Mpo na nini tosalaka lisolo ya libota

3 Nefi 25:5–6

Yesu Klisto, kotangaka maloba ya Malaki epai ya Banefite

Tala, nakotindela bino profeta Eliya liboso ya boyei ya mokolo monene mpe ya nsomo ya Nkolo; Mpe akobalola mitema ya batata epayi ya bana mpe mitema ya bana epayi ya batata na bango, mbele naya mpe nabeta mabele na bolakeli mabe.

Mobikisi oyo asekwi azongeli elaka ya Malaki na ntina ya Eliya epai ya bato ya Amerika, mpe yango elakisi ntina na yango.

Tala, Nakobimisa epayi na bino Bonganganzambe, na maboko ya profeta Eliya, liboso ya boyei ya mokolo monene mpe ya nsomo ya Nkolo. Mpe akolona na mitema ya bana bilako oyo epesamaki epayi ya batata, mpe mitema ya bana mikobaluka epayi ya batata na bango. Soki ezalaki bongo te, mabele mobimba elingaki kobebisama na boyei na ye.

Maloba ya Moroni na ntina ya Malaki: Eliya akozongisa likoki ya bonganganzambe mpe akolona kati na mitema ya bana bilaka oyo epesamaki na batata.

Joseph Smith—Mambi ya Kala 1:38–39

Joseph Smith, kolobaka lisusu maloba ya Moroni

Mpe lisusu, atangaki molongo ya mitano boye: Tala, nakobimisa epayi na bino Bonganganzambe, na maboko ya profeta Eliya, liboso ya boyei ya mokolo monene mpe ya nsomo ya Nkolo. Atangaki lisusu molongo molandi na lolenge ekeseni: Mpe akolona kati na mitema ya bana bilako epesamaki na batata, mpe mitema ya bana mikobaluka epayi ya batata na bango. Soki ezalaki bongo te, mabele mobimba elingaki kobebisama nie na boyei na ye.

Lisolo ya Joseph Smith na ntina ya Moroni oyo atangelaki ye esakweli ya Malaki na ntina ya Eliya na 1823.

Esilaki limoni oyo kokangama, limoni mosusu ya monene mpe ya nkembo elakisamaki na biso; mpo profeta Eliya, oyo akamatamaki na lola na kozangaka komeka liwa, atelemaki liboso na biso, mpe alobaki: Tala, ntango esili kokoka nie mpenza, oyo elobamaki na monoko ya Malaki—kotatolaka ete ye [Eliya] akotindama, liboso ete mokolo monene mpe ya nsomo ya Nkolo moya— Mpo na kobalola mitema ya batata epayi ya bana, mpe bana epayi ya batata, mbele mokili mobimba mobetama na bolakeli mabe— Boye, bafungola ya eleko oyo epesami na maboko na bino; mpe na oyo bokoki koyeba ete mokolo monene mpe ya nsomo ya Nkolo ezali penepene, kutu na bikuke.

Eliya abimeli na Tempelo ya Kirtland na 1836 mpe apesi bafungola ya mosala oyo na Joseph Smith mpe Oliver Cowdery.

Malongi mpe Mayokani 98:16

Nkolo, na nzela ya Joseph Smith

Boye, botika bitumba mpe bosakola kimia, mpe boluka na molende kobongola mitema ya bana epayi ya batata, mpe mitema ya batata epayi ya bana na bango;

Nkolo atindi Basantu basala na molende mpo na kobalola mitema ya bana mpe ya batata moko epai ya mosusu.

Malongi mpe Mayokani 138:47–48

Joseph F. Smith, kolimbolaka limoni na ye ya bakufi

Profeta Eliya asengelaki kolona kati na mitema ya bana bilaka epesamaki na batata na bango, Kolakisaka elilingi ya mosala monene oyo mosengelaki kosalema kati na batempelo ya Nkolo na eleko ya litondi ya ntango, mpo na bosikoli ya bakufi, mpe bokangi ya bana na baboti na bango, mbele mabele mobimba ebetama na bolakeli mabe mpe ebebisama mpenza na boyei na ye.

