Nganong nagbuhat kita og family history

3 Nephi 25:5–6

Jesukristo, nagkutlo ni Malaquias ngadto sa mga Nephite

Tan-awa, Akong ipadala kaninyo si Elijah ang propeta sa dili pa moabot ang mahinungdanon ug makalilisang nga adlaw sa Ginoo; Ug siya mopabalik sa kasingkasing sa mga amahan ngadto sa mga anak, ug ang kasingkasing sa mga anak ngadto sa ilang mga amahan, basin unya og Ako moabot ug mohampak sa yuta pinaagi sa usa ka tunglo.

Ang nabanhaw nga Manluluwas misubli sa saad ni Malaquias bahin kang Elijah ngadto sa katawhan sa kayutaan sa Amerika, nga nagpakita sa kaimportante niini.

Tan-awa, ako mopadayag kaninyo sa Pagkapari, pinaagi sa kamot ni Elijah ang propeta, sa dili pa moabot ang mahinungdanon ug makalilisang nga adlaw sa Ginoo. Ug iyang itanom diha sa mga kasingkasing sa mga anak ang mga saad nga gihimo ngadto sa mga amahan, ug ang mga kasingkasing sa mga anak mobalik ngadto sa ilang mga amahan. Kon dili pa tungod niini, ang tibuok kalibotan hingpit nga malaglag sa iyang pag-abot.

Ang pagkasulti ni Moroni sa mga pulong ni Malaquias: si Elijah mopahiuli sa awtoridad sa priesthood ug motanom sa mga saad nga gihimo ngadto sa mga amahan diha sa mga kasingkasing sa mga anak.

Joseph Smith—Kasaysayan 1:38–39

Joseph Smith, nagsaysay sa mga pulong ni Moroni

Ug usab, gikutlo niya ang ikalima nga bersikulo nga nag-ingon: Tan-awa, ipadayag ko kaninyo ang Pagkapari, pinaagi sa kamot ni Elijah ang propeta, sa dili pa moabot ang mahinungdanon ug makalilisang nga adlaw sa Ginoo. Gikutlo usab niya ang sunod nga bersikulo sa laing paagi: Ug itanom niya sa mga kasingkasing sa mga anak ang mga saad nga gihimo ngadto sa mga amahan, ug ang mga kasingkasing sa mga anak mobati sa ilang mga amahan. Kon dili pa ingon niini, ang tibuok kalibotan pagalaglagon sa hingpit sa iyang pag-abot.

Ang asoy ni Joseph Smith bahin kang Moroni nga nagkutlo kaniya sa propesiya ni Malaquias bahin kang Elijah niadtong 1823.

Sa pagkatapos niini nga panan-awon, lain na usab nga mahinungdanon ug mahimayaong panan-awon ang miabot kanamo; kay si Elijah ang propeta, kinsa gidala ngadto sa langit nga wala makatilaw og kamatayon, nagbarog sa among atubangan, ug miingon: Tan-awa, ang panahon hingpit nang miabot, nga gipamulong pinaagi sa ba-ba ni Malaquias—nagpamatuod nga siya [si Elijah] ipadala, sa dili pa moabot ang mahinungdanon ug makalilisang nga adlaw sa Ginoo— Aron ipabalik ang mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon pinaagi sa tunglo— Busa, ang mga yawe niini nga dispensasyon gitugyan sa inyong mga kamot; ug pinaagi niini masayod kamo nga ang mahinungdanon ug makalilisang nga adlaw sa Ginoo duol na, gani anaa na sa mga pultahan.

Si Elijah mipakita sa Kirtland Temple niadtong 1836 ug mitugyan sa mga yawe niini nga buhat ngadto kang Joseph Smith ug Oliver Cowdery.

Doktrina ug mga Pakigsaad 98:16

Ang Ginoo, pinaagi ni Joseph Smith

Busa, isalikway ang gubat ug ipahayag ang kalinaw, ug tinguhaa nga makugihon ang pagpabalik sa mga kasingkasing sa mga anak ngadto sa ilang mga amahan, ug sa mga kasingkasing sa mga amahan ngadto sa mga anak;

Ang Ginoo misugo sa mga Santos sa pagtrabaho nga makugihon sa pagliso sa mga kasingkasing sa mga anak ug sa mga amahan ngadto sa usag usa.

