyi babo.

Ubu, ku birebana n’imiterere ya roho hagati y’urupfu n’umuzuko—Dore, nabimenyeshejwe n’umumarayika, ko roho z’abantu bose, bakiva muri uyu mubiri upfa, koko, roho z’abantu bose, zaba nziza cyangwa mbi, zijyanwa iwabo kuri iyo Mana yabahaye ubuzima. Nuko noneho hakazabaho, ko roho z’abakiranutsi bakirwa mu miterere y’ibyishimo, aricyo cyitwa paradizo, imiterere y’iruhukiro, imiterere y’amahoro, aho bazaruhukira imidugararo yabo yose n’impungenge zose, n’ishavu.

Alima yigisha ko roho zikomeza kubaho nyuma y’urupfu, kandi abakiranutsi binjira mu buruhukiro bwitwa paradizo.

Inyigisho n’Ibihango 137:7–9

Nyagasani, mu ibonekerwa yahaye Joseph Smith

Nuko najweho n’ijwi rya Nyagasani, rivuga riti: Abapfuye bose bataramenya iyi nkuru nziza, bari kuba barayakiriye iyo bari kuba baremerewe guhamaho, bazaba abaragwa b’ubwami selestiyel bw’Imana; Kandi nanone abazapfa bose uhereye ubu n’ahazaza batarabumenya, bakaba bari kuba barabwakiriye n’imitima yabo yose, bazaba abaragwa b’ubwo bwami; Kuko njyewe, Nyagasani, nzacira urubanza abantu bose bijyanye n’imirimo yabo, bijyanye n’icyifuzo cy’imitima yabo.

Abapfuye batumvise inkuru nziza ariko bari kuyakira ntibahezwa; Imana icira imanza ikurikije ibyifuzo by’umutima.

Inyigisho n’Ibihango 138:11

Joseph F. Smith, asobanura ibonekerwa rye ry’abapfuye

Uko natekerezaga byimbitse kuri ibi bintu byanditswe, amaso y’imyumvire yanjye yarahumutse, maze Roho wa Nyagasani anzaho, nuko mbona ibihiriri by’abapfuye, haba aboroshye n’abakomeye.

Ibonekerwa ry’Umuyobozi Joseph F. Smith ryo mu 1918 ry’isi ya roho ritangira igihe atekereza byimbitse ku byanditswe bitagatifu.

Inyigisho n’Ibihango 138:30

Joseph F. Smith, asobanura ibonekerwa rye ry’abapfuye

Ariko dore, avuye mu bakiranutsi, yashyizeho imbaraga ze kandi ashyiraho intumwa, zambaye ububasha n’ubushobozi, kandi abashinga kujya imbere no gushyira urumuri rw’inkuru nziza abari mu mwijima, ndetse roho zose z’abantu, kandi iyo niyo inkuru nziza yabwirijwe abapfuye.

Umukiza yashyize kuri gahunda roho z’abakiranutsi ngo zijyane inkuru nziza ku bapfuye bose.

Inyigisho n’Ibihango 138:32–34

Joseph F. Smith, asobanura ibonekerwa rye ry’abapfuye

Ni uko inkuru nziza yabwirijwe abari barapfiriye mu byaha byabo, nta bumenyi bw’ukuri, cyangwa mu gicumuro, kubera ko bahakanye abahanuzi. Aba bigishijwe kwizera Imana, kwihana icyaha, umubatizo mu kigwi cy’undi kubw’ukubabarirwa ibyaha, impano ya Roho Mutagatifu kubw’ukurambikwaho ibiganza, N’andi mahame yose y’inkuru nziza bari bakeneye kumenya kugira ngo babe bakwiriye ko bashobora gucirwa urubanza bijyanye n’abantu mu mubiri, ahubwo babeho bakurikiza Imana muri roho.

Roho zo mu isi ya roho zigishwa inkuru nziza yuzuye, harimo n’umubatizo mu kigwi cy’undi.

Inyigisho n’Ibihango 138:53–54

Joseph F. Smith, asobanura ibonekerwa rye ry’abapfuye

Umuhanuzi Joseph Smith, na data, Hyrum Smith, Brigham Young, John Taylor, Wilford Woodruff, nabo bari mu isi ya roho hamwe n’izindi roho z’intore zari zarateganyirijwe kuzaza mu busendere bw’ibihe kugira ngo zigire uruhare mu gushyiraho urufatiro rw’umurimo ukomeye w’umunsi wa nyuma, Urimo kubaka ingoro n’ugukorerwamo imigenzo kubw’ugucungurwa kw’abapfuye, byariho no mu isi ya roho.

Roho zatoranyijwe zabikiwe gushyiraho imfatiro z’umurimo wo mu minsi ya nyuma, harimo ingoro n’imigenzo y’abapfuye.

