Ebɛnadze ntsi na yɛyɛ ebusua abakɔsɛm

3 Nephi 25:5–6

Jesus Christ, ɔrekã Malachi ne nsɛm akyerɛ Nephifo

Hwɛ, mobɔsoma nkɔnhyɛnyi Elijah ma brɛ hom ansaana Ewuradze ne da kɛse no a ɔyɛ hu no edu; Na ɔno na ɔbɛdandan egyanom hɔn akoma aba mba do, na mba hɔn akoma aba hɔn egyanom do, amma maammfa ndom mammbɔbɔ asaase no.

Agyenkwa a ɔasoɛr no san kã Malachi n’anohoba a ɔfa Elijah ho no kyerɛ nkorɔfo a wɔwɔ America asaase do, na ɔkyerɛ mbrɛ ohia.

Hwɛ, mubodua Elijah nkɔnhyɛnyi no ne nsa do ada Asɔfodzi no edzi akyerɛ hom, ansaana Ewuradze ne da kɛse no a ɔyɛ hu no aba. Na ɔdze anohoba a wɔdze bɔɔ egyanom no bɛhyɛ mba no hɔn akoma mu, na mba no hɔn akoma bɛdan akɔ hɔn egyanom do. Sɛ ɔnntse dɛm a, ber a ɔbɛba no wɔbɛsɛɛ asaase nyina koraa.

Mbrɛ Moroni kãa Malachi ne nsɛm: Elijah bɛsan dze asɔfodzi tumdzi aba na ɔdze anohoba a wɔbɔɔ egyanom no ahyɛ mba hɔn akoma mu.

Joseph Smith—Abakɔsɛm 1:38–39

Joseph Smith, ɔresan akã Moroni ne nsɛm

Na bio, ɔserɛe kãa nkyekyɛmu enum no so dɛ: Hwɛ menam Elijah nkɔnhyɛnyi no ne nsa do bɛda Asɔfodzi no edzi akyerɛ wo, ansaana Ewuradze ne da kɛse no a ɔyɛ hu no aba. Ɔsesãa nkyekyɛmu a odzi do no mu nsɛm no so na ɔserɛe kãa dɛ: Na ɔdze anohoba a wɔdze bɔɔ egyanom no bɛhyɛ mba hɔn akoma mu, na mba no hɔn akoma bɛdan akɔ hɔn egyanom hɔ. Sɛ annyɛ dɛm a, ber a Ewuradze bɛba no asaase no bɛsɛɛ koraa.

Joseph Smith n’asɛm a ɔfa mbrɛ Moroni kãa Malachi ne nkɔnhyɛ a ɔfa Elijah ho no kyerɛɛ no wɔ 1823.

Ber a wɔtoow enyido-adzehu yi mu no, enyido-adzehu kɛse bi so a ɔyɛ enyimnyam baa hɛn do; na Elijah, nkɔnhyɛnyi no, nyia wɔfaa no kɔr sor a ɔannsɔ owu annhwɛ no, begyinaa hɛn enyim, na ɔsee dɛ: Hwɛ, mber no asõ koraa, dza Malachi dze n’ano kãe no—dze gyee dase dɛ ɔno [Elijah] na wɔbɔsoma no ma ɔaaba, ansaana Ewuradze ne da kɛse a ɔyɛ hu no asõ— Na ɔbɛdandan egyanom hɔn akoma aba mba do, na mba hɔn akoma aba hɔn egyanom do, amma maammfa ndom ammbɔbɔ asaase no— Dɛm ntsi, dɛm mberano yi ho nsaafee no wɔdze ahyɛ hom nsa; na iyi bɛma hom ehu dɛ Ewuradze ne da kɛse a ɔyɛ hu no abɛn, oedu mbobow no ano mpo.

Elijah pue wɔ Kirtland Temple wɔ 1836 na ɔdze edwuma yi ne nsaafee hyɛ Joseph Smith nye Oliver Cowdery nsa.

