Na vuna eda vakayacora kina na itukutuku ni matavuvale

3 Nifai 25:5–6

Jisu Karisito, ni cavuta na vosa i Malakai vei ira na Nifaiti

Raica, au na talai Ilaija na parofita e liu vei kemuni, ni bera ni qai lako mai na siga levu ka rerevaki ni Turaga ko ya; Ena vagolea ko koya na lomadra na qase kivei ira na gone, kei na lomadra na gone kivei ira na nodra qase, de’u na qai lako mai ka yavita na vuravura ena dua na cudru.

E cavuta tale na iVakabula sa tucake tale na yalayala i Malakai me baleti Ilaija vei ira na tamata ena veivanua e Amerika, ka vakaraitaka kina na kena bibi.

Raica, au na vakatakila vei iko na Matabete, ena ligai Ilaija na parofita, ni se bera ni qai yaco mai na siga levu ka rerevaki ni Turaga. Ka na tea ko koya e lomadra na gone na yalayala a caka vei ira na qase, ka na gole na lomadra na gone vei ira na nodra qase. Kevaka e sega ni vakakina, sa na vakarusai sara na vuravura taucoko ni sa lako mai ko koya.

Na vosa i Malakai me vaka e cavuta o Moronai: ena vakalesuya mai o Ilaija na lewa ni matabete ka tea ena lomadra na gone na yalayala a caka vei ira na nodra qase.

Josefa Simici—Ai Tukutuku 1:38–39

Josefa Simici, ni tukuna tale na vosa i Moronai

Sa cavuta talega na tikina e lima me vakaoqo: Raica, au na vakatakila vei iko na Matabete, ena ligai Ilaija na parofita ni se bera ni qai yaco mai na siga levu ka rerevaki ni Turaga. A duatani talega na nona cavuta na tikina ka tarava: Ka na tea ko koya e lomadra na gone na yalayala a caka vei ira na qase, ka na gole na lomadra na gone vei ira na nodra qase. Kevaka e sega ni vakakina, sa na vakarusai sara na vuravura taucoko ena nona lako mai.

Na itukutuku nei Josefa Simici me baleta na nona cavuta vua o Moronai ena 1823 na parofisai i Malakai me baleti Ilaija.

Ni sa tabogo yani na raivotu oqo, sa tadola tale mai vei keirau e dua na raivotu bibi ka lagilagi; sa wavutu e matai keirau ko Ilaija na parofita ka a kau cake bulabula ki lomalagi, a sa kaya: Raica, sa yaco mai na taucoko ni gauna, ka tukuna ko Malakai—ka a vakadinadinataka ni na talai mai ko koya [Ilaija], ni bera ni qai yaco na siga levu ka rerevaki ni Turaga— Me vagolea na lomadra na qase vei ira na gone, kei na lomadra na gone vei ira na nodra qase, io de na qai cudruvi na vuravura taucoko ena veivakarusai— O koya, sa soli kina ki ligamudrau na idola ni itabagauna oqo; ia ena veika oqo drau na kila kina ni sa voleka sara ni yaco na siga levu ka rerevaki ni Turaga, io sa tu mai katuba.

E rairai mai o Ilaija ena Valetabu e Kirtland ena 1836 ka solia na idola ni cakacaka oqo vei Josefa Simici kei Oliva Kaudere.

Vunau kei na Veiyalayalati 98:16

Na Turaga, mai vei Josefa Simici

O koya mo dou cata sara kina na ivalu ka vunautaka na veisaututaki, ka segata vagumatua sara mo dou vagolea na lomadra na gone vei ira na nodra qase, kei na lomadra na qase vei ira na gone;

E vakaroti ira na Yalododonu na Turaga me ra cakacaka vakaukauwa me vukici na lomadra na gone ki vei ira na qase, kei na lomadra na qase ki vei ira na gone.