Mosala ya Eliya elakisaki liboso mosala ya tempelo mpo na bakufi mpe bokangisi ya bana na baboti na bango.

Sikawa, mpo na oyo etali ezalela ya molimo na kati ya liwa mpe bosekwi—tala, eyebisamaki epayi na ngai na anjelu moko, ete milimo ya bato nyonso, sasaipi lokola milongwe uta na nzoto oyo ya kufa, iyo, milimo ya bato nyonso, soki bazalaki malamu soki te mabe, mizongisami epayi na yango na Nzambe oyo apesaki yango bomoi. Mpe nde ekosalema ete, milimo na bango oyo bazali sembo mikoyambama na ezalela ya esengo, oyo ebiangami paladiso, ezalela moko ya bopemi, ezalela moko ya kimia, wapi bakopema uta na mikakatano nyonso na bango mpe uta na mitungisi nyonso, mpe mawa.

Alma ateyi ete milimo ekobaka na bomoi nsima ya liwa, mpe basembo bakotaka na ezalela ya bopemi oyo ebengami paladiso.

Malongi mpe Mayokani 137:7–9

Nkolo, na limoni moko epai ya Joseph Smith

Boye nde mongongo ya Nkolo moyaki epayi na ngai, kolobaka: Nyonso oyo bakufaki na kozangaka boyebi ya nsango malamu oyo, baoyo balingaki koyamba yango soki bapesamaki nzela ya kotikala, bakozala basangoli libula ya bokonzi ya selesitiale ya Nzambe; Mpe lisusu baoyo wana nyonso bakokufa uta sikawa kokende liboso na kozangaka boyebi na yango, oyo balingaki koyamba yango na mitema na bango nyonso, bakozala basangoli libula ya bokonzi boma; Mpo ngai, Nkolo, nakosambisa bato nyonso engebene na misala na bango, engebene na mposa ya mitema na bango.

Baoyo bakufaki kozanga koyoka nsango malamu kasi balingaki kondima yango batikami libanda te; Nzambe asambisaka na kolanda baposa ya motema.

Malongi mpe Mayokani 138:11

Joseph F. Smith, kolimbolaka limoni na ye ya bakufi

Lokola nazalaki komanyola makomi oyo makomami, miso ya bososoli na ngai efungolamaki, mpe Molimo ya Nkolo mofandaki likolo na ngai, mpe namonaki ebele ya bakufi, ezala mike to minene.

Limoni ya Mokambi Joseph F. Smith ya mokili ya milimo na 1918 ebandi ntango azali komanyola makomi.

Malongi mpe Mayokani 138:30

Joseph F. Smith, kolimbolaka limoni na ye ya bakufi

Kasi tala, na kati ya basembo, abongisaki mapinga na ye mpe aponaki bantoma, balatisama na nguya mpe likoki, mpe atindaki bango kokende mpe komema pole ya nsango malamu epayi na baye bazalaki kati na molili, solo mpenza epayi ya milimo nyonso ya bato; mpe boye nde nsango malamu eteyamaki na bakufi.

Mobikisi abongisaki milimo ya sembo mpo na komema nsango malamu epai ya bakufi nyonso.

Malongi mpe Mayokani 138:32–34

Joseph F. Smith, kolimbolaka limoni na ye ya bakufi

Boye nde nsango malamu eteyamaki na nyonso oyo wana bakufaki kati na masumu na bango, na kozangaka boyebi ya bosolo, soki mpe na bobuki ya mibeko, mpo baboyaki baprofeta. Baoyo bateyamaki bondimi na Nzambe, boyamboli ya masumu, libatisi ya bokitani mpo na bolimbisi ya masumu, likabo ya Molimo Mosantu na nzela ya kotiama maboko, Mpe mabongisi nyonso mosusu ya nsango malamu oyo esengelaki mpo na bango koyeba mpo ete bakomisama bayengebene ete bakoka kosambisama engebene na bato kati na mosuni, kasi bazwa bomoi engebene na Nzambe kati na molimo.