Doktrina ug mga Pakigsaad 138:47–48

Joseph F. Smith, naghulagway sa iyang panan-awon bahin sa mga patay

Si Propeta Elijah, ang motanom diha sa mga kasingkasing sa mga anak sa mga saad nga gihimo ngadto sa ilang mga amahan, Nanagna sa mahinungdanong buhat nga pagahimoon sulod sa mga templo sa Ginoo sa dispensasyon sa kahingpitan sa mga panahon, alang sa katubsanan sa mga patay, ug sa pagselyo sa mga anak ngadto sa ilang mga ginikanan, basin pa unya og ang tibuok yuta pagahampakon sa usa ka tunglo ug hingpit nga malaglag sa iyang pag-anhi.

Ang misyon ni Elijah nagtimaan sa buhat sa templo alang sa mga patay ug sa pagbugkos sa mga anak ngadto sa mga ginikanan.

Karon, mahitungod sa kahimtang sa kalag tali sa kamatayon ug sa pagkabanhaw—Tan-awa, gipahibalo kini ngari kanako pinaagi sa usa ka anghel, nga ang mga espiritu sa tanang tawo, human sila mobiya gikan niining mortal nga lawas, oo, ang mga espiritu sa tanang tawo, maayo man o daotan, dad-on pauli ngadto niana nga Dios nga mihatag kanila sa kinabuhi. Ug unya mahitabo, nga ang mga espiritu niadtong mga matarong pagadawaton ngadto sa kahimtang sa kalipay, nga gitawag og paraiso, usa ka kahimtang sa kapahulayan, usa ka kahimtang sa kalinaw, diin sila mopahulay gikan sa ilang tanang kasamok ug gikan sa tanang kabalaka, ug kasubo.

Si Alma mitudlo nga ang mga espiritu mopadayon sa pagkabuhi human sa kamatayon, ug ang mga matarong mosulod sa kahimtang sa kapahulayan nga gitawag og paraiso.

Doktrina ug mga Pakigsaad 137:7–9

Ang Ginoo, diha sa usa ka panan-awon ngadto kang Joseph Smith

Sa ingon niana miabot ang tingog sa Ginoo ngari kanako, nga nag-ingon: Ang tanang namatay nga wala makahibalo niini nga ebanghelyo, kinsa modawat unta niini kon gitugotan pa sila sa pagpabilin, mahimong mga manununod sa celestial nga gingharian sa Dios; Usab ang tanang mamatay sukad karon nga wala mahibalo niini, kinsa modawat unta niini sa tibuok nilang kasingkasing, mahimong manununod niana nga gingharian; Kay ako, ang Ginoo, mohukom sa tanang tawo sumala sa ilang binuhatan, sumala sa tinguha sa ilang mga kasingkasing.

Kadtong namatay nga wala makadungog sa ebanghelyo apan modawat unta niini dili isalikway; ang Dios mohukom sumala sa mga tinguha sa kasingkasing.

Doktrina ug mga Pakigsaad 138:11

Joseph F. Smith, naghulagway sa iyang panan-awon bahin sa mga patay

Samtang namalandong ko niini nga mga butang nga nahisulat, ang mga mata sa akong salabotan nabuksan, ug ang Espiritu sa Ginoo mikunsad kanako, ug akong nakita ang mga panon sa mga patay, ang dili bantogan ug bantogan.

Ang panan-awon ni Presidente Joseph F. Smith sa kalibutan sa espiritu niadtong 1918 nagsugod samtang namalandong siya sa mga kasulatan.

Doktrina ug mga Pakigsaad 138:30

Joseph F. Smith, naghulagway sa iyang panan-awon bahin sa mga patay

Apan tan-awa, gikan sa taliwala sa mga matarong, miorganisar siya sa iyang mga pundok ug mitudlo og mga mensahero, sinul-oban sa gahom ug pagtugot, ug misugo kanila sa paglakaw ug pagdala sa kahayag sa ebanghelyo ngadto nila nga anaa sa kangitngit, gani ngadto sa tanan nga espiritu sa mga tawo; ug sa ingon niana ang ebanghelyo nasangyaw ngadto sa mga patay.

Ang Manluluwas miorganisar sa matarong nga mga espiritu aron dad-on ang ebanghelyo ngadto sa tanang mga patay.