Nkyerɛkyerɛ na Ahyɛmudzi 98:16

Ewuradze, ɔnam Joseph Smith do

Dɛm ntsi, hom mpow ɔkõ na hom mbɔ asomdwee ho dawur, na hom mper enyiberdo dɛ hom bɛdan mba hɔn akoma dze akɔ hɔn egyanom do, na egyanom akoma dze akɔ mba do;

Ewuradze ka kyerɛ Ahotseweefo no dɛ wɔmbɔ mbɔdzen nyɛ edwuma ama mba nye egyanom hɔn akoma adan aba hɔn ho do.

Nkyerɛkyerɛ na Ahyɛmudzi 138:47–48

Joseph F. Smith, ɔrekyerɛkyerɛ n’enyido-adzehu a ɔfa ewufo ho mu

Nkɔnhyɛnyi Elijah na ɔdze anohoba a wɔbɔe kyerɛɛ egyanom no bɛhyɛ mba hɔn akoma mu, Ɔkyerɛ dwuma kɛse a ndaamba wobedzi wɔ Ewuradze ne temple horow no mu wɔ mberano ne mãhyɛ mu, dze apon ewufo nkwa, na wɔdze asɔw mba ano ama hɔn awofo amma wɔaammfa ndom annsɛɛ wiadze nyina wɔ ne mbae no mu.

Elijah ne dwuma no kyerɛɛ temple edwuma a wɔyɛ ma ewufo nye mba a wɔsɔw hɔn ano ma hɔn awofo no ho nsɛnkyerɛnee.

Afei, ɔfa ɔkra ne tsebew wɔ owu na owusoɛr ntamu no—Hwɛ, ɔbɔfo ama mehu dɛ sɛ nyimpa wu a ntsɛmara hɔn esunsum fi no nyimpadua a ɔnnkyebo yi mu, nyew, nyimpa nyina hɔn esunsum, dɛ wɔyɛ papa anaa bɔn no, san kɔ fie wɔ Nyankopɔn a ɔdze nkwa no maa hɔn no ne nkyɛn. Nna afei ɔbɛba dɛ hɔn a wɔyɛ atseneneefo no, wɔbɛgye hɔn esunsum akɔ enyigye tsebew a wɔfrɛ no paradise, ahomgye tsebew na, asomdwee tsebew mu, hɔ na wɔbɔhom efi hɔn haw, nye adwendwen, nye awerɛhow nyina mu.

Alma kyerɛkyerɛ dɛ esunsum kɔ do tse ase wɔ owu ekyir, na atseneneefo kɔ ahomgye tebea a wɔfrɛ no paradise mu.

Nkyerɛkyerɛ na Ahyɛmudzi 137:7–9

Ewuradze, wɔ enyido-adzehu a ɔdze maa Joseph Smith mu

Dɛm na Ewuradze ne ndze baa mo hɔ dɛ: Hɔn a woewuwu nyina a woennya asɛmpa yi ho nyimdzee no, a sɛ wɔmaa wɔtsenaa ase a, nkyɛ wɔbɛgye no nyina bɛyɛ Nyankopɔn ne celestial ahenman no mu adzedzifo; Hɔn so a wobowu fi ndɛ dze kɔ no, a woennya ho nyimdzee no, a sɛ wonyae a, nkyɛ wɔdze hɔn akoma nyina bɛgye no, bɛyɛ dɛm ahenman no mu adzedzifo; Na Emi, Ewuradze mubobu nyimpa nyina atsɛn dɛ mbrɛ hɔn ndwuma tse, dɛ mbrɛ hɔn akoma ne pɛ tse.

Hɔn a wowui a wɔantse asɛmpa no naaso anka wɔbɛgye ato mu no, wɔnnto hɔn mfi hɔ; Nyame dze akoma ne pɛ na ebu atsɛn.

Nkyerɛkyerɛ na Ahyɛmudzi 138:11

Joseph F. Smith, ɔrekyerɛkyerɛ n’enyido-adzehu a ɔfa ewufo ho mu

Na ber a morodwendwen dɛm ndzɛmba yinom a wɔakyerɛw ho no, wobuee me ntseasee enyiwa, na Ewuradze no Sunsum besii mo do, na muhun ewufodɔm, nkakraba nye akɛse.

President Joseph F. Smith n’enyido-adzehu a ɔfa sunsum wiadze ho wɔ 1918 no fi ase ber a ɔredwendwen ekyerɛwsɛm ho.