Milimo na mokili ya milimo bateyamaka nsango malamu mobimba, ata libatisi ya bokitani.

Malongi mpe Mayokani 138:53–54

Joseph F. Smith, kolimbolaka limoni na ye ya bakufi

Profeta Joseph Smith, mpe tata na ngai, Hyrum Smith, Brigham Young, John Taylor, Wilford Woodruff, mpe milimo misusu ya boponi oyo mibatelamaki mpo na kobima na litondi ya ntango ete bamipesa na kotiaka moboko ya mosala monene ya mokolo ya nsuka, Oyo na kati ezali na botongi ya tempelo mpe bokokisi ya makuli kuna na kati mpo na bosikoli ya bakufi, esalemaki lisusu na mokili ya milimo.

Milimo oyo eponami ebatelamaki mpo na kotia miboko ya mosala ya mikolo ya nsuka, ata batempelo mpe makuli mpo na bakufi.

Malongi mpe Mayokani 138:57–59

Joseph F. Smith, kolimbolaka limoni na ye ya bakufi

Natalaki ete bampaka ya sembo ya eleko oyo, ntango bakendeka uta na bomoi ya kufa, bakoba na misala na bango oyo etali koteya nsango malamu ya boyamboli mpe ya bosikoli, na nzela ya mbeka ya Mwana Mobotami se Moko ya Nzambe, na kati ya baoyo wana bazali kati na molili mpe na nse ya boumbu ya masumu kati na mokili monene ya milimo ya bakufi. Bakufi oyo bayamboli bakosikolama, na nzela ya botosi na makuli ya ndako ya Nzambe, Mpe esili bango kofuta etumbu ya bobuki mibeko na bango, mpe basukolami peto, bakozwa lifuta engebene na misala na bango, mpo bazali basangoli libula ya lobiko.

Basembo bakobaka koteya nsima ya liwa, mpe bakufi oyo bayamboli basikolamaka na nzela ya makuli ya tempelo.

Mpe mingi lokola ezalaki milimo oyo ezalaki na boloko ebimaki, mpe etelemaki na loboko ya mobali ya Nzambe; mpe baoyo batikalaki babomamaki na minioko ya molili kino na bosambisi ya mokolo monene.

Na limoni ya Enoka, milimo kati na boloko ebimaka mpo na kokende na loboko ya mobali ya Nzambe elongo na mosala ya Mobikisi.

Malongi mpe Mayokani 124:29–30

Nkolo, na nzela ya Joseph Smith

Mpo ezali na liziba ya libatisi na mabele te, mpo ete bango, basantu na ngai, bakoka kobatisama mpo na baoyo wana bakufa— Mpo bokuli oyo ezali mpo na ndako na ngai, mpe ekoki kondimama epayi na ngai te, bobele na mikolo ya bobola na bino, na ntango oyo wapi bokokoka kotongela ngai ndako te.

Nkolo asakoli ete libatisi mpo na bakufi ezali na esika na yango na tempelo na Ye.

Malongi mpe Mayokani 128:5

Joseph Smith, na mokanda moko epai ya Basantu

Bokoki kokanisa ete molongo ya makambo oyo eleki mingi kokitolama; kasi tika nayebisa bino ete ezali se mpo na kokokisa bolingi ya Nzambe, na kozalaka ya koyokanaka na bokuli mpe bolengeli oyo Nkolo akulisaki mpe alengelaki liboso ya ebandeli ya mokili, mpo na lobiko ya bakufi oyo bakokufa na kozangaka boyebi ya nsango malamu.

Lobiko mpo na baoyo bakufaki kozanga nsango malamu ebongisamaki liboso ete mokili ekelama.