Vunau kei na Veiyalayalati 138:47–48

Josefa F. Simici, ni vakamacalataka na nona raivotu me baleti ira na mate

Ko Ilaija na parofita ena mai tea e yalodra na gone na yalayala a caka vei ira na nodra qase, Sa tukuna rawa tiko kina na cakacaka cecere me na vakayacori ena veivaletabu ni Turaga ena itabagauna ni taucoko ni gauna, me baleta na nodra vueti na mate, kei na nodra vauci na gone vei ira na nodra itubutubu, ia, kevaka e sega ena cudruvi na vuravura taucoko ka vakarusai ni sa lako mai ko koya.

Na itavi i Ilaija a vakaraitaka taumada na cakacaka ni valetabu me baleti ira na mate kei na nodra vauci na gone vei rau na nodra itubutubu.

Oqo, me baleta na ituvaki ni yalo ena maliwa ni mate kei na tucake tale—Raica, sa vakaraitaka oti vei au e dua na agilosi, ni yalo ni tamata kecega, ena gauna ga era biuta kina na yago mate oqo, io, na yalo ni tamata kecega, se era vinaka se ca, era na kau lesu ki na nodra itikotiko vua na Kalou o koya ka a solia vei ira na bula. Ia ena qai yaco ni yalodra ko ira era sa ivalavala dodonu, era na ciqomi ena dua na itutu ni marau, ka vakatokai ko parataisi, e dua na itutu ni vakacegu kei na veisaututaki, na vanua era na vakacegu kina mai na nodra leqa kecega, kei na ka kece era dau kauwaitaka, kei na nodra rarawa.

E vakavulica o Alama ni ra bula tiko ga na yalo ni oti na mate, ka ra curu o ira na yalododonu ki na ituvaki ni vakacegu e vakatokai na parataisi.

Vunau kei na Veiyalayalati 137:7–9

Na Turaga, ena dua na raivotu vei Josefa Simici

A sa rogo mai vei au na domo ni Turaga ka kaya: Ko ira kecega sa mate ni ra se bera ni rogoca na kosipeli, io ko ira a rawa me ra vakabauta kevaka a vakatarai me ra bula tiko, era na vakaivotavota ena matanitu silesitieli ni Kalou; Ko ira tale ga era qai mate oqo ka lako yani ka ra sega ni bau rogoca, o ira a rawa me ra vakabauta ena yalodra taucoko, era na vakaivotavota ena matanitu ko ya; Ni koi Au na Turaga, au na lewai ira na tamata kecega me vaka na nodra cakacaka, me vaka na gagadre ni lomadra.

O ira era mate ka sega ni rogoca na kosipeli ia era na ciqoma ke ra rogoca era sega ni sogoti tani; e lewa na Kalou me vaka na gagadre ni loma.

Vunau kei na Veiyalayalati 138:11

Josefa F. Simici, ni vakamacalataka na nona raivotu me baleti ira na mate

Ni’u sa vakananuma tiko na veika sa volai oqo, sa dolavi na mata ni yaloqu, ka sa curumi au na Yalo ni Turaga, ka’u raici ira na lewevuqa era sa mate, na tamata lalai kei na turaga.

E tekivu na raivotu nei Peresitedi Josefa F. Simici ena 1918 me baleta na vuravura ni yalo ni vakasamataka tiko na ivolanikalou.

Vunau kei na Veiyalayalati 138:30

Josefa F. Simici, ni vakamacalataka na nona raivotu me baleti ira na mate

Ia raica, mai vei ira ga na buladodonu, a conaka kina ko koya na nona ilawalawa ka lesi ira na nona italai, era vakaisulu ena kaukauwa kei na dodonu, ka talai ira me ra lako yani ka kauta na rarama ni kosipeli ki vei ira era tu ena butobuto, io vei ira kecega na yalo ni tamata; ia sa vakaoqori na kena vunautaki na kosipeli vei ira na mate.

A tuvai ira na iVakabula na yalo yalododonu me ra kauta na kosipeli vei ira kece na mate.

