Kon ngaa ginahimo naton ang kasaysayan sang pamilya

3 Nefi 25:5–6

Jesucristo, nga nagsambit sang mga pulong ni Malaquias sa mga Nefinhon

Tan-awa, ipadala ko sa inyo si Elias nga propeta antes mag-abot ang dako kag makahaladlok nga adlaw sang Ginuo; Kag lisuon niya ang tagipusuon sang mga amay sa mga anak, kag ang tagipusuon sang mga anak sa ila mga amay, kay basi maabot ako kag sakiton ang duta sang sumpa.

Ginliwat sang nabanhaw nga Manluluwas ang promisa ni Malaquias parte kay Elias sa mga tawo sa America, nga nagapakita sang kaimportante sini.

Tan-awa, ipahayag ko sa inyo ang Pagkapari paagi sa kamot ni Elias nga propeta antes mag-abot ang dako kag makahaladlok nga adlaw sang Ginuo. Kag itanom niya sa mga tagipusuon sang mga anak ang mga promisa nga ginhimo sa mga amay, kag ang mga tagipusuon sang mga anak magaliso sa ila mga amay. Kon indi mangin amo sini, ang bilog nga duta lubos nga maguba sa iya pagkari.

Ang pagkasambit ni Moroni sang mga pulong ni Malaquias: ipanumbalik ni Elias ang awtoridad sang pagkapari kag itanom sa mga tagipusuon sang mga anak ang mga promisa nga ginhimo sa mga amay.

Joseph Smith—Kasaysayan 1:38–39

Joseph Smith, nga nagasaysay sang mga pulong ni Moroni

Kag sa liwat, ginsambit niya ang ika-lima nga bersikulo sa masunod nga mga pulong: Tan-awa, ipahayag ko sa inyo ang Pagkapari, paagi sa kamot ni Elias nga propeta, antes mag-abot ang dako kag makahaladlok nga adlaw sang Ginuo. Ginsambit man niya ang masunod nga bersikulo sing lain: Kag itanom niya sa mga tagipusuon sang mga anak ang mga promisa nga ginhimo sa mga amay, kag ang mga tagipusuon sang mga anak magaliso sa ila mga amay. Kon indi mangin amo sini, ang bilog nga duta lubos nga maguba sa iya pagkari.

Ang saysay ni Joseph Smith parte sa pagsambit ni Moroni sa iya sang propesiya ni Malaquias parte kay Elias sang 1823.

Pagkatapos sining panan-awon, isa pa ka dako kag mahimayaon nga panan-awon ang nag-abot sa amon; kay si Elias nga propeta nga gindala sa langit nga wala makatilaw sang kamatayon nagtindog sa atubang namon, kag nagsiling: Tan-awa, nag-abot na gid ang tion nga ginhambal paagi sa baba ni Malaquias—nga nagapamatuod nga dapat ipadala sia [Elias] antes mag-abot ang dako kag makahaladlok nga adlaw sang Ginuo— Agud lisuon ang mga tagipusuon sang mga amay sa mga anak, kag ang mga anak sa mga amay, indi gani pagasakiton ang bilog nga duta sang sumpa— Gani, ang mga yabi sining dispensasyon gintugyan sa inyo mga kamot; kag paagi sini mahibaloan ninyo nga malapit na ang dako kag makahaladlok nga adlaw sang Ginuo nga yara na sa mga puwertahan.

Nagpakita si Elias sa Templo sa Kirtland sang 1836 kag gintugyan ang mga yabi sining buluhaton kay Joseph Smith kag kay Oliver Cowdery.

Doktrina kag mga Kasugtanan 98:16

Ang Ginuo, paagi kay Joseph Smith

Karon, isikway ang giyera kag ibantala ang paghidaet, kag tinguhai sing matutum nga mapaliso ang mga tagipusuon sang mga anak sa ila mga amay, kag ang mga tagipusuon sang mga amay sa ila mga anak;

Ginsugo sang Ginuo ang mga Santos nga magpangabudlay sing tudok sa pagliso sang mga tagipusuon sang mga anak kag sang mga amay sa isa kag isa.

Doktrina kag mga Kasugtanan 138:47–48

Joseph F. Smith, nga nagalaragway sang iya panan-awon sang mga patay

Ang Propeta nga si Elias magatanom sa mga tagipusuon sang mga anak sang mga promisa nga ginhimo sa ila mga amay, Nga nagapakita na ngadaan sang dako nga buluhaton nga pagahimuon sa mga templo sang Ginuo sa dispensasyon sang kabug-osan sang mga panahon, para sa pagtubos sang mga patay, kag sa paghugpong sang mga anak sa ila mga ginikanan agud nga ang bilog nga duta indi pagsakiton sang sumpa kag lubos nga maguba sa iya pagkari.

Ang misyon ni Elias nagpakita na ngadaan sang buluhaton sa templo para sa mga minatay kag sang paghugpong sang mga anak sa ila mga ginikanan.

