Etke jej kōm̧m̧ane menmenbwij an baam̧le

3 Nipai 25:5–6

Jisōs Kraist, ke ej kōnono naan ko an Malakai n̄an riNipai ro

Lo, Inaaj jilkinwaj Ilaija rikanaan eo m̧okta jān itok eo an raan eo eļap im rōkaammijak an Irooj; Im enaaj ukōt būruōn ro jemāer n̄an ro nejier, im būruōn ro nejier n̄an ro jemāer, n̄e I ab itok im den̄ļo̧ke laļ kōn juon kalia.

Rilo̧mo̧o̧r eo ejerkak ej bar ba kallim̧ur eo an Malakai kōn Ilaija n̄an armej ro ilo America, im ej kwaļo̧k aorōk eo an.

Lo, I naaj kwaļo̧k n̄an kom̧ Priesthood eo, jān pein Ilaija rikanaan eo, m̧okta jān itok eo an raan eo eļap im rōkaammijak an Irooj. Im e naaj kalōlō ilo būruōn ro nejier kallim̧ur ko kar kōm̧m̧ani n̄an ro jim̧m̧aer, im būruōn ro nejier renaaj oktakļo̧k n̄an ro jemāer. Eļan̄n̄e ekar jab āindein, aolepān laļ naaj kar kanooj ko̧kkure ilo itok eo An.

Naan ko an Malakai āinwōt Moronai ekar ba: Ilaija enaaj kōjepļaaktok maron̄ in priesthood im kalbwin ilo būruōn ajri ro kallim̧ur ko kar kōm̧m̧ani n̄an ro jemāer.

Josep Smith—Bwebwenato 1:38–39

Josep Smith, ke ej bar ba naan ko an Moronai

Im bar juon alen, eaar kōnono eoon kein kaļalem āindein: Lo, Inaaj kwaļo̧k n̄an kom̧ Priesthood eo, jān pein Ilaija rikanaan eo, m̧okta jān itok eo an raan eo eļap im kaammijak an Irooj. Eaar barāinwōt kōnono jān eoon eo tok āinjuon: Im enaaj kalbwin ilo bōro ko būruōn ro nejier kallim̧ur ko kar kōm̧m̧ani n̄an ro jemāer, im bōro ko buruō ro nejier renaaj oktakļo̧k n̄an ro jemāer. Eļan̄n̄e en kar jab āindein, aolepān laļ naaj kar kanooj ko̧kkure ilo itok eo An.

Bwebwenato eo an Josep Smith kōn an Moronai kar kōnono n̄an e kanaan eo an Malakai kōn Ilaija ilo 1823.

Ālikin visōn eaar kilōk, bar juon visōn eļap im aiboojoj eaar erļo̧k im̧aamro; bwe Ilaija rikanaan eo, eo kar bōklōn̄ļo̧k n̄an lan̄ ilo ejjeļo̧k nemake mej, eaar jutak im̧aamro, im ba: Lo, iien eo em̧ōj an kanooj itok, eo kar kōnono kake jān lo̧n̄iin Malakai—im kam̧ool bwe e [Ilaija] naaj kar jilkintok, m̧okta jān an itok raan eo eļap im kaammijak an Irooj— N̄an ukōtļo̧k būruōn ro jemāer n̄an ro nejier, im ro nejier n̄an ro jemāer, n̄e aolepān laļ ab jorrāān kōn juon lia— Kōn menin, ki ko an tōrean bōk eddo jab in rej wūjlepiwaj ilo peimiro; im jān men in kōm̧ro maron̄ jeļā bwe raan eo eļap im kaammijak an Irooj ej epaak, em̧ool epād im̧aan kōjām ko.

Ilaija ej waļo̧k ilo Kirtland Tampeļ ilo 1836 im ej letok ki ko an jerbal in n̄an Josep Smith im Oliver Cowdery.