Vunau kei na Veiyalayalati 138:32–34

Josefa F. Simici, ni vakamacalataka na nona raivotu me baleti ira na mate

A sa vakaoqori na vunautaki ni kosipeli vei ira sa mate ena nodra ivalavala ca, ka sega ni kila na ivakavuvuli dina, se ko ira sa talaidredre ka sega ni vakabauti ira na parofita. Sa vakavulici me ra vakabauta na Kalou, veivutuni mai na ivalavala ca, veisosomitaki ena papitaiso me baleta na bokoci ni ivalavala ca, kei na isolisoli ni Yalo Tabu ena veitabaki ni liga. Kei na ivakavuvuli kece tale ni kosipeli e yaga me ra kila me qai rawa kina ni ra lewai me vaka na tamata ena bula vakayago, ia me ra bula me vaka na Kalou ena yalodra.

Era vakavulici na yalo ena vuravura ni yalo ena kosipeli taucoko, wili kina na papitaiso ena veisosomitaki.

Vunau kei na Veiyalayalati 138:53–54

Josefa F. Simici, ni vakamacalataka na nona raivotu me baleti ira na mate

Na Parofita ko Josefa Simici, kei na tamaqu, ko Airame Simici, ko Biriqemu Yaga, Joni Teila, Wilivote Uturavu kei na vuqa tale na tamata digitaki ka ra a maroroi tu me ra qai lako mai ena taucoko ni gauna, ka mai tura na yavu ni dua na cakacaka levu ni gauna oqo. E okati kina na tara ni veivaletabu kei na qaravi ni veicakacaka vakalotu e loma me baleta na nodra vueti na mate, era a tu talega ena vuravura ni yalo.

Era a maroroi na yalo digitaki me ra tauyavutaka na cakacaka ni gauna edaidai, wili kina na veivaletabu kei na cakacaka vakalotu me baleti ira na mate.

Vunau kei na Veiyalayalati 138:57–59

Josefa F. Simici, ni vakamacalataka na nona raivotu me baleti ira na mate

Au raici ira na italatala qase ni itabagauna oqo, ni ra sa biuta na bula oqo, era a tomana tiko na nodra cakacaka ni kena vunautaki na kosipeli ni veivutuni kei na veivueti, ena vuku ni nona Veisorovaki na Luvena e Duabau ga na Kalou, io vei ira sa tu ena butobuto, kei ira sa bobula ki na ivalavala ca ena vuravura ni yalo. Raica era na vueti ko ira na mate era sa veivutuni, kevaka era sa talairawarawa ki na cakacaka vakalotu sa vakayacori ena vale ni Kalou. Ia ni ra sa sauma oti na isau ni nodra talaidredre, ka ra sa vakasavasavataki, era na qai tauca na kedra isau me vaka na nodra ivalavala, ni ra sa itaukei ni veivakabulai.

Era vakavuvuli tiko ga o ira na yalodina ni oti na mate, ka ra vueti na mate era veivutuni ena cakacaka vakalotu ni valetabu.

Ia era sa lako mai na yalo kecega era a tu ena vale ni veivesu, era sa mai tu ena liga imatau ni Kalou; ia ko ira na kena vo era sa maroroi tu ena sinucodo ni butobuto me yacova ni ra sa lewai ena siga sa levu ko ya.

Ena raivotu i Inoki, era lako mai na yalo ena valeniveivesu ki na liga i matau ni Kalou ena vuku ni cakacaka ni iVakabula.

Vunau kei na Veiyalayalati 124:29–30

Na Turaga, mai vei Josefa Simici

Raica sa sega tu e vuravura na tobu ni papitaiso, io me ra papitaisotaki kina ko ira na noqu yalododonu ena vukudra na sa mate— Raica sa rawa wale ga ni vakayacori na cakacaka vakalotu oqo ena noqu vale, ia au na qai vakadonuya wale ga kevaka e caka ena noqu vale, vakavo ga ena gauna ni nomudou dravudravua, ka dou na sega kina ni rawa ni tara e dua na vale vei au.

E kaya na Turaga ni papitaiso me baleti ira na mate e baleta na Nona valetabu.

Vunau kei na Veiyalayalati 128:5

Josefa Simici, ena dua na ivola vei ira na Yalododonu

Dou na nanuma beka ni sa rui matailalai na ivakarau ni veika oqo; ia me’u tukuna vei kemudou, sa muri ga kina na inaki ni Kalou, ena kena muri na cakacaka vakalotu kei na vakavakarau sa vakarautaka ka lesia na Turaga ni sa bera ni tauyavutaki ko vuravura, me baleta na nodra vakabulai na mate era a mate ka sega ni kila e dua na ka me baleta na kosipeli.