Karon, parte sa kahimtangan sang kalag sa ulot sang kamatayon kag sang pagkabanhaw—Tan-awa, ginpahibalo sa akon sing isa ka anghel, nga ang mga espiritu sang tanan nga tawo, pagkatapos gid nga maggwa sila sa sining mortal nga lawas, huo, ang mga espiritu sang tanan nga tawo, bisan kon sila maayo ukon malain, ginadala pauli sa sinang Dios nga naghatag sa ila sing kabuhi. Kag dayon matabo ini, nga ang mga espiritu sinang mga matarong pagabatonon sa isa ka kahimtangan sang kalipayan, nga ginatawag nga paraiso, isa ka kahimtangan sang kapahuwayan, isa ka kahimtangan sang paghidaet, nga sa diin magapahuway sila halin sa tanan nila nga kabudlayan kag halin sa tanan nga kabalaka, kag kasubo.

Ginatudlo ni Alma nga ang mga espiritu nagapadayon nga buhi pagkatapos sang kamatayon, kag ang mga matarong nagasulod sa kahimtangan sang pahuway nga ginatawag nga paraiso.

Doktrina kag mga Kasugtanan 137:7–9

Ang Ginuo, sa isa ka panan-awon kay Joseph Smith

Gani ang tingug sang Ginuo nabatian ko nga nagasiling: Ang tanan nga napatay nga wala sing may nahibaloan parte sining ebanghelyo, nga nagbaton sini kuntani kon gintugotan sila nga magpadayon sa duta, mangin mga manunubli sang selestiyal nga ginharian sang Dios; Kag ang tanan nga mapatay sugod subong nga wala sing may nahibaloan parte sini, nga magabaton sini kuntani sa bug-os nila nga mga tagipusuon, mangin mga manunubli sang sinang ginharian; Kay ako, nga Ginuo, magahukom sang tanan nga tawo suno sa ila mga binuhatan, suno sa handum sang ila mga tagipusuon.

Ang mga nagtaliwan nga wala makabati sang ebanghelyo pero magabaton unta sini indi ginasirhan; ginahukman sang Dios suno sa mga handum sang tagipusuon.

Doktrina kag mga Kasugtanan 138:11

Joseph F. Smith, nga nagalaragway sang iya panan-awon sang mga patay

Samtang ginbinag-binag ko ining mga butang nga ginsulat, nabuksan ang mga mata sang akon paghangop, ang Espiritu sang Ginuo yara sa akon, kag nakita ko ang mga guban sang mga patay, magamay kag dalagko.

Ang panan-awon ni Pangulong Joseph F. Smith sang 1918 parte sa kalibutan sang mga espiritu nagsugod samtang ginabinag-binag niya ang mga kasulatan.

Doktrina kag mga Kasugtanan 138:30

Joseph F. Smith, nga nagalaragway sang iya panan-awon sang mga patay

Apang tan-awa, halin sa mga matarong, gin-organisar niya ang iya mga puwersa kag pinili nga mga mensahero nga may gahum kag awtoridad, kag ginsugo sila nga maglakat kag magdala sang kasanag sang ebanghelyo sa ila nga yara sa kadulom, bisan pa sa tanan nga espiritu sang tawo; kag gani ginwali ang ebanghelyo sa mga patay.

Gin-organisar sang Manluluwas ang matarong nga mga espiritu agud dalhon ang ebanghelyo sa tanan nga patay.

Doktrina kag mga Kasugtanan 138:32–34

Joseph F. Smith, nga nagalaragway sang iya panan-awon sang mga patay

Gani ginwali ang ebanghelyo sa mga napatay sa ila mga sala, nga wala sing may nahibaloan parte sa kamatuoran, ukon nga may kalapasan bangod sa ila pagsikway sang mga propeta. Ini sila gintudloan sang pagtuo sa Dios, paghinulsol sang sala, bunyag para sa iban para sa kapatawaran sang mga sala, sang dulot sang Balaan nga Espiritu paagi sa pagtakdong sang mga kamot, Kag tanan nga iban pa nga mga prinsipyo sang ebanghelyo nga kinahanglan nila mahibaloan agud sila mangin nagakaangay nga bisan mahukman sila suno sa mga tawo sa unod, magkabuhi sila suno sa Dios sa espiritu.

Ang mga espiritu sa kalibutan sang mga espiritu gintudloan sang bug-os nga ebanghelyo, lakip ang bunyag para sa iban.

Doktrina kag mga Kasugtanan 138:53–54

Joseph F. Smith, nga nagalaragway sang iya panan-awon sang mga patay

Ang Propeta nga si Joseph Smith, kag ang akon amay nga si Hyrum Smith, sanday Brigham Young, John Taylor, Wilford Woodruff, kag iban pa nga pinili nga mga espiritu nga gintalana nga mabun-ag sa kabug-osan sang mga panahon agud makigbahin sa pagpasad sang mga pundasyon sang dako nga buluhaton sa ulihing mga adlaw, Lakip ang pagtukod sang mga templo kag ang paghikot sang mga ordinansa diri para sa pagtubos sang mga minatay, ato man sa kalibutan sang mga espiritu.