Nkyerɛkyerɛ na Ahyɛmudzi 138:30

Joseph F. Smith, ɔrekyerɛkyerɛ n’enyido-adzehu a ɔfa ewufo ho mu

Mbom hwɛ, oyii binom fii atseneneefo no mu, ɔboaboaa no dɔm ano na oyii asomafo, na ɔdze tum na tumdzi, ɔmaa hɔn tum dɛ wɔmfa asɛmpa ne kan no nkɛma hɔn a wɔwɔ sum no mu, nyimpa esunsum nyina mpo; na dɛm kwan no do na wɔnam dze kãa asɛmpa no kyerɛɛ ewufo no.

Agyenkwa no hyehyɛɛ esunsum atseneneefo ma wɔdze asɛmpa no kɔɔ ewufo nyina hɔ.

Nkyerɛkyerɛ na Ahyɛmudzi 138:32–34

Joseph F. Smith, ɔrekyerɛkyerɛ n’enyido-adzehu a ɔfa ewufo ho mu

Dɛm na wɔnam kãa asɛmpa no kyerɛɛ hɔn a woennya no ho nyimdzee na wowui wɔ hɔn bɔn mu, anaadɛ hɔn a wɔpoow nkɔnhyɛfo no na wowui wɔ hɔn mbrato mu no. Woyinom na wɔkyerɛkyerɛɛ hɔn gyedzi wɔ Nyame mu, bɔn ho nnuho, hɔn a wonuma hɔn ma ewufo dze kɔ bɔnfakyɛ mu, nsa a wɔdze gu tsir do dze nya Sunsum Krɔnkrɔn n’akyɛdze no, Nye asɛmpa ne fapem nyina so a no ho hia a ɔsɛ dɛ wohu ana wɔafata ma woeebu hɔn atsɛn dɛ nyimpa a wɔwɔ honam mu, ma wɔaatsena ase dɛ mbrɛ Nyame ne pɛ tse wɔ sunsum mu.

Wɔkyerɛkyerɛ esunsum a wɔwɔ sunsum wiadze no asɛmpa no nyina, a enuma a wɔyɛ ma ewufo ka ho.

Nkyerɛkyerɛ na Ahyɛmudzi 138:53–54

Joseph F. Smith, ɔrekyerɛkyerɛ n’enyido-adzehu a ɔfa ewufo ho mu

Nkɔnhyɛnyi Joseph Smith nye m’egya, Hyrum Smith, Brigham Young, John Taylor, Wilford Woodruff, nye esunsum binom so a wɔasan mu eyi hɔn a woesiesie hɔn esie dɛ wɔbɛba wɔ ne mberano mu ebosuo mu ma wɔaatow dwuma a wobedzi wɔ da kɛse a odzi ekyir mu ne fapem, A temple ne nsisii, na ayɛdze ne nyɛe wɔ mu dze apon ewufo nkwa no, hɔn so wɔ sunsum wiadze no mu kã ho.

Wɔkoraa esunsum a wɔayi hɔn dɛ wɔbɛtow nda a odzi ekyir edwuma no fapem, a temple horow nye ayɛdze ma ewufo ka ho.

Nkyerɛkyerɛ na Ahyɛmudzi 138:57–59

Joseph F. Smith, ɔrekyerɛkyerɛ n’enyido-adzehu a ɔfa ewufo ho mu

Muhun dɛ elderfo agyedzifo a wɔwɔ mberano yi no mu no, sɛ wofi asetsena a ɔnnkye bo no mu a, wɔnam Nyame ne Ba a Wɔwoo no Kortoo no no werdambɔ no do sɔw hɔn edwuma do kã asɛmpa no a ɔfa nnuho na ɔpon ho no wɔ hɔn a wɔwɔ sum mu na wɔhyɛ bɔn nkowaasom ase wɔ ewufo esunsum wiadze kɛse no mu. Ewufo a wonu hɔnho no, wɔnam Nyankopɔn ne fie mu yɛdze ho setsie do wɔbɔpon hɔn. Na sɛ wotua hɔn mbrato ho kaw no wie, na wɔhohor hɔn ma hɔn ho tsew a, hɔn nsa bɛkã hɔn akatua dɛ mbrɛ hɔn ndwuma tse, osiandɛ wɔyɛ nkwagye mu adzedzifo.