Doktrina ug mga Pakigsaad 138:32–34

Joseph F. Smith, naghulagway sa iyang panan-awon bahin sa mga patay

Sa ingon niana ang ebanghelyo gisangyaw ngadto niadtong nangamatay sa ilang mga sala, nga wala mahibalo sa kamatuoran, o sa kalapasan, nga pagsalikway sa mga propeta. Gitudloan sila og pagtuo sa Dios, paghinulsol sa sala, puli nga bunyag alang sa kapasayloan sa mga sala, sa gasa sa Espiritu Santo pinaagi sa pagpandong sa mga kamot, Ug sa tanang uban pang mga baroganan sa ebanghelyo nga kinahanglan nilang masayran aron mahimong takos ang ilang kaugalingon nga sila mahukman sumala sa mga tawo diha sa unod, apan mabuhi sumala sa Dios diha sa espiritu.

Ang mga espiritu sa kalibutan sa espiritu gitudloan sa bug-os nga ebanghelyo, lakip ang bunyag pinaagi sa puli.

Doktrina ug mga Pakigsaad 138:53–54

Joseph F. Smith, naghulagway sa iyang panan-awon bahin sa mga patay

Si Propeta Joseph Smith, ug ang akong amahan, nga si Hyrum Smith, si Brigham Young, si John Taylor, si Wilford Woodruff, ug ubang pinili nga mga espiritu kinsa gitagana aron motungha sa kahingpitan sa mga panahon sa pag-apil sa pagpahiluna sa mga pundasyon sa mahinungdanong buhat sa ulahing mga adlaw, Lakip sa pagtukod og mga templo ug sa pagpahigayon sa mga ordinansa diha niana alang sa katubsanan sa mga patay, anaa usab didto sa kalibotan sa mga espiritu.

Ang pinili nga mga espiritu gitagana aron mobutang sa mga patukoranan sa buhat sa ulahing mga adlaw, lakip ang mga templo ug mga ordinansa alang sa mga patay.

Doktrina ug mga Pakigsaad 138:57–59

Joseph F. Smith, naghulagway sa iyang panan-awon bahin sa mga patay

Nakita nako nga ang matinud-anong mga elder niini nga dispensasyon, sa panahon nga mobiya na sila gikan sa mortal nga kinabuhi, mopadayon sa ilang mga paghago sa pagsangyaw sa ebanghelyo sa paghinulsol ug katubsanan, pinaagi sa sakripisyo sa Bugtong Anak sa Dios, taliwala niadtong anaa sa kangitngit ug ubos sa pagkaulipon sa sala didto sa dako nga kalibotan sa mga espiritu sa mga patay. Ang mga patay nga naghinulsol matubos, pinaagi sa pagkamasulondon ngadto sa mga ordinansa sa balay sa Dios, Ug human nga ilang mabayaran ang silot sa ilang mga kalapasan, ug mahugasan nga limpyo, makadawat og ganti sumala sa ilang binuhatan, kay sila mga manununod sa kaluwasan.

Ang matinud-anon mopadayon sa pagtudlo human sa kamatayon, ug ang mga patay nga maghinulsol matubos pinaagi sa mga ordinansa sa templo.

Ug kutob sa gidaghanon sa mga espiritu nga didto sa bilanggoan nanggawas, ug namarog sa tuong kamot sa Dios; ug ang nahibilin gireserbar sa mga kadena sa kangitngit hangtod sa paghukom sa mahinungdanon nga adlaw.

Sa panan-awon ni Enoc, ang mga espiritu sa bilanggoan migawas ngadto sa tuong kamot sa Dios kalabot sa buhat sa Manluluwas.

Doktrina ug mga Pakigsaad 124:29–30

Ang Ginoo, pinaagi ni Joseph Smith

Kay walay bunyaganan diha sa yuta, aron sila, ang akong mga santos, mabunyagan alang niadtong nangamatay na— Kay kini nga ordinansa ipahigayon sulod sa akong balay, ug dili nako mahimong dawaton, gawas lamang sa mga adlaw sa inyong kakabos, diin kamo dili makatukod og balay alang kanako.

Ang Ginoo mipahayag nga ang bunyag alang sa mga patay angay buhaton sa Iyang templo.

Doktrina ug mga Pakigsaad 128:5

Joseph Smith, diha sa usa ka sulat ngadto sa mga Santos

Kamo tingali makahunahuna nga kini nga han-ay sa mga butang kuti kaayo; apan sultihan ko kamo nga pagtubag lamang kini sa kabubut-on sa Dios, pinasubay sa ordinansa ug pagpangandam nga gi-orden ug giandam sa Ginoo sa wala pa ang katukoran sa kalibotan, alang sa kaluwasan sa mga patay nga namatay nga walay kahibalo sa ebanghelyo.