Malongi mpe Mayokani 128:15

Joseph Smith, na mokanda moko epai ya Basantu

Mpe sikawa, bandeko balingami mibali mpe basi, tika nayebisa bino solo ete oyo ezali mabongisi etali bakufi mpe bato na bomoi oyo ekoki kotalema likolo likolo te, na oyo etali lobiko na biso. Mpo lobiko na bango ezali ntina mpe esengelami mpo na lobiko na biso, lokola Paulo alobi na oyo etali batata—ete soki tozali te bakoki kokomisama bato babongi nie te—biso mpe tokoki kokomisama bato bato babongi nie te soki bakufi na biso bazali te.

Lobiko na biso mpe lobiko ya bankoko na biso ekangani elongo; moko te akoki kokomisama mobimba soki mosusu azali te.

Malongi mpe Mayokani 132:46

Nkolo, na nzela ya Joseph Smith

Mpe solo, solo, nalobi epayi na yo, ete nyonso oyo okokanga na mabele ekokangama na lola; mpe nyonso oyo okokanga na mabele, na nkombo na ngai mpe na nzela ya liloba ya ngai, elobi Nkolo, ekokangama seko na lola; mpe masumu ya moto nyonso oyo okolimbisa na mabele ekolimbisama seko na lola; mpe masumu ya moto nyonso oyo okosimba na mabele makosimbama na lola.

Nkolo andimisi ete oyo ekangisami na mabele na likoki na Ye ekangisami libela na lola.

Malongi mpe Mayokani 127:6–7

Nkolo, na mokanda moko ya Joseph Smith

Solo, boye elobi Nkolo epayi na bino mpo na oyo etali bakufi na bino: Ntango bato soki nani na kati na bino babatisami mpo na bakufi na bino, tika ete kalaki mokomi moko azala kuna, mpe tika ete azala nzeneneke ya miso mpo na ebatisi na bino; tika ete ayoka na matoyi na ye, ete akoka kotatola na bosolo mpenza, elobi Nkolo; Ete nyonso mpo na oyo etali masolo ya makomi na bino ekoka kotiama na nkoma na lola; nyonso oyo bokangi na mabele, ekoka kokangama na lola; oyo nyonso bokofungola na mabele, ekoka kofungolama na lola;

Libatisi oyo esalemi na esika ya bakufi esengeli kozala na banzeneneke mpe kokomama mpo ekomama mpe na lola.

Malongi mpe Mayokani 128:8

Joseph Smith, na mokanda moko epai ya Basantu

Sikawa, lolenge ya bokuli oyo ezali na nguya ya bonganganzambe, na emoniseli ya Yesu Klisto, na oyo wapi epesami nzela ete nyonso oyo bokangi na mabele ekokangama na lola, mpe nyonso oyo bofungoli na mabele ekofungolama na lola. To, na maloba mosusu, na kososolaka bobongoli yango na ndenge ekeseni, nyonso oyo bokokoma na mabele ekokomama na lola, mpe nyonso oyo bokomi te na mabele ekokomama te na lola; mpo uta na buku oyo bakufi na bino bakosambisama, engebene na misala na bango moko, ezala soki bazalaki bango moko na makuli ya propria persona, elingi koloba na bomoto na bango moko, soki mpe na nzela ya bantoma ya bango moko, engebene na bokuli oyo Nzambe alengelaki mpo na lobiko na bango uta liboso ya ebandeli ya mokili, engebene na masolo ya makomi oyo babatelaki mpo na ntina ya bakufi na bango.

Makuli oyo ekomami na mabele na likoki ya bonganganzambe ekomamaka na lola, ezala moto azwaki yango ye moko to na nzela ya moto mosusu na esika na ye.