Anokwafo kɔ do kyerɛkyerɛ wɔ owu ekyir, na ewufo a wonu hɔnho no, wɔnam temple ayɛdze do pon hɔn.

Na esunsum pii a wogu efiadze no puei bae, na wobegyinaa Nyankopɔn n’abanyimfa; na hɔn a wɔaka no wɔdze hɔn ahyɛ sum nkɔnsɔnkɔnsɔn mu ekodu atsɛmbu da kɛse no.

Enoch n’enyido-adzehu mu no, esunsum a wɔwɔ efiadze ba Nyame ne nsa nyimfa do, a ɔfa Agyenkwa n’edwuma ho.

Nkyerɛkyerɛ na Ahyɛmudzi 124:29–30

Ewuradze, ɔnam Joseph Smith do

Na enuma bura no dze, bi nnyi asaase do a m’ahotseweefo begyina mu enuma dze ama hɔn a woewu no— Osiandɛ ayɛdze yi wɔyɛ no me fi nko mu, na mennkɛgye ato mu, gyedɛ hom hia nda mu nko, ber a hom nnkotum esi ofi ama me no.

Ewuradze ka dɛ enuma a wɔyɛ ma ewufo no wɔ dɛ ɔyɛ wɔ Ne temple mu.

Nkyerɛkyerɛ na Ahyɛmudzi 128:5

Joseph Smith, wɔ krataa a ɔkyerɛw kɛmaa Ahotseweefo no mu

Hom bɔdwen dɛ nhyehyɛɛ yi yɛ soronko dodow; na mbom hom mma menkã nkyerɛ hom dɛ ɔyɛ Nyame ne pɛ ho nhyehyɛɛ dɛ yɛbɛyɛ dze edzi ayɛdze nye mboaboaho a Ewuradze hyehyɛɛ too hɔ dada ansaana wɔrotow wiadze ne fapem, dze ama ewufo hɔn nkwagye, hɔn a wobowu a woennya asɛmpa no ho nyimdzee no do.

Wɔhyehyɛɛ nkwagye ma hɔn a wowui a wɔnnyaa asɛmpa no ansaana wɔrobɔ wiadze.

Nkyerɛkyerɛ na Ahyɛmudzi 128:15

Joseph Smith, wɔ krataa a ɔkyerɛw kɛmaa Ahotseweefo no mu

Na afei, mo nuambanyin na me nkyerɛbaa adɔfo, hom mma minsi no pi nkã nkyerɛ hom dɛ, dɛm fapem yinom na ɔwɔ hɔ a ɔfa ewufo na atseasefo ho a ɔnnsɛ dɛ yebu hɛn enyi gu do, dza ɔfa hɛn nkwagye ho. Osiandɛ hɔn nkwagye hia na oye ma hɛn nkwagye so, dɛ mbrɛ Paul kãe wɔ egyanom ho dɛ—sɛ wokwetsi hɛn a Ewuradze remma wondzi mu—anaadɛ hɛn ewufo kwetsi hɛn a Ewuradze nnkɛma woedzi mu.

Hɛn nkwagye nye hɛn nananom hɔn nkwagye akyekyer abɔ mu; kor biara nnkotum nndzi mu a kor no nnka ho.

Nkyerɛkyerɛ na Ahyɛmudzi 132:46

Ewuradze, ɔnam Joseph Smith do

Na nokwar, nokwar, mese wo dɛ, biribiara a ebɔsɔw ano wɔ asaase do no wɔbɔsɔw ano wɔ sor; na biribiara a ebɛkyekyer wɔ asaase do wɔ me dzin mu na m’asɛm do no, wɔbɛkyekyer wɔ sor afebɔɔ, Ewuradze na ɔse; na obiara a edze no bɔn bɛkyɛ no wɔ asaase do no, wɔdze bɛkyɛ no wɔ sor afebɔɔ; na obiara a ammfa no bɔn annkyɛ no wɔ asaase do no wɔnnkɛfa akyɛ no wɔ sor.