Na nodra vakabulai o ira era mate ka sega ni kila na kosipeli a vakarautaki ni se bera ni buli na vuravura.

Vunau kei na Veiyalayalati 128:15

Josefa Simici, ena dua na ivola vei ira na Yalododonu

Ia oqo, oi kemuni na taciqu kei na ganequ lomani, meu vakadeitaka mada vei kemuni ni sai ira oqo na ivakavuvuli e baleti ira na mate kei ira na bula eda na sega ni rawa ni raica vakamamada, me vaka ni sa baleta na noda vakabulai. Ni sa yaga ka veiganiti ki na noda vakabulai na nodra vakabulai, me vaka sa tukuna ko Paula me baleti ira na qase—kevaka e sega o keda, e ra na sega ni vakavinakataki rawa—ia kevaka e sega o ira na wekada era sa mate, e da na sega ni vakavinakataki.

E vauci vata na noda vakabulai kei na nodra vakabulai na noda qase; e sega ni vakavinakataki e dua ke sega na kena dua tale.

Vunau kei na Veiyalayalati 132:46

Na Turaga, mai vei Josefa Simici

Ia e dina, e dina, au sa kaya vei iko, a ka kecega ko sa vauca e vuravura ena vauci mai lomalagi; ia na ka kecega ko sa vesuka e vuravura, ena yacaqu kei na noqu vosa, sa kaya na Turaga, ena vesuki tawamudu mai lomalagi; ia na ivalavala ca ni tamata yadua ko sa bokoca e vuravura ena bokoci tawamudu mai lomalagi; ia na ivalavala ca ni tamata yadua ko sa sega ni sereka e vuravura, ena sega ni sereki mai lomalagi.

E vakadeitaka na Turaga ni ka e vauci e vuravura ena Nona lewa e vauci tawamudu mai lomalagi.

Vunau kei na Veiyalayalati 127:6–7

Na Turaga, ena dua na ivola mai vei Josefa Simici

Sa kaya vakaidina vakaoqo vei kemudou na Turaga me baleti ira na nomudou mate: Kevaka e dua vei kemudou sa papitaisotaki ena vukudra na nomudou mate, sa kilikili me dua na vunivola, ia me raica ko koya ka vakadinadinataka na nomudou veipapitaisotaki; me rogoca sara e daligana, me ivakadinadina ni ka dina, sa kaya na Turaga; Ia na veika dou sa vola me volai tale ga mai lomalagi; io na ka kecega dou sa vauca e vuravura, sa vauci mai lomalagi; a ka kecega dou sa sereka e vuravura, ena sereki mai lomalagi.

Na papitaiso ena veisosomitaki me tiko kina na ivakadinadina ka volai, me volai talega kina mai lomalagi.

Vunau kei na Veiyalayalati 128:8

Josefa Simici, ena dua na ivola vei ira na Yalododonu

Ia, na yavu ni cakacaka vakalotu oqo sa koto ga ena kaukauwa ni matabete, mai na ivakatakila nei Jisu Karisito, sa rawa kina me vauci mai lomalagi na veika sa vauci e vuravura, kei na veika kecega dou sa sereka e vuravura ena sereki mai lomalagi. Se, ena dua tale na kena itukutukuni, ena dua tale na kena ivakavakadewa, na veika kecega dou vola e vuravura ena volai mai lomalagi, ia na veika dou na sega ni vola e vuravura, ena sega ni volai mai lomalagi; ni ra na lewai mai na ivola na nomudou mate, me vaka na nodra dui cakacaka, se era a cakava sara ga o ira vakataki ira na nodra cakacaka vakalotu, se ena dua tale na kena sala, mai vei ira era veisosomitaki ena vukudra, me vaka na cakacaka vakalotu sa vakarautaka tu na Kalou me baleti ira mai na tauyavutaki ni vuravura, me vaka na itukutukuvolai era sa maroroya tu mai me baleti ira na nodra mate.