Katak im Bujen Ko 98:16

Irooj, jān Josep Smith

Kōn menin, unujiļo̧k tariņae im kabun̄bun̄ļo̧k aenōm̧m̧an, im kanooj kappukot n̄an ukōtļo̧k būruōn ajri raņ n̄an ro jemāer, im būruōn ro jemāer n̄an ro nejier;

Irooj ej tōl Ro Rekwojarjar bwe ren jerbal kōn kajoor n̄an ukōtļo̧k būruōn ajri ro im ro jemāer n̄an doon.

Katak im Bujen Ko 138:47–48

Josep F. Smith, ke ej kwaļo̧k visōn eo an kōn ro remej

Rikanaan Ilaija eo ekar itōn kalbwin ilo būruōn ajri ro kallim̧ur ko kar kōm̧m̧ani n̄an ro jemāer, Im rikaniji jekjek in jerbal eo eļap eo enaaj kar kōm̧m̧an ilo tampeļ ko an Irooj ilo tarlep in tōrean iien eddo ko, n̄an lo̧mo̧o̧r eo an ro remej, im sil eo an ajri ro n̄an ro jemāer im jineer, n̄e aolep laļ ab den̄ļo̧ke kōn juon lia im kanooj jorrāān ilo itok eo An.

Jerbal eo an Ilaija ekar kwaļo̧k m̧okta jerbal in tampeļ n̄an ro remej im liāp eo an ajri ro n̄an jemāer im jineer.

Kiiō, kōn ļamļam in jetōb eo ikōtaan mej im jerkakpeje eo—Lo, kar kwaļo̧k n̄an eō jān juon enjeļ, bwe jetōb ko an aolep armej, ilo wōt iien eo rej ilo̧k jān ānbwinnin kanniōk in, aaet, jetōb ko an aolep armej, mekarta n̄e rem̧m̧an ak nana, rej ilo̧k n̄an jikier n̄an Anij eo eaar leļo̧k n̄an er mour. Innām ālikin men kein, jetōb ko an ro raar jim̧we naaj bōk er ilo juon mejatoto in m̧ōņōņō, eo ņa etan paredais, juon mejatoto in kakkije, juon mejatoto in aenōm̧m̧an, ijo renaaj kakkije jān aolep inepata ko aer im jān aolep ailparo, im būrom̧ōj.

Alma ej katakin bwe jetōb ro rej mour wōt ālikin mej, im ro rejim̧we rej deļo̧n̄ ilo juon jekjek in kakkije etan paredais.

Katak im Bujen Ko 137:7–9

Irooj, ilo juon visōn n̄an Josep Smith

Āindein eaar itok ainikien Irooj n̄an eō, im ba: Aolep ro rekar mej kōn ejjeļo̧k jeļāļo̧kjeņ kōn gospel in, ro renaaj kar bōk e eļan̄n̄e naaj kar kōtļo̧k er n̄an pād wōt, renaaj rijolōte aelōn̄ selestial eo an Anij; Barāinwōt aolep ro renaaj mej jān iien in m̧aanļo̧k kōn ejjeļo̧k jeļā kake e, ro renaaj kar bōk e kōn aolepān burueer, renaaj rijolōte aelōn̄ in kiin̄ en; Bwe N̄a, Irooj, I naaj ekajet aolep armej raņ ekkar n̄an jerbal ko aer, ekkar n̄an ikdeelel ko an burueer.

Ro rekar mej ijello̧kin aer ron̄ gospel eo ak rekar naaj bōke rejjab ilikin kōjām; Anij ej ekajet ekkar n̄an kōņaan ko an būruwōd.

Katak im Bujen Ko 138:11

Josep F. Smith, ke ej kwaļo̧k visōn eo an kōn ro remej

Ke iaar koļmānļo̧kijeņ kaki men kein ko em̧ōj kar jei, mejān aō meļeļe rekar peļļo̧k, im Jetōb eo an Irooj eaar pād ioō, im iaar lo inelep ko an ro remej, jim̧or dik im ļap.