Ewuradze si no pi dɛ dza wɔdze Ne tumdzi asɔw ano wɔ asaase do no, wɔasɔw ano daapem wɔ sor.

Nkyerɛkyerɛ na Ahyɛmudzi 127:6–7

Ewuradze, wɔ krataa a ofi Joseph Smith hɔ mu

Nokwar, dɛm na Ewuradze se hom a ɔfa hom ewufo ho: Sɛ hom mu biara gyina ma wonuma no dze ma hom ewufo a, ɔwɔ dɛ hom ma ɔkyerɛwfo wɔ hɔ, hom mma nankasa mfa n’enyi ngye hom enuma no ho dase; na hom mma nankasa mfa n’aso ntsie, ama oeetum agye dase nokwar mu, Ewuradze na ɔse; Ama dza hom bɛkyerɛw nyina no woeetum akyerɛw wɔ sor; biribiara a hom bɛkyekyer wɔ asaase do no wɔbɛkyekyer wɔ sor; biribiara a hom bɛsan wɔ asaase do no, wɔbɛsan wɔ sor;

Ɔwɔ dɛ adasegyefo gyina enuma a wɔyɛ ma ewufo ho na wɔkyerɛw, ama wɔakyerɛw no wɔ sor so.

Nkyerɛkyerɛ na Ahyɛmudzi 128:8

Joseph Smith, wɔ krataa a ɔkyerɛw kɛmaa Ahotseweefo no mu

Afei, dɛm ayɛdze yi no su wɔ asɔfodzi tum no mu dɛ mbrɛ Jesus Christ ne nyikyerɛ tse, dɛ biribiara a hom bɛkyekyer wɔ asaase do no, wɔbɛkyekyer wɔ sor, na biribiara so a hom bɛsan wɔ asaase do no, wɔbɛsan wɔ sor. Anaadɛ, sɛ yɛbɔhwɛ nkyerɛase no wɔ kwan fofor do a, biribiara a hom bɛkyerɛw wɔ asaase do no, wɔbɛkyerɛw wɔ sor, na biribiara a hom nnkɛkyerɛw wɔ asaase do no, wɔnnkɛkyerɛw wɔ sor; na dɛm nwoma no mu na wɔbɔhwɛ ebu hom ewufo atsɛn, dɛ mbrɛ hɔn ndwuma tse, na sɛ hɔnankasa na wɔbɛyɛ dɛm ayɛdze no ama hɔnho, anaadɛ hɔnankasa hɔn ananmusifo na wobegyina ayɛ ama hɔn, dɛ mbrɛ ayɛdze a Nyankopɔn ahyehyɛ ato hɔ dada dze ama hɔn nkwagye ansaana wɔrobɔtow wiadze fapem, dɛ mbrɛ nsɛm a wɔakyerɛw ato hɔ a ɔfa hɔn ewufo ho no tse.

Ayɛdze a wɔdze asɔfodzi tumdzi akyerɛw wɔ asaase do no, wɔakyerɛw wɔ sor, sɛ ɔno ankasa na onyaa anaa ɔnam ananmusifo do.

Nkyerɛkyerɛ na Ahyɛmudzi 128:9

Joseph Smith, wɔ krataa a ɔkyerɛw kɛmaa Ahotseweefo no mu

Binom bɔdwen dɛ nkyerɛkyerɛ a yɛrekã ho asɛm yi yɛ asɛm fofor—tum a ɔkyerɛw anaadɛ ɔkyekyer wɔ asaase do na ɔkyekyer wɔ sor so. Naaso, wiadze ne mber nyina mu no, aber biara a Ewuradze nam nyikyerɛ do dze asɔfodzi mberano no bɛma nyimpa bi, anaa nyimpa kuw bi no, daa ɔdze dɛm tum yi ma. Dɛm ntsi biribiara a dɛm nyimpa no nam tumdzi mu bɛyɛ wɔ Ewuradze ne dzin mu no, na wɔyɛɛ no ampaara nye nokwar mu, na wɔkyerɛɛw ho nsɛm nokwar mu no, dɛm kyerɛwsɛm no bɛyɛ mbra wɔ asaase do nye sor so, na wonnkotum apepa da, dɛ mbrɛ Jehovah kokroko ahyɛ ho mom no. Iyi yɛ nokwasɛm. Woana botum etsie?