Malongi mpe Mayokani 128:9

Joseph Smith, na mokanda moko epai ya Basantu

Ekoki komonana epayi ya boko bato ete malongi oyo tozali kolobela matengama mpenza—nguya oyo ezali kokoma to kokanga na mabele mpe kokanga na lola. Nzokande, na bikeke nyonso ya mokili, ntango nyonso Nkolo apesaki eleko moko ya bonganganzambe epayi ya moto moko na nzela ya emoniseli ya solo, to na liboke moko ya bato, nguya oyo ezalaki ntango nyonso se kopesama. Tala ntina, nyonso oyo bato wana basalaki na likoki, na nkombo ya Nkolo, mpe soki basalaki yango na solo mpe na bosembo, mpe babatelaki lisolo ya makomi ya solo mpe ya sembo ya bato se moko oyo, yango oyo ekomaki mobeko na mabele mpe na lola, mpe ekokaki te kokweya mpamba, engebene na mikano ya Yehova monene. Oyo ezali liloba ya sembo. Nani akoki koyoka yango?

Nguya ya kokanga na mabele mpe na lola epesamaki na eleko nyonso, mpe masolo ya makomi ya sembo ekomisaka mosala ya kokangama.

Mpe esalemaki ete tata na ngai, Lehi, akutaki lisusu likolo ya bapalaki ya motako mambi ma kala ya libota ya batata na ye; yango wana ayebaki ete azalaki eboto ya Yosefe; iyo, kutu Yosefe oyo azalaki mwana ya Yakobo, oyo atekamaki kati na Ejipito, mpe oyo abatelamaki na loboko ya Nkolo, ete akoka kobatela tata na ye, Yakobo, mpe bato ya ndako na ye mobimba uta na liwa ya nzala.

Lehi amoni molongo ya libota na ye kati na bapalaki ya motako mpe ayebi ete auti na Yosefe ya Ejipito.

Tala, bana mibali na ngai, nazali na mposa ete bomikundola kobomba mitindo ya Nzambe; mpe nalingi ete bosakola epayi ya bato maloba oyo. Tala, napesi epayi na bino nkombo ya baboti na biso ya yambo baoyo bayaki uta na mboka ya Yelusaleme; mpe oyo nasali yango mpo ete ntango bokomikundola nkombo na bino bokoka komikundola bango; mpe ntango bokomikundola bango bokoka komikundola misala na bango; mpe ntango bokomikundola misala na bango bokoka koyeba ete elobami, mpe lisusu ekomami, ete ezalaki malamu.

Elamani apesaki bana na ye ya mibali bankombo ya bankoko ya sembo mpo ete kokanisa bankombo na bango ekundolisa bango bolamu ya bankoko na bango.

Sikawa Adama alobaki lisakoli oyo, wana efulamaki ye na Molimo Mosantu, mpe mambi ma kala ya libota ya bana ya Nzambe bobatelamaki. Mpe oyo ezalaki buku ya bankola ya Adama, kolobaka: Na mokolo oyo Nzambe akelaki moto, na elilingi ya Nzambe nde akelaki ye;

Banda na mikolo ya Adama, molongo ya libota ya bana ya Nzambe ebatelamaki, lisolo ya makomi ya libota ya yambo oyo ekomamaki.

Kasi masolo ya makomi ya batata, kutu bankoko, mpo na oyo etali makoki ya Bonganganzambe, Nkolo Nzambe na ngai abatelaki na maboko na ngai moko; boye boyebi ya ebandeli ya bokeli, mpe lisusu ya minzoto minene, mpe ya minzoto, lokola eyebisamaki epayi ya batata, soki nabombaki kino na mokolo oyo, mpe nakosala makasi ya kokoma boko makambo oyo likolo ya lisolo ya makomi oyo, mpo na litomba ya bana na ngai oyo bakoya nsima na ngai.

Abalayama abatelaki masolo ya makomi ya batata na ye mpe akomaki mpo na bolamu ya bakitani na ye.