Visōn eo an Būreejtōn Josep F. Smith ilo 1918 kōn laļ eo an jetōb ej jino ke ej koļmānļo̧kjeņ kōn jeje ko rekwojarjar.

Katak im Bujen Ko 138:30

Josep F. Smith, ke ej kwaļo̧k visōn eo an kōn ro remej

A lo, jān ilubwiljin ro rejim̧we, Eaar karōke jarin jerbal ko An im jitōn̄ ribōkļo̧k naan ro, ņa ballier kōn kajoor im maron̄, im kappe er n̄an ilo̧k im bōkļo̧k meram in gospel eo n̄an er ro im rekar pād ilo marok, em̧ool n̄an aolep jetōb ko an armej ro; im āindein gospel eo kar kwaļo̧k e n̄an ro remej.

Rilo̧mo̧o̧r eo ekar karōk jetōb ro rejim̧we n̄an bōkļo̧k gospel eo n̄an aolep ro remej.

Katak im Bujen Ko 138:32–34

Josep F. Smith, ke ej kwaļo̧k visōn eo an kōn ro remej

Āindein gospel eo kar kwaļo̧k e n̄an ro rekar mej ilo jero̧wiwi ko aer, kōn ejjeļo̧k jeļāļo̧kjeņ kōn m̧ool eo, ak ilo bōd, kōnke rekar jab bōk rikanaan ro. Rein kar katakin er tōmak ilo Anij, ukeļo̧k jān jero̧wiwi, peptaij ilo etan ro jet n̄an jeorļo̧k jero̧wiwi ko, mennin letok eo an Jetōb Kwōjarjar jān likūt pā ko ioon, Im aolep pedped ko an gospel eo ko rekar aikuji n̄an aer jeļā bwe ren maron̄ kōm̧m̧an bwe ren tōllo̧ke bwe ren maron̄ ekajet ekkar n̄an armej raņ ilo kanniōk, a mour ekkar n̄an Anij ilo jetōb.

Rej katakin jetōb ro ilo laļ eo an jetōb aolepān gospel eo, ekoba peptaij ilo etan ro jet.

Katak im Bujen Ko 138:53–54

Josep F. Smith, ke ej kwaļo̧k visōn eo an kōn ro remej

Rikanaan Josep Smith, im jema, Hyrum Smith, Brigham Young, Jon Taylor, Wilford Woodruff, im bar jetōb ro jet rejenolo̧k ro kar jabwik er n̄an wōnm̧aantak ilo tarlep in iien ko n̄an bōk kuņaer ilo kōm̧m̧ani foundasōn ko an jerbal eo eļap ilo raan ko āliktata, Ekitbuuj ekkal eo an tampeļ ko im kōm̧m̧ani kain̄i ko ijo n̄an lo̧mo̧o̧r eo an ro remej, rekar barāinwōt pād ilo laļ eo an jetōb.

Jetōb ro rekar kāāleti kar kōjparoki n̄an likūt pedped in jerbal eo an raan kein āliktata, ekoba tampeļ ko im kain̄i ko n̄an ro remej.

Katak im Bujen Ko 138:57–59

Josep F. Smith, ke ej kwaļo̧k visōn eo an kōn ro remej

Iaar lo bwe elder ro retiljek an tōrean bōk eddo in, n̄e rej ilo̧k jān mour in, rej wōnm̧aanļo̧k wōt jerbal ko aer ilo kwaļo̧k gospel in ukeļo̧k eo im lo̧mo̧o̧r, kōn katok eo an eo Nejin Emake Keotak in Anij, ilubwiljin ro rej pād ilo marok im ium̧win korak an jero̧wiwi ilo laļ eo eļap an jetōb ro an ro remej. Ro remej im rej ukeļo̧k renaaj bōk lo̧mo̧o̧r, kōn pokake n̄an kain̄i ko an m̧weo im̧ōn Anij, Im ālikin aer kar kōļļāiki bakkiin̄ in bōd ko aer, im kar kwaļ er erreo, renaaj bōk juon wōņāān ekkar n̄an jerbal ko aer, bwe er rej rijolōte lo̧mo̧o̧r.