Wɔdze tum a ɔkyekyer wɔ asaase do nye sor ama wɔ mberano biara mu, na nkyerɛwee a wɔkyerɛw no nokwar mu na ɔma edwuma no gyina pintsinn.

Na ɔbaa dɛ m’egya, Lehi, hun n’egya n’ebusuasantsen no so wɔ ayewa mprɛtse no do; dɛm ntsi ohun dɛ ɔyɛ Joseph n’asenyi; nyew, dɛm Joseph no a ɔyɛ Jacob ne babanyin no a wɔtɔɔn no kɔr Egypt, ɔno na Ewuradze dze ne nsa koraa no do ama oeetum akora n’egya Jacob na ne fifo amma wɔannhera wɔ ɔkɔm ntsi.

Lehi hun n’awo ntoatoaso wɔ kɔbere mprɛtse no do na ohun dɛ ofi Egypt Joseph hɔ.

Hwɛ, me mbabanyin, mepɛ dɛ hom kaa dɛ hom bedzi Nyankopɔn ne mbrasɛm do; na mebɛpɛ dɛ hom bɛkã dɛm nsɛm yi akyerɛ dɔm no. Hwɛ medze hɛn awofo a wodzi kan no a wofi Jerusalem baa no edzin ama hom; na meyɛɛ iyi ama sɛ hom kaa hom edzin a hom aakaa hɔn; na sɛ hom kaa hɔn a hom akaa hɔn ndwuma; na sɛ hom kaa hɔn ndwuma a hom ehu dza wɔkãe, na wɔkyerɛwee so too hɔ dɛ woye.

Helaman dze nananom atseneneefo hɔn edzin too ne mbabanyin, ama sɛ wɔkaa hɔn edzin a, wɔakaa hɔn nananom hɔn papayɛ.

Afei nkɔnhyɛsɛm yi na Adam kãe, ber a Sunsum Krɔnkrɔn no kenyaan no no, na Nyankopɔn ne mba no kyerɛɛw hɔn ebusuasantsen dze siei. Na iyi nye Adam n’ebusuasantsen nwoma no, na ɔsee dɛ: Da a Nyankopɔn bɔɔ nyimpa no, Nyankopɔn ne saso do na ɔyɛɛ no;

Fi Adam n’aber do no, wɔkoraa Nyame ne mba hɔn awo ntoatoaso ho nkyerɛwee, ebusua nkyerɛwee a odzi kan a wɔkyerɛwee.

Mbom egyanom hɔnho nkyerɛwee no, dza ɔfa patriarchfo mpo ho no a ɔfa Asɔfodzi kyɛfa ho no, Ewuradze me Nyankopɔn no dze esie yie wɔ mankasa me nsamu; dɛm ntsi nyimdzee a ɔfa abɔdze n’ahyɛse, nye sor abɔdze so, nye nworaba, dɛ mbrɛ woyii kyerɛɛ egyanom no, medze esie dze ebodu ndɛ da yi, na mobɔbɔ mbɔdzen makyerɛw dɛm ndzɛmba yinom a ɔwɔ nkyerɛwee no mu no bi, ama wɔaayɛ mfaso dze ama m’asefo a wɔbɛba m’ekyir no.

Abraham koraa n’egyanom hɔn nkyerɛwee na ɔkyerɛwee maa n’asefo mfaso.