Ang kaluwasan alang niadtong namatay nga walay ebanghelyo giplano sa wala pa mabuhat ang kalibutan.

Doktrina ug mga Pakigsaad 128:15

Joseph Smith, diha sa usa ka sulat ngadto sa mga Santos

Ug karon, akong hinigugmang mga igsoon nga lalaki ug babaye, ipasalig ko kaninyo nga kini ang mga baroganan kalabot sa mga patay ug sa mga buhi nga dili mahimong hatagan lamang og gamay nga pagtagad, kalabot sa atong kaluwasan. Kay ang ilang kaluwasan gikinahanglan ug mahinungdanon sa atong kaluwasan, sama sa gisulti ni Pablo kabahin sa mga amahan—nga sila kon wala kita dili mahingpit—ni kita kon wala ang atong mga patay mahimong hingpit.

Ang atong kaluwasan ug ang kaluwasan sa atong mga katigulangan nabugkos sa usag usa; walay usa niini nga mahingpit kon wala ang usa.

Doktrina ug mga Pakigsaad 132:46

Ang Ginoo, pinaagi ni Joseph Smith

Ug sa pagkatinuod, sa pagkatinuod, sultihan ko ikaw, nga bisan unsa ang imong iselyo dinhi sa yuta maselyo didto sa langit; ug bisan unsa ang imong bugkoson dinhi sa yuta, pinaagi sa akong ngalan ug pinaagi sa akong pulong, miingon ang Ginoo, mahangtoron kining mabugkos didto sa kalangitan; ug ang mga sala ni bisan kinsa nga imong pasayloon dinhi sa yuta pasayloon sa kahangtoran didto sa kalangitan; ug ang mga sala ni bisan kinsa nga magpabilin dinhi sa yuta magpabilin didto sa langit.

Ang Ginoo mikumpirma nga ang gibugkos dinhi sa yuta pinaagi sa Iyang awtoridad gibugkos sa kahangturan didto sa langit.

Doktrina ug mga Pakigsaad 127:6–7

Ang Ginoo, diha sa usa ka sulat gikan ni Joseph Smith

Sa pagkatinuod, kini ang gisulti sa Ginoo kaninyo mahitungod sa inyong mga patay: Kon si bisan kinsa kaninyo ang pagabunyagan alang sa inyong mga patay, gikinahanglan nga adunay tigrekord, ug pasaksiha siya sa inyong mga bunyag; papaminawa siya pinaagi sa iyang mga dunggan, aron mopamatuod siya sa kamatuoran, miingon ang Ginoo; Aron ang tanan nga inyong itala matala didto sa langit; bisan unsa nga inyong bugkoson dinhi sa yuta, pagabugkoson didto sa langit; bisan unsa ang inyong luagan dinhi sa yuta, pagaluagan didto sa langit;

Ang mga bunyag pinaagi sa puli kinahanglan adunay saksi ug itala aron matala usab kini didto sa langit.

Doktrina ug mga Pakigsaad 128:8

Joseph Smith, diha sa usa ka sulat ngadto sa mga Santos

Karon, ang kinaiyahan niini nga ordinansa anaa sa gahom sa pagkapari, pinaagi sa pagpadayag ni Jesukristo, diin gitugot nga bisan unsa ang inyong bugkoson dinhi sa yuta, pagabugkoson didto sa langit, ug bisan unsa ang inyong luagan dinhi sa yuta pagaluagan didto sa langit. O, sa laing pagkasulti, kon sabton sa laing paagi ang paghubad, bisan unsa ang inyong itala dinhi sa yuta mahitala didto sa langit, ug bisan unsa ang dili ninyo itala dinhi sa yuta dili mahitala didto sa langit; kay gikan sa mga basahon ang inyong mga patay pagahukman, sumala sa ilang kaugalingong binuhatan, kon sila ba nakapahigayon sa mga ordinansa sa ilang kaugalingon propria persona, o pinaagi sa ilang kaugalingong mga tinugyanan, sumala sa ordinansa nga giandam sa Dios alang sa ilang kaluwasan gikan sa wala pa matukod ang kalibotan, sumala sa mga talaan nga ilang gitipigan kalabot sa ilang mga patay.