Ro retiljek rej katakin wōt ālikin mej, im ro remej me rej ukweļo̧k rej bōk lo̧mo̧o̧r kōn kain̄i ko an tampeļ.

Im jon̄an wōt lōn̄ in jetōb ro ilo kalbuuj rekar diwōjtok, im jutak ianbwijmaron̄in pein Anij; im bwe eo rekar dāpij wōt er ilo tomede in marok jilōn̄lōn̄ m̧ae ekajet eo ilo raan eo eļap.

Ilo visōn eo an Inok, jetōb ro ilo kalbuuj rej itok n̄an peiin anmiin an Anij kōn jerbal eo an Rilo̧mo̧o̧r.

Katak im Bujen Ko 124:29–30

Irooj, jān Josep Smith

Bwe juon jikin peptaij ej jab pād ioon laļ, bwe er, ro rekwōjarjar Aō, ren maron̄ peptaij kōn ro remej— Bwe kain̄i in ej an m̧weo Im̧ō, im ban bōke n̄an Eō, ilo wōt raan ko in ami jeram̧ōl, ilo iien eo kom̧ij jab maron̄ kalōke juon em̧ n̄an Eō.

Irooj ej kwaļo̧k bwe peptaij kōn ro remej ej aikuj pād ilo tampeļ eo An.

Katak im Bujen Ko 128:5

Josep Smith, ilo juon lōta n̄an Ro Rekwojarjar

Kom̧ maron̄ ļōmņak bwe laajrak in men kein ekanooj jejjet; a kōtļo̧k bwe in ba n̄an kom̧ bwe ej uwaak in wōt ankilaan Anij, jān ļoore kain̄i eo im m̧aanjāppopo eo Irooj eaar kōmālimi im kōpooje m̧okta jān foundasōn eo an laļ, n̄an lo̧mo̧o̧ren eo an ro remej im rekar mej ilo ejjeļo̧k jeļā kōn gospel eo.

Lo̧mo̧o̧r eo n̄an ro rekar mej ijello̧kin gospel eo kar karōke m̧okta jān kar kōm̧m̧an laļ.

Katak im Bujen Ko 128:15

Josep Smith, ilo juon lōta n̄an Ro Rekwojarjar

Im kiiō, m̧aan im kōrā ro jeiū im jatū rejitōnbōro, in kam̧ool n̄an kom̧ bwe erkein rej pedped ko kōn ro remej im ro remour im reban maron̄ watōki bajjek im eļļā jāni, āinwōt aer ekkejelļo̧k n̄an lo̧mo̧o̧ren eo ad. Bwe lo̧mo̧o̧ren eo aer aikuji im eaorōk n̄an lo̧mo̧o̧ren eo ad, āinwōt Paul ej ba kōn ro jemān—bwe er ijello̧kwid reban maron̄ weeppān—im kōj ijello̧kun rimej ro ad jeban weeppān.

Lo̧mo̧o̧r eo ad im lo̧mo̧o̧r eo an ro jibwid im jim̧m̧ad rej kōtaan ippān doon; ejjeļo̧k emaron̄ weeppān ijello̧kin eo jet.

Katak im Bujen Ko 132:46

Irooj, jān Josep Smith

Im em̧ool, em̧ool, Ij ba n̄an eok, bwe jabdewōt kwōj sili ioon laļ enaaj sil ilo lan̄; im jabdewōt kwōj lukwōje ioon laļ, ilo Eta im jān Aō innaan, Irooj ej ba, E enaaj lukwōje indeeo ilo lan̄ ko; im jabdewōt eo im jero̧wiwi ko an kwōj juļo̧k ioon laļ naaj juļo̧ki indeeo ilo lan̄ ko; im jabdewōt eo im jero̧wiwi ko an kwōj dāpij ioon laļ naaj dāpiji ilo lan̄.