Nkyerɛkyerɛ na Ahyɛmudzi 128:18

Joseph Smith, wɔ krataa a ɔkyerɛw kɛmaa Ahotseweefo no mu

Nkyɛ ɔwɔ dɛ mekyerɛ hom iyi ase pefee, na dɛ mbrɛ ɔtse yi ara ɔda mo botae no edzi ara yie. Oye dɛ hom hu, wɔ dɛm asɛm yi mu, dɛ wɔdze ndom bɔbɔ asaase yi gyedɛ nkafamdze bi bɛsẽ egyanom na mba no ntamu wɔ asɛm bi anaa biribi ho—na hwɛ, ebɛnadze nye dɛm asɛm no? Ɔno nye dɛm ewufo enuma no. Osiandɛ sɛ yɛnnkã hɔn ho a, wonnkotum edzi mu, nna sɛ hɔn so wɔnnkã hɛn ho a, yennkotum edzi mu, nna sɛ hɔn a wowui wɔ asɛmpa no mu no so nnkã hɛn ho a hɔn nye hɛn so nnkotum edzi mu; osiandɛ ohia wɔ dɛm mber yi a wɔahyehyɛ ato hɔ ama mberano ne mãhyɛ yi, dɛm mberano yi na ɔahyɛ ase reda no edzi, ama nkabɔmu a odzi mu, nye mberano nyina, nye nsaafee, nye etum, nye enyimnyam nyina ne nkabɔmu no aaba, na wɔbɛda no edzi fitsi Adam n’aber do dze ebesi aber yi mu. Na nnyɛ iyi nkõ, mbom ndzɛmba a wɔnndaa no edzi da fi wiadze ne fapem, na mbom wɔdze esuma enyansafo nye enyimdzefo no, wɔbɛda no edzi akyerɛ mbɔdomaba nye enumfoanomba wɔ dɛm mberano ne mãhyɛ yi mu.

Edwuma a wɔyɛ ma ewufo no nye “nkafamdze” a ɔkã awo ntoatoaso bom ma ɔyɛ nkabɔmu kor a odzi mu.

Nkyerɛkyerɛ na Ahyɛmudzi 128:22

Joseph Smith, wɔ krataa a ɔkyerɛw kɛmaa Ahotseweefo no mu

Enuanom, ana ɔnnsɛ dɛ yɛkɔ do boa wɔ dɛm dwumadzi kɛse yi mu? Hom nkõ nkɔ hom enyim na mma hom nnsan hom ekyir. Hom nnya akokodur, enuanom; na wɔnkɔ do, nkedzi konyim! Hom mma hom akoma ndzi dɛw, na hom enyi ngye kɛse. Hom mma asaase ntow ndwom. Hom mma ewufo mbɔ onnyiewiei ayɛyi ndwom ho dawur mfa mma Ɔhen Immanuel no a ɔhyehyɛe too hɔ ansaana wɔrobɔ wiadze no, dza ɔbɛma yeetum apon hɔn efi efiadze; na adaduafo eenya hɔn fahodzi.

Joseph Smith ne frɛ a enyigye wɔ mu dɛ yɛnkɔ enyim wɔ ewufo hɔn ɔpon mu, osiandɛ adaduafo bɛnya hɔn fahodzi.

Nkyerɛkyerɛ na Ahyɛmudzi 128:24

Joseph Smith, wɔ krataa a ɔkyerɛw kɛmaa Ahotseweefo no mu

Hwɛ, Ewuradze ne da kɛse no abɛn; woana na obotum atsena ase wɔ da a ɔbɛba no mu, woana na obotum egyina ber a obopue no? Osiandɛ ɔtse dɛ ɔberfo n’abergya, ɔtse dɛ ɔtanhofo semina; na ɔbɛtsena ase dɛ dwetɛ namfo na yiyimufo, na ɔbɛtsew Levi mbabanyin ho, na ɔapɔw hɔn ho dɛ sika na dwetɛ, ama wɔdze ayɛyɛdze ama Ewuradze wɔ tseneneeyɛ mu. Dɛm ntsi, hom mma hɛn a yɛyɛ asɔr na dɔm yi, na yɛyɛ Nda a Odzi Ekyir Ahotseweefo yi, yɛmbɔ afɔr mma Ewuradze wɔ tseneneeyɛ mu; na sɛ wowie ne temple krɔnkrɔn no si a, hom mma yɛmfa nwoma a hɛn ewufo ho nkyerɛwee a odzi mu wɔ biribiara mu no nkɔto mu.

Wɔto nsa frɛ Ahotseweefo no dɛ wɔmfa nwoma a ɔfata a hɔn ewufo ho nkyerɛwee wɔ mu mbrɛ wɔ temple.