Inyigisho n’Ibihango 138:57–59

Joseph F. Smith, asobanura ibonekerwa rye ry’abapfuye

Nabonye ko abakuru bakiranutse b’ubu busonga, igihe bavuye muri ubu buzima bupfa, bakomeza imirimo yabo babwiriza iby’inkuru nziza y’ukwihana n’ugucungurwa, binyuze mu gitambo cy’Umwana w’Ikinege w’Imana, mu bari mu mwijima kandi mu buretwa bw’icyaha mu isi ikomeye ya roho z’abapfuye. Abapfuye bihana bazacungurwa, binyuze mu kumvira imigenzo y’inzu y’Imana, Kandi nyuma y’uko batanze icyiru cy’ibicumuro byabo, kandi basukuwe, bazakira ingororano bijyanye n’imirimo yabo, kuko ari abaragwa b’agakiza.

Abizerwa bakomeza kwigisha nyuma y’urupfu, kandi abapfuye bihana bacungurwa binyuze mu migenzo y’ingoro.

Kandi roho nyinshi zari mu nzu y’imbohe zayivuyemo, nuko bahagarara iburyo bw’Imana; maze abasigayemo bashyirwa mu minyururu y’umwijima kugeza ku rubanza rw’umunsi ukomeye.

Mu ibonekerwa rya Henoki, roho ziri mu nzu y’imbohe zigera iburyo bw’Imana bijyanye n’umurimo w’Umukiza.

Inyigisho n’Ibihango 124:29–30

Nyagasani, abinyujije kuri Joseph Smith

Kuko ikidendezi cy’umubatizo ntaho kiri ku isi, kugira ngo abera banjye bashobore kubatizwa kubw’abapfuye— Kuko uyu mugenzo ari umwihariko ku nzu yanjye, kandi ntushobora kwemerwa imbere yanjye, keretse mu minsi y’ubukene bwanyu, aho mutashobora kunyubakira inzu.

Nyagasani atangaza ko umubatizo kubw’abapfuye ukwiye gukorerwa mu ngoro ye.

Inyigisho n’Ibihango 128:5

Joseph Smith, mu ibaruwa yandikiye Abera

Mushobora gutekereza ko iyi mikorere y’ibintu yihariye, ariko nimureke mbabwire ko ari icyo gisubizo cyonyine ku gushaka kw’Imana, twubahiriza umugenzo n’umwiteguro Nyagasani yashyizeho kandi yateguye mbere y’iremwa ry’isi, kubw’agakiza k’abapfuye bashobora kuba barapfuye bataramenye inkuru nziza.

Agakiza k’abapfuye bataramenye inkuru nziza kateguwe mbere y’iremwa ry’isi.

Inyigisho n’Ibihango 128:15

Joseph Smith, mu ibaruwa yandikiye Abera

Kandi ubu, bavandimwe banjye nkunda cyane, ndabizeza ko aya ari amahame yerekeranye n’abapfuye n’abazima adashobora kwirengagizwa byoroshye, kuko arebana n’agakiza kacu. Kuko agakiza kabo ni ngombwa kandi ni ingirakamaro ku gakiza kacu, nk’uko Pawulo avuga ibyerekeranye na ba sogokuruza—ko bo batadufite badashobora kugirwa intungane—nta n’ubwo natwe tudafite abapfuye bacu twagirwa intungane.

Agakiza kacu n’ak’abakurambere bacu bifitanye isano; nta na kimwe kigirwa intungane hatariho ikindi.

Inyigisho n’Ibihango 132:46

Nyagasani, abinyujije kuri Joseph Smith

Kandi ni ukuri, ni ukuri, ndakubwira, ko icyo ari cyo cyose uhambiriye ku isi kizahambirwa mu ijuru; kandi icyo aricyo cyose uhambiriye mu isi, mu izina ryanjye no kubw’ijambo ryanjye, niko Nyagasani avuga, kizahambirwa ubuziraherezo mu majuru; kandi ibyaha ibyo aribyo byose muzababarira ku isi bizababarirwa ubuziraherezo mu majuru; kandi ibyaha ibyo aribyo byose mutazababarira ntibizababarirwa mu ijuru.

Nyagasani yemeza ko icyomekanyijwe ku isi ku bw’ubushobozi bwe cyomekanywa iteka mu ijuru.

Inyigisho n’Ibihango 127:6–7

Nyagasani, mu ibaruwa ya Joseph Smith

Ni ukuri, ni uko Nyagasani ababwira ku byerekeye abapfuye banyu: Igihe uwo ariwe wese muri mwe abatijwe kubw’uwapfuye wanyu, hajye haba umwanditsi, kandi abe umuhamya w’imbona nkubone w’imibatizo yanyu; yumvishe amatwi ye, kugira ngo ahamye iby’ukuri, niko Nyagasani avuga. Kugira ngo ibyerekeye inyandiko zanyu zose byandikwe mu ijuru, icyo aricyo cyose muhambiriye ku isi, gihambirwe mu ijuru, icyo aricyo cyose muhambuye ku isi, gihamburwe mu ijuru.