Irooj ej kam̧ool bwe men eo ej liāp ioon laļ kōn maron̄ eo An ej liāp indeeo ilo lan̄.

Katak im Bujen Ko 127:6–7

Irooj, ilo juon lōta jān Josep Smith

Em̧ool, āindein Irooj ej ba n̄an kom̧ kōn rimej ro ami: N̄e jabdewōt iaami rej peptaij kōn ro remej ami, en wōr juon rilale lo̧o̧k, im en kam̧ool e peptaij ko ami kōn mejān make; e en ron̄jake kōn lo̧jiln̄in, bwe en maron̄ kam̧ool kōn m̧ool eo, Irooj ej ba; Bwe ilo aolep kanne ko ami en maron̄ jeje ilo lan̄; jabdewōt kom̧ij liāpe ioon laļ, emaron̄ in liāpe ilo lan̄; jabdewōt kom̧ij kōtļo̧k ioon laļ, maron̄ in kōtļo̧k ilo lan̄;

Peptaij ko ilo etan ro remej rej aikuj wōr rikam̧ool im ļo̧o̧k bwe ren barāinwōt ļo̧o̧k ilo lan̄.

Katak im Bujen Ko 128:8

Josep Smith, ilo juon lōta n̄an Ro Rekwojarjar

Kiiō, nememeen kain̄i in ej im̧wem̧we ilo kajoor eo an priesthood eo, jān revelesōn eo an Jisōs Kraist, ijo ie em̧ōj letok jabdewōt kom̧ij liāpe ioon laļ enaaj liāpe ilo lan̄, im jabdewōt kom̧ij kōtļo̧k ioon laļ enaaj kōtļo̧k ilo lan̄. Ak, ilo bar jet naan, im lale jān bar juon wāween ukok eo, jabdewōt kom̧ij ļo̧o̧k ioon laļ naaj ļo̧o̧ke ilo lan̄, im jabdewōt kom̧ij jab ļo̧o̧ke ioon laļ jamin naaj ļo̧o̧ke ilo lan̄; bwe jān bok ko naaj ekajet rimej ro ami, ekkar n̄an jerbal ko aer make, men̄e er make rekar loloorjaki kain̄i ko ilo kanemarmej, ak jān jekjek ko kōn propria persona, ekkar n̄an kain̄i eo me Anij eaar kōpooje n̄an lo̧mo̧o̧ren eo aer jān m̧okta jān foundasōn eo an laļ, ekkar n̄an ļo̧o̧k ko me kar kōjparoki kōn rimej ro aer.

Kain̄i ko kar ļo̧o̧k ioon laļ kōn maron̄ in priesthood rej ļo̧o̧k ilo lan̄, men̄e rekar bōk er make ak ilo etaer.

Katak im Bujen Ko 128:9

Josep Smith, ilo juon lōta n̄an Ro Rekwojarjar

E maron̄ āinwōt n̄an jet bwe ej juon katak ekanooj bōllej im jej ekkōnono kake—juon kajoor eo ej ļo̧o̧ke ak liāpe ioon laļ im liāpe ilo lan̄. Mekarta, ilo aolep dettan ko an laļ, jabdewōt iien ke Irooj eaar leļo̧k juon tōre bōk eddo an priesthood eo n̄an jabdewōt em̧m̧aan jān lukkuun revelesōn, ak jabdewōt kumi in em̧m̧aan, kajoor in ekar leļo̧ke iien otemjej. Kōn menin, jabdewōt men em̧m̧aan rein rekar kōm̧m̧ane ilo maron̄, ilo etan Irooj, im kar lukkuun m̧ool im tiljek ilo aer kōm̧m̧ane, im kar kōm̧m̧ane juon ļo̧o̧k ekkar im tiljek kōn ejja men in wōt, eaar erom juon kien ioon laļ im ilo lan̄, im jamin kar maron̄ m̧anļo̧k, ekkar n̄an kean̄ ko an Jeova eļap. En̄in ej juon ennaan em̧ool. Wōn emaron̄ ron̄jake?