Na cakacaka vakalotu e volai e vuravura ena lewa ni matabete e volai mai lomalagi, se ciqomi vakataki koya se ena veisosomitaki.

Vunau kei na Veiyalayalati 128:9

Josefa Simici, ena dua na ivola vei ira na Yalododonu

Ena kena irairai beka vei ira eso ni sa rui ivunau kaukauwa eda veivosakitaka tiko oqo—e dua na kaukauwa e vola se vauca vata e vuravura ka vauca vata talega mai lomalagi. Ia ena veitabayabaki kece ni vuravura, ni sa solia na Turaga e dua na itabagauna ni matabete vua e dua na tamata ena ivakatakila, se ki na dua na umatamata, sa dau soli kina na kaukauwa oqo, Ia, na veika kecega era vakayacora na tamata oqori ena dodonu e tu vei ira, ena yaca ni Turaga, ka ra vakayacora dina sara ena yalodina, ka maroroya toka e dua na kena itukutukuvolai dodonu ka dina, sa yaco me lawa e vuravura ka vakakina mai lomalagi, ka na sega ni rawa ni bokoci, me vaka na nona lawa ko Jiova cecere. Oqo e dua na ivosavosa yalodina. O cei e rawa ni rogoca?

Na kaukauwa me vauci e vuravura kei lomalagi sa soli ena itabagauna kece, ka na itukutukuvolai dina e vakadeitaka na cakacaka.

Ka sa yaco ni sa kunea talega ena peleti parasa, ko Liai na tamaqu, na nodra itukutuku ni kawa na nona qase; ka sa kila kina ni sa kawa i Josefa ko koya; io, ko Josefa na luvei Jekope, ka a volitaki ki Ijipita, ka a maroroi mai na liga ni Turaga, me na maroroi Jekope, na tamana, kei ira kece na nona lewe ni vale me ra kua ni rusa ena dausiga.

E kunea o Lihai na nona ivola ni kawa ena peleti parasa ka kila ni kawa i Josefa mai Ijipita.

Raica, oi kemudrau na luvequ, au sa gadreva mo drau dau nanuma mo drau dau maroroya na ivunau ni Kalou; ka’u gadreva mo drau tukuna tale ga vei ira na tamata na veivosa oqo. Raica au sa solia vei kemudrau na yacadrau na noda itubutubu taumada ka rau a lako mai na vanua ko Jerusalemi; au sa kitaka oqo mo drau daunanumi rau kina ena gauna drau dau nanuma kina na yacamudrau; ia ni drau sa nanumi rau, mo drau nanuma tale ga na veika erau a cakava; ia ni drau sa nanuma na veika erau a cakava, mo drau kila ni sa cavuti ka volai tale tu ga, ni sa vinaka.

A vakatokai rau o Ilamani na luvena tagane me vaka na yaca ni nodrau qase yalododonu, me rau nanuma kina na nodra vinaka na nodrau qase ni rau nanuma na yacadrau.

Ia sa parofisaitaka na ka oqo ko Atama, ni sa vakauqeti koya kina na Yalo Tabu, ka sa maroroi kina e dua na itukutuku ni nodra kawa na luve ni Kalou. Sai koya oqo na ivola ni veitabatamata nei Atama, ka kaya: Ena siga sa bulia kina na tamata na Kalou, sa buli koya me ucuya na Kalou.

Mai na gauna i Atama a maroroi kina e dua na ivola ni kawa ni luve ni Kalou, na imatai ni itukutukuvolai ni matavuvale a volai.

Ia na kedra itukutuku na qase, ko ira na peteriaki, me baleta na ilesilesi ni Matabete, o koya sa maroroya kina e ligaqu, na Turaga na noqu Kalou; me kilai na itekivu ni veibuli, ka vakatalega kina na veivuravura, kei na veikalokalo, me vaka na kedra a vakatakilai vei ira na qase, au sa maroroya tu me yacova na siga oqo, ka’u sa na tovolea meu vola eso na veika oqori ena itukutuku oqo, me na yaga vei ira na noqu kawa era na qai muri mai vei au.

A maroroya o Eparama na itukutukuvolai ni nona qase ka vola me yaga vei ira na nona kawa.