Imibatizo ikorwa mu kigwi cy’abandi igomba kugira abahamya no kwandikwa kugira ngo yandikwe no mu ijuru.

Inyigisho n’Ibihango 128:8

Joseph Smith, mu ibaruwa yandikiye Abera

Ubu, imiterere y’umugenzo igizwe n’ububasha bw’ubutambyi, kubw’ihishurirwa rya Yesu Kristo, aho byemewe ko icyo aricyo cyose muhambiriye ku isi kizahambirwa mu ijuru, kandi icyo aricyo cyose muzahambura ku isi kizahamburwe mu ijuru. Cyangwa, mu yandi magambo, dufashe ubu busemuzi mu buryo butandukanye, icyo aricyo cyose mwanditse ku isi kizandikwa no mu ijuru, kandi icyo aricyo cyose mutanditse ku isi, ntikizandikwa no mu ijuru; kuko mu bitabo niho abapfuye banyu bazacirirwa imanza, zikwiriye n’imirimo yabo, niba bo ubwabo baritabiriye iyo migenzo ku bwabo propria persona, cyangwa hakoreshejwe ababasimbura babo bwite, bijyanye n’umugenzo Imana yateguye kubw’agakiza kabo uhereye mbere y’iremwa ry’isi, bijyanye n’inyandiko bakoze zerekeranye n’abapfuye babo.

Imigenzo yanditswe ku isi ku bw’ubushobozi bw’ubutambyi yandikwa no mu ijuru, yaba yarahawe umuntu ubwe cyangwa mu kigwi cye.

Inyigisho n’Ibihango 128:9

Joseph Smith, mu ibaruwa yandikiye Abera

Bishobora kugaragarira bamwe ko ari inyigisho ikakaye cyane tuvugaho—ububasha bwandika cyangwa buhambira ku isi kandi bugahambira no mu ijuru. Nyamara, mu myaka yose y’isi, igihe cyose Nyagasani yahaye umugabo uwo ariwe wese ubusonga bw’ubutambyi kubw’ihishurirwa ry’umwimerere, cyangwa itsinda ry’abagabo, ubu bubasha bwatanzwe igihe cyose. Bityo, icyo aricyo cyose abo bagabo bakoze mu bushobozi, mu izina rya Nyagasani, kandi bakabikora mu by’ukuri no mu bukiranutsi, kandi bagakora inyandiko nyayo kandi yizewe yabyo, cyahindutse itegeko ku isi no mu ijuru, kandi ntigishobora guteshwa agaciro, bijyanye n’amategeko ya Yehova ukomeye. Iyi ni imvugo y’ubukiranutsi. Ni nde ushobora kuyumva?

Ububasha bwo guhambira ku isi no mu ijuru bwatanzwe muri buri busonga, kandi inyandiko zikozwe neza zituma umurimo uhambira.

Kandi habayeho ko data, Lehi, yabonye na none ku bisate by’umuringa ibisekuru by’abasogokuruza be; kubera iyo mpamvu yamenye ko akomoka kuri Yozefu; koko, ndetse wa Yozefu wari umuhungu wa Yakobo, wagurishijwe muri Egiputa, kandi wabungabunzwe n’ukuboko kwa Nyagasani, kugira ngo azabungabunge se, Yakobo, n’urugo rwe rwose ngo badatikizwa n’inzara.

Lehi avumbura igisekuruza cye mu bisate by’umuringa maze amenya ko akomoka kuri Yozefu wo muri Egiputa.

Dore, bana banjye, ndifuza ko muzibuka kubahiriza amategeko y’Imana, kandi ndashaka ko muzatangariza abantu aya magambo. Dore, nabahaye amazina y’ababyeyi bacu ba mbere baturutse mu gihugu cya Yerusalemu; kandi ibi nabikoze kugira ngo igihe mwibutse amazina yanyu mushobore kubibuka; kandi igihe mubibutse mushobore kwibuka imirimo yabo; nuko nimwibuka imirimo yabo mushobore kumenya ko yavuzwe, ndetse yanditswe, ko yari myiza.

Helamani yise abahungu be amazina y’abakurambere bakiranutse kugira ngo kwibuka amazina yabo bibibutse ubwiza bw’abo bakurambere.