Kajoor n̄an liāp ioon laļ im ilo lan̄ ekar letok ilo kajjojo tōrean bōk eddo, im ļo̧o̧k ko retiljek rej kōm̧m̧ane bwe jerbal eo en liāp.

Im ālikin men kein, jema, Liai, eaar barāinwōt lo ilo pileij brass kein juon menmenbwij an ro jemān; kōn menin eaar jeļā bwe e bwijjin Josep; aaet, ejja Josep m̧aan eo kar nejin Jekab, eo kar wiakake ilo Ijipt, im eo kar oņaake kōn pein Irooj, bwe en maron̄ kōjparok Jemān, Jekab, im aolepān m̧weo im̧ōn jān jako kōn n̄ūta.

Liai ej loe menmenbwij eo an ilo pleit ko an bronze (brass plates) im ej jeļā bwe ej itok jān Josep eo an Ijipt.

Lo, ro nejū m̧aan, ikōņaan bwe kom̧in keememej n̄an kōjparok kien ko an Anij; im ikōņaan bwe kom̧in kwaļo̧k n̄an armej rein naan kein. Lo, iaar lewōj n̄an kom̧ āt ko etan ro jemād im jined m̧oktata ro raar diwōjtok jān āneen Jerusalem; im men in iaar kōm̧m̧an bwe n̄e kom̧ij keememej āt ko etami kom̧ maron̄ keememej er; im n̄e kom̧ij keememej er kom̧ maron̄ keememej jerbal ko aer; im n̄e kom̧ij keememej jerbal ko aer kom̧ maron̄ jeļā ekōjkan ba ennaan in, im barāinwōt kar jeje, bwe raar em̧m̧an.

Hilamōn ekar ņa etan ļōm̧aro nejin kōn etan ro jibwier im jim̧m̧aer rejim̧we bwe n̄e rej keememej etaer ren keememej em̧m̧an eo an ro m̧oktaļo̧k jān er.

Kiiō en̄in kanaan eo Adam ar kōnono, ke kar kōm̧akūti jān Jetōb Kwōjarjar, im juon menmenbwij kar kōjparoke kōn ro nejin Anij. Im en̄in kar bok in epepen ko an Adam, im ba: Ilo raan eo Anij ar kōm̧anm̧an armej, ilo jekjek in Anij Eaar kōm̧m̧ane e;

Jān raan ko an Adam kar kōjparok juon menmenbwij an ajri ro nejin Anij, ļo̧o̧k in baam̧le eo m̧oktata kar je.

A ļo̧o̧k ko an ro jema, em̧ool petriak ro, kake jim̧we eo n̄an Priesthood eo, Irooj aō Anij eaar dāpiji wōt ilo peiū make; kōn menin jeļā eo kōn jinoin kōm̧anm̧an laļ, im barāinwōt kōn planet ko, im kōn iju ko, āinwōt kar kōjjeļāik ro jema kaki, iaar dāpiji em̧ool n̄an rainin, im inaaj kijejeto n̄an jeje jet ian men kein ioon ļo̧o̧k in, n̄an em̧m̧anļo̧k eo an ro bwijjū im renaaj itok ālikū.

Ebream ekar kōjparok ļo̧o̧k ko an ro jemān im ekar je n̄an em̧m̧an an ro ineen tokālik.