Ang mga ordinansa nga gitala dinhi sa yuta pinaagi sa awtoridad sa priesthood gitala didto sa langit, gidawat man kini sa kaugalingon o pinaagi sa puli.

Doktrina ug mga Pakigsaad 128:9

Joseph Smith, diha sa usa ka sulat ngadto sa mga Santos

Kini maingon ngadto sa uban nga usa ka mapangahason nga doktrina nga atong gihisgotan—ang gahom nga motala o mobugkos dinhi sa yuta ug mobugkos didto sa langit. Bisan pa niana, sa tanang panahon sa kalibotan, sa matag higayon nga ang Ginoo naghatag og dispensasyon sa pagkapari ngadto ni bisan kinsang tawo pinaagi sa tinuod nga pagpadayag, o ni bisan kinsang pundok sa mga tawo, kini nga gahom kanunay nga gihatag. Busa, bisan unsa ang gibuhat niadto nga mga tawo pinaagi sa awtoridad, sa ngalan sa Ginoo, ug mibuhat niini nga matinuoron ug matinud-anon, ug mitipig og tukma ug matinud-anon nga talaan niini, nahimo kining balaod sa ibabaw sa yuta ug sa langit, ug dili na mabakwi, sumala sa mga sugo sa halangdong Jehova. Tinuod kini nga panultihon. Kinsa may makadawat niini?

Ang gahum sa pagbugkos dinhi sa yuta ug didto sa langit gihatag sa matag dispensasyon, ug ang matinud-anon nga mga talaan naghimo sa buhat nga mobugkos.

Ug nahitabo nga ang akong amahan, nga si Lehi, nakakaplag usab diha sa mga palid nga tumbaga og usa ka kasaysayan sa kagikan sa iyang mga amahan; mao nga nahibaloan niya nga kaliwat siya ni Jose; oo, gani kadto nga Jose kinsa anak ni Jacob, kinsa gibaligya ngadto sa Ehipto, ug kinsa gipanalipdan pinaagi sa kamot sa Ginoo, aron mapanalipdan niya ang iyang amahan nga si Jacob, ug tanan sa iyang panimalay gikan sa pagkamatay tungod sa gutom.

Nadiskobrehan ni Lehi ang iyang kagikan diha sa mga palid nga tumbaga ug nahibaloan nga kaliwat siya ni Jose sa Egipto.

Tan-awa, akong mga anak nga lalaki, akong tinguha nga kamo mahinumdom sa pagsunod sa mga sugo sa Dios; ug manghinaot ko nga kamo mopahayag ngadto sa katawhan niini nga mga pulong. Tan-awa, gihatag ko kaninyo ang mga ngalan sa atong unang mga ginikanan kinsa miabot gikan sa yuta sa Jerusalem; ug kini akong gibuhat aron nga sa panahon nga kamo mahinumdom sa inyong mga ngalan kamo mahinumdom kanila; ug sa panahon nga kamo mahinumdom kanila kamo mahinumdom sa ilang mga buhat; ug kon kamo mahinumdom sa ilang mga buhat inyong masayran kon giunsa kana sa pagkasulti ug sa pagkasulat, nga kini mga maayo.

Gingalanan ni Helaman ang iyang mga anak nga lalaki sunod sa matarong nga mga katigulangan aron ang paghinumdom sa ilang mga ngalan magpahinumdom kanila sa kaayo sa ilang mga katigulangan.

Karon kini nga panagna nga gipamulong ni Adan, samtang siya gidasig sa Espiritu Santo, ug ang usa ka kasaysayan sa kagikanan gitipigan sa mga anak sa Dios. Ug kini mao ang basahon sa mga henerasyon ni Adan, nag-ingon: Sa adlaw nga ang Dios milalang sa tawo, sa panagway sa Dios mibuhat siya kaniya;

Sukad sa panahon ni Adan gitipigan ang kagikan sa mga anak sa Dios, ang unang natala nga talaan sa pamilya.

Apan ang mga talaan sa mga amahan, gani sa mga patriyarka, kalabot sa katungod sa Pagkapari, gipatunhay sa Ginoo nga akong Dios dinhi sa akong kaugalingong mga kamot; busa ang kahibalo sa sinugdanan sa paglalang, ug usab sa mga planeta, ug sa mga bituon, ingon nga kini gipahibalo ngadto sa mga amahan, akong gitipigan gani hangtod karong adlawa, ug maningkamot ko sa pagsulat sa uban niini nga mga butang dinhi niini nga talaan, alang sa kaayohan sa akong kaliwatan nga mosunod kanako.