Vunau kei na Veiyalayalati 128:18

Josefa Simici, ena dua na ivola vei ira na Yalododonu

Au rawa ni vakadewataka me matata cake sara mai na kena oqo na itukutuku oqo, ia na kena ituvaki mada ga oqo sa rauta vakavinaka na noqu inaki. Sa rauta mada ga me da kila, ena vuku ni tikina oqo, ni na vakanakuitataki ko vuravura ena dua na cudruvi, vakavo kevaka sa dua na isema kaukauwa, me umani ira vata na qase kei ira na gone, ena dua na ulutaga se dua tale—ia raica na ulutaga cava oqori? Na nodra papitaisotaki na mate. Ni da na sega ni rawa ni vakavinakataki sara koi keda kevaka e sega o ira; era na sega talega ni vakavinakataki sara ko ira kevaka e sega o keda. Ia era na sega ni vakavinakataki sara ko ira se koi keda, ke sega ko ira sa mate ka ra vakabauta tu na kosipeli; ni sa gadrevi me baleta na kena vakacurumi mai na itabagauna ni taucoko ni gauna, io na itabagauna sa tekivu tiko oqo na kena vakacurumi mai, me vakayacori mada e dua na veisemati e taucoko, ena nodra umani vata na itabagauna, na idola, kei na kaukauwa, kei na lagilagi, ka vakatakilai mai ena gauna i Atama ki na gauna oqo. Ia e sega walega ni o koya oqori, na veika e se bera ni vakatakilai mai na tauyavutaki ni vuravura, ia sa vunitaki tu mai vei ira na vuku ka lewa matau, ena vakatakilai vei ira na gonelalai kei ira na gone dramidrami ena gauna oqo, na itabagauna ni taucoko ni gauna.

Na cakacaka me baleti ira na mate na “isema kaukauwa” e semati ira vata na veiitabatamata me dua na veisemati vinaka sara.

Vunau kei na Veiyalayalati 128:22

Josefa Simici, ena dua na ivola vei ira na Yalododonu

Oi kemudou na wekaqu, me da kakua beka ni tomana tiko na inaki cecere vakaoqo? Me toso ki liu ka kakua ni suka ki muri. Na yaloqaqa, kemudou na wekaqu; ka toso tikoga ki liu, ki liu ki na qaqa! Me reki na lomamudou, ka marau vakalevu sara. Me kacabote mai ko vuravura ena lagasere. Me ra tukuna na mate na sere ni veivakacaucautaki tawamudu ki vua na Tui ko Imanueli, o koya sa lesia tu, ni bera ni buli ko vuravura, na veika ena rawa kina vei keda me da vueti ira tani mai na nodra valeniveivesu; io me ra sereki mai na nodra vesu tu.

Na nona kaci reki o Josefa Simici me da toso ki liu ena kena vueti na mate, ni ra na sereki na vesu.

Vunau kei na Veiyalayalati 128:24

Josefa Simici, ena dua na ivola vei ira na Yalododonu

Raica, sa voleka ni yaco mai na siga sa levu ni Turaga; ia ko cei ena yalodei ena siga ni nona lako mai, io ko cei me na tu rawa ni sa rairai mai ko koya? Raica sa vaka na nona bukawaqa na dausava koula ko koya, ka vaka na nodra sovu na dausava isulu; ia ena tiko ko koya me vaka e dua sa dau vakawaicalataka ka savata na siliva, ka na vakasavasavataki ira na kawa i Livai, ka savai ira me vaka na koula kei na siliva, me ra vakacabora kina vua na Turaga na ivakacacabo ena bula dodonu. Ia koi keda na lewenilotu, na Yalododonu Edaidai me da vakacabora vua na Turaga nai vakacacabo ena bula dodonu; me da kauta yani ki na nona valetabu, ni sa vakacavari, e dua na ivola ka lewena na kedra itukutukuvolai na noda mate, ka sa kilikili me ciqomi ena kena ivalavala kecega.

E sureti ira na Yalododonu me ra kauta yani ki na valetabu e dua na ivola kilikili ka lewena na itukutukuvolai ni nodra mate.