Katak im Bujen Ko 128:18

Josep Smith, ilo juon lōta n̄an Ro Rekwojarjar

I maron̄ kar jakem̧aantak juon ukok ealikkarļo̧k jān men in, a ebwe an alikkar n̄an ekkar n̄an un eo an āinwōt an jutak. E bwe n̄an jeļā, ilo case in, bwe laļ naaj den̄ļo̧ke kōn juon lia m̧ae iien eo ewōr juon wāween korak ak ruo ikōtaan ro jemāer im ro nejier, ioon jet mennin ekkōnono ak bar juon—im lo ta mennin ekkōnono in? E ej peptaij kōn ro remej. Bwe kōj ijello̧kier jejjab maron̄ weeppān, im jab er ijello̧kwid reban maron̄ weeppān. Im reban maron̄ ak kōj jeban weeppān ijello̧kun ro rekar mej ilo gospel in barāinwōt; bwe emennin aikuj ilo abaretok tarlep in tōrean iien bōk eddo ko, tōrean bōk eddo eo me ej kiiō ijjino n̄an abaretok, bwe dipiio in im dedeļo̧k in koba eo eweeppān, im kaōnļo̧k ippān doon in tōrean bōk eddo ko, im ki ko, im kajoor ko, im aiboojoj ko ren aikuj bōk jikier, im kwaļo̧ki jān raan ko an Adam em̧ool n̄an iien in. Im jab men in wōt, ak men ko me rejjan̄in kar waļo̧k jān foundasōn an laļ in, a rekar dāpiji ilo ņojak jān ro remālōtlōt im jeļāļo̧kjeņ, naaj kwaļo̧ki n̄an ajri ro im nin̄nin̄ rej ninnin ilo iien in, tarlep in tōrean iien bōk eddo ko.

Jerbal n̄an ro remej ej korak eo ej kobaik epepen ko ilo juon wōt koba eo eweeppān.

Katak im Bujen Ko 128:22

Josep Smith, ilo juon lōta n̄an Ro Rekwojarjar

Ro jeiū im jatū, ta jeban bun̄m̧aanļo̧k ilo juon jibadbad eļap ke? Bun̄m̧aanļo̧k im jab kōmtālik. Kom̧in peran, ro jeiū im jatū; im wōnm̧aanļo̧k, wōnm̧aanļo̧k n̄an anjo̧! Būruōmi ren lan̄lōn̄, im m̧ōņōņō otem m̧ōņōņō. Laļ en n̄irļo̧k ilo al. Ro remej ren ekkōnono al ko in wūjtak in nebar indeeo n̄an Kiin̄ Immanuel, eo kar kapiti, m̧okta jān kar laļ, men eo enaaj kōmaron̄ kōj n̄an lo̧mo̧o̧ren er jān kalbuuj eo aer; bwe rikalbuuj ro renaaj anemkwōj.

Kūr eo an Josep Smith ilo lan̄lōn̄ n̄an wōnm̧aanļo̧k ilo lo̧mo̧o̧ren ro remej, bwe rikalbuuj ro renaaj anemkwōj.

Katak im Bujen Ko 128:24

Josep Smith, ilo juon lōta n̄an Ro Rekwojarjar

Lo, raan eo eļap an Irooj epaaktok; im wōn emaron̄ jelm̧ae raan in itok eo An, im wōn emaron̄ jutak n̄e E ej waļo̧ktok? Bwe E ej āinwōt kijeek an rikarreoik māāl ko, im āinwōt soap an rikarreo nuknuk; im E naaj jijet āinwōt rimālejjon̄ im rikarreo in silver, im E naaj karreoik m̧aan ro nejin Livai, im karreoik er āinwōt gold im silver, bwe ren maron̄ katok n̄an Irooj juon katok ilo wānōk. Jen, kōn menin, āinwōt juon kabun̄ im juon armej, im āinwōt Ro Rekwōjarjar ilo Raan Ko Āliktata, katok n̄an Irooj juon katok ilo wānōk; im jen jakeļo̧k ilo tampeļ eo ekwōjarjar An, n̄e em̧ōj an dedeļo̧k, juon bok eo ie epād ļo̧o̧k ko kōn ro ad remej, eo enaaj tōllo̧ke aolep bun̄bōro.

Rej karuwaineneik Ro Rekwojarjar n̄an jakeļo̧k ilo tampeļ eo juon bok ekkar, eo ie epād ļo̧o̧k ko kōn ro aer remej.