Gitipigan ni Abraham ang mga talaan sa iyang mga amahan ug misulat alang sa kaayohan sa iyang mga kaliwat.

Doktrina ug mga Pakigsaad 128:18

Joseph Smith, diha sa usa ka sulat ngadto sa mga Santos

Tingali makahatag unta ko og mas yano nga paghubad niini, apan igo na ang pagkayano niini aron mahiangay sa akong katuyoan niini karon. Igo na nga masayod, niini nga sitwasyon, nga ang yuta hampakon sa tunglo gawas kon adunay makatakdo nga sumpay sa bisan unsa nga matang tali sa mga amahan ug sa mga anak, mahitungod sa pipila o ubang hilisgotan—ug tan-awa unsa kana nga hilisgotan? Mao kana ang bunyag alang sa mga patay. Kay kita kon wala sila dili mahimo nga hingpit; ni sila kon wala kita mahimong hingpit. Wala kanila ni kanato ang mahingpit kon wala kadtong nangamatay usab diha sa ebanghelyo; kay gikinahanglan kini alang sa pagpasiuna sa dispensasyon sa kahingpitan sa mga panahon, diin nga dispensasyon karon nagsugod na, nga ang tibuok ug kompleto ug hingpit nga pagkahiusa, ug lig-on nga pagtakdo sa mga dispensasyon, ug mga yawe, ug mga gahom, ug mga himaya kinahanglan nga mahitabo, ug ipadayag gikan sa mga adlaw ni Adan bisan hangtod karon nga panahon. Ug dili lamang kini, apan kadtong mga butang nga wala pa gayod mapadayag gikan sa pagtukod sa kalibotan, apan gitagoan gikan sa maalamon ug mabuot, ipadayag ngadto sa mga bata ug mga masuso karon, ang dispensasyon sa kahingpitan sa mga panahon.

Ang buhat alang sa mga patay mao ang “makatakdo nga sumpay” nga mohiusa sa mga henerasyon ngadto sa usa ka hingpit nga pagkahiusa.

Doktrina ug mga Pakigsaad 128:22

Joseph Smith, diha sa usa ka sulat ngadto sa mga Santos

Kaigsoonan, dili ba kita mopadayon sa hilabihan ka mahinungdanon nga katuyoan? Padayon ug ayaw pagsibog. Pagmaisogon, kaigsoonan; ug padayon, padayon ngadto sa kadaogan! Pasadyaa ang inyong mga kasingkasing, ug paglipay sa hilabihan. Paawita og kalit ang yuta. Pasultiha ang mga patay sa mga awit sa walay kataposang pagdayeg ngadto ni Hari Immanuel, kinsa mi-orden, sa wala pa ang kalibotan, nianang makapahimo kanato sa pagtubos kanila gikan sa ilang bilanggoan; kay ang mga binilanggo mahimong gawasnon.

Ang malipayon nga panawagan ni Joseph Smith sa pagpadayon sa pagtubos sa mga patay, kay ang mga binilanggo mahimong gawasnon.

Doktrina ug mga Pakigsaad 128:24

Joseph Smith, diha sa usa ka sulat ngadto sa mga Santos

Tan-awa, ang mahinungdanon nga adlaw sa Ginoo nagkaduol na; ug kinsa ang makalahutay sa adlaw sa iyang pag-anhi, ug kinsa ang makaharong sa panahon nga magpakita na siya? Kay sama siya sa kalayo sa magtutunaw, ug sama sa sabon sa maglalaba; ug molingkod siya sama sa magtutunaw ug tiglunsay sa pilak, ug himoon niyang lunsay ang mga anak ni Levi, ug hinloan sila sama sa bulawan ug pilak, aron mohalad sila sa Ginoo og usa ka halad sa pagkamatarong. Busa, kita, isip simbahan ug katawhan, ug isip mga Santos sa Ulahing mga Adlaw, mohalad sa Ginoo og usa ka halad sa pagkamatarong; ug mogasa kita sa sulod sa iyang balaan nga templo, sa panahon nga mahuman na kini, og usa ka basahon nga naglangkob sa mga talaan sa atong mga patay, nga takos alang sa tanang pagdawat.

Ang mga Santos gidapit sa paghalad diha sa templo og takos nga basahon nga naglangkob sa mga talaan sa ilang mga patay.