Malongi mpe Mayokani 128:18

Joseph Smith, na mokanda moko epai ya Basantu

Nakokaki kopesa bobongoli ya polele koleka mpo na eye, kasi lokola etiami awa ezali polele na lolenge ya kokoka mpo na kokokisa ntina na ngai. Ebongi malamu koyeba, mpo na likambo oyo, ete mabele makobetama na bolakeli mabe longola se soki mokangano ya kokangisa bato ya lolenge moko to mosusu kati na batata mpe bana, na likambo moko to mosusu—mpe tala nini ezali likambo yango wana? Ezali libatisi mpo na bakufi. Mpo biso, soki bazali te, tokoki te kokomisama bato babongi nie; bango mpe bakoki te kokomisama bato babongi nie soki tozali te. Bango bakoki te, biso mpe lokola kokomisama bato babongi nie soki baoyo wana lisusu bakufaki kati na nsango malamu bazali te; mpo esengeli na ebandeli ya eleko ya litondi ya ntango, oyo eleko ezali sikawa kobanda kobandisa, ete bomoko ya mobimba mpe ya ndambo te mpe ya kobonga nie, mpe bosangisi esika moko ya bileko, mpe bafungola, mpe banguya, mpe bankembo esengeli kosalema, mpe kobimisama uta na mikolo ya Adama kutu kino na ntango ya lelo. Mpe bobele oyo te, kasi makambo oyo wana ebimisami ata mokolo moko te uta na ebandeli ya mokili, kasi ebatelami ya kobombama mosika na bato ya bwania mpe bato ya mayele, ekobimisama epayi ya bana mike mpe baoyo bazali komelisama libele kati na oyo eleko, eleko ya litondi ya ntango.

Mosala mpo na bakufi ezali “mokangano ya kokangisa” oyo esangisaka bankola na bomoko moko ya kobonga nie.

Malongi mpe Mayokani 128:22

Joseph Smith, na mokanda moko epai ya Basantu

Bandeko mibali bandimi, ekotia biso molende te na likambo ya ntina monene ya boye? Bokende liboso kasi bozonga nsima te. Boyika mpiko, bandeko mibali bandimi; mpe bokende liboso, liboso na elonga! Tika ete mitema na bino esepela, mpe ezala na esengo mingi koleka mpenza. Tika ete mabele mapasuka na koyembaka. Tika ete bakufi basakola nzembo ya bosanzoli ya seko na Mokonzi Emanuele, oyo akulaki, liboso ete mokili ezala, oyo ekokaki kopesa biso makoki ya kosikola bango uta na boloko na bango; mpo bakangemi bakokangolama.

Libiangi ya esengo ya Joseph Smith mpo na kokende liboso na kosikola bakufi, mpo bakangemi bakokangolama.

Malongi mpe Mayokani 128:24

Joseph Smith, na mokanda moko epai ya Basantu

Tala, mokolo monene ya Nkolo ezali koya na lombangu; mpe nani akoki kotikala mokolo ya boyei na ye, mpe nani akotelema ntango akomonana? Mpo azali lokola moto ya monetoli mabende, mpe lokola sabuni ya mosukoli bilamba; mpe akofanda lokola monetoli mpe mopetoli ya mpauni, mpe akopetola bana mibali ya Lewi, mpe akosukola bango lokola wolo mpe lokola mpauni, ete bakoka kobonza epayi ya Nkolo libonza na bosembo. Boye, tika ete biso, lokola eklezia mpe lokola bato, mpe lokola Basantu ya Mikolo ya Nsuka, tobonza epayi ya Nkolo libonza na bosembo; mpe tika tolakisa na tempelo na ye esantu, ntango esili, buku moko oyo ezali na masolo ya makomi ya bakufi na biso, oyo ekozala elongobani mpo na bondimami nyonso.

Basantu babengami mpo na kolakisa na tempelo buku moko oyo ebongi, oyo ezali na masolo ya makomi ya bakufi na bango.