Ubwo Adamu yavuze ubu buhanuzi, ubwo yari ashorewe na Roho Mutagatifu, nuko igitabo cy’igisekuru cy’abana b’Imana cyirandikwa. Kandi iki cyari igitabo cy’abakomoka kuri Adamu, avuga ati: Ku munsi Imana yaremye umuntu, yamuremye mu ishusho ry’Imana;

Kuva mu gihe cya Adamu habikwaga igisekuruza cy’abana b’Imana, inyandiko ya mbere y’umuryango yanditswe.

Ariko inyandiko z’abasogokuruza, ndetse ba patiriyariki, zerekeye uburenganzira bw’Ubutambyi, Nyagasani Imana yanjye yabibungabungiye mu maboko yanjye; kubera iyo mpamvu ubumenyi bw’intangiriro y’iremwa, ndetse n’ubw’imibumbe, n’ubw’inyenyeri, nk’uko byeretswe abasogokuruza, nabitse ndetse kugeza uyu munsi, kandi nzagerageza kwandika bimwe muri ibi bintu kuri iyi nyandiko, kubw’inyungu y’urubyaro rwanjye ruzabaho nyuma yanjye.

Aburahamu yabitse inyandiko za ba sekuruza kandi yandikira inyungu y’urubyaro rwe.

Inyigisho n’Ibihango 128:18

Joseph Smith, mu ibaruwa yandikiye Abera

Nashoboraga gukora ubusemuzi bweruye kuri ibi, ariko bireruye bihagije kugira ngo bihuze n’intego yanjye uko iri. Birahagije kumenya, kuri iki kintu, ko isi izakubitwa n’umuvumo keretse nihabaho komatanywa k’uburyo bumwe cyangwa ubundi hagati y’ababyeyi b’abagabo n’abana, ku ngingo runaka cyangwa indi—kandi dore iyo ngingo ni iyihe? Ni umubatizo kubw’abapfuye. Kuko tutabafite ntidushobore kugirwa intungane; nta n’ubwo batadufite bagirwa intungane. Ntibashobora kimwe na twe kugirwa intungane tudafite n’abapfiriye mu nkuru nziza, kuko ni ngombwa mu gutangiza ubusonga bw’ubwuzure bw’ibihe, ubusonga ubu burimo gutangizwa, kugira ngo ihuzwa ryuzuye kandi uko ryakabaye, n’ugusudirwa hamwe n’ubusonga, n’imfunguzo, n’ububasha, n’amakuzo bizabeho, kandi bihishurwe uhereye mu minsi ya Adamu ndetse kugeza magingo aya. Kandi si ibi gusa, ahubwo ibyo bintu bitigeze bihishurwa uhere mu ntangiriro y’isi, ariko byagumye guhishwa abanyabwenge n’abashishoza, bizahishurirwe abana batoya n’impinja muri ubu, ubusonga bw’ubwuzure bw’ibihe.

Umurimo ukorerwa abapfuye ni “urunigi rusudira” ruhuza ibisekuru mu bumwe butunganye.

Inyigisho n’Ibihango 128:22

Joseph Smith, mu ibaruwa yandikiye Abera

Bavandimwe, ntituzakomeza umutsi ku birebana n’impamvu ikomeye ityo? Nimujye imbere kandi ntimusubire inyuma. Mugire ubutwari, bavandimwe, kandi mukomeze, kugeza ku ntsinzi! Imitima yanyu ninezerwe, kandi yishime bihebuje. Isi nituragare iririmbe. Abapfuye nibaririmbire indirimbo z’igisingizo gihoraho Umwami Imanuweli, washyizeho, mbere y’uko isi ibaho, ikizatuma tubacungura mu nzu y’imbohe yabo, kuko imbohe zizarekurwa.

Ihamagara ry’ibyishimo rya Joseph Smith ryo gukomeza gucungura abapfuye, kuko imbohe zizarekurwa.

Inyigisho n’Ibihango 128:24

Joseph Smith, mu ibaruwa yandikiye Abera

Dore, umunsi ukomeye wa Nyagasani uregereje; none ni nde uzabasha kwihangana ku munsi wo kuza kwe, kandi ni nde uzashobora kwiyumanganya nagaragara? Kuko ameze nk’umuriro w’umucuzi, n’isabune y’abameshi; kandi azatunganya abahungu ba Lewi, abacencure nk’uko bacencura zahabu na feza, maze bazature amaturo Nyagasani bakiranutse. kubera iyo mpamvu, nimureke, nk’itorero kandi nk’abantu, kandi nk’Abera b’Iminsi ya Nyuma, duture Nyagasani ituro dukiranutse; kandi mureke duture mu ngoro ye ntagatifu, nirangira, igitabo gikubiyemo inyandiko z’abapfuye bacu, kizaba gikwiriye kwemerwa.

Abera batumirwa guture mu ngoro igitabo gikwiriye gikubiyemo inyandiko z’abapfuye babo.