Ang pinili nga mga espiritu gintigana agud ibutang ang mga sadsaran sang buluhaton sa ulihing mga adlaw, lakip ang mga templo kag ang mga ordinansa para sa mga minatay.

Doktrina kag mga Kasugtanan 138:57–59

Joseph F. Smith, nga nagalaragway sang iya panan-awon sang mga patay

Nakita ko nga ang tampad nga mga elder sining dispensasyon, kon magbiya na sila sa mortal nga kabuhi, nagapadayon sang ila mga buluhaton sa pagwali sang ebanghelyo sang paghinulsol kag pagtubos, paagi sa sakripisyo sang Bugtong nga Anak sang Dios, sa tunga sinang yara sa kadulom kag napaidalom sa pagkaulipon sa sala sa dako nga kalibutan sang mga espiritu sang mga patay. Ang mga patay nga maghinulsol pagatuboson paagi sa pagtuman sang mga ordinansa sang balay sang Dios, Kag pagkatapos nga mabayaran nila ang silot sang ila mga kalapasan, kag matinloan, magabaton sila sang padya suno sa ila mga buhat kay mga manunubli sila sang kaluwasan.

Ang matutom nagapadayon sa pagtudlo pagkatapos sang kamatayon, kag ang mga patay nga maghinulsol ginatubos paagi sa mga ordinansa sa templo.

Kag ang tanan nga espiritu nga yara sa bilanggoan naggwa, kag nagtindog sa tuo nayon nga kamot sang Dios; kag ang nagkalabilin gintigana sa mga kadena sang kadulom tubtob sa paghukom nga matabo sa dako nga adlaw.

Sa panan-awon ni Enoc, ang mga espiritu sa bilangguan nagaguwa pakadto sa tuo nga kamot sang Dios upod sa buluhaton sang Manluluwas.

Doktrina kag mga Kasugtanan 124:29–30

Ang Ginuo, paagi kay Joseph Smith

Kay wala sang tulugmawan sa kalibutan nga sila, ang akon mga santos, sarang mabunyagan para sinang mga nagkalamatay— Kay ining ordinansa nagakadapat gid lamang sa akon balay, kag indi ko pagbatonon luwas lamang sa mga adlaw sang inyo kaimolon nga indi kamo makatukod sang balay para sa akon.

Ginpahayag sang Ginuo nga ang bunyag para sa mga minatay nahanungod sa Iya templo.

Doktrina kag mga Kasugtanan 128:5

Joseph Smith, sa isa ka sulat sa mga Santos

Mahimo nga nagahunahuna kamo nga ining pagpahamtang sang mga butang maid-id kaayo; apang sugiran ko kamo nga ini agud lamang tumanon ang pagbuot sang Dios paagi sa pagsunod sang ordinansa kag pagpanghanda nga gin-ordin sang Ginuo kag ginhanda antes pa gintuga ang kalibutan para sa kaluwasan sang mga minatay nga wala sing may nahibaloan parte sa ebanghelyo.

Ang kaluwasan sang mga nagtaliwan nga wala sang ebanghelyo ginplano antes pa gintuga ang kalibutan.

Doktrina kag mga Kasugtanan 128:15

Joseph Smith, sa isa ka sulat sa mga Santos

Kag karon, labing pinalangga ko nga mga kauturan, pasaligon ko kamo nga ang mga ini mga prinsipyo parte sa mga patay kag sa mga buhi nga indi mahimo ibale-wala lamang, parte sa aton kaluwasan. Kay ang ila kaluwasan kinahanglanon kag importante sa aton kaluwasan suno sa ginasiling ni Pablo parte sa mga amay—nga indi sila maperpekto kon wala kita—kag indi man kita maperpekto kon wala ang aton mga minatay.

Ang aton kaluwasan kag ang kaluwasan sang aton mga katigulangan nahugpong sing dungan; wala sing isa nga mangin himpit kon wala ang isa.

Doktrina kag mga Kasugtanan 132:46

Ang Ginuo, paagi kay Joseph Smith

Kag sa pagkamatuod, sa pagkamatuod, ginasiling ko sa imo nga kon ano man ang imo hugpongon sa duta pagahugpongon sa langit; kag kon ano man ang imo bugkoson sa duta, sa akon ngalan kag paagi sa akon pulong, siling sang Ginuo, pagabugkoson ini sa wala’y katapusan sa kalangitan; kag ang bisan kay sin-o mga sala nga patawaron mo sa duta pagapatawaron sa wala’y katapusan sa kalangitan; kag ang bisan kay sin-o mga sala nga ginapunggan mo sa duta pagapunggan sa langit.

Ginpamatud-an sang Ginuo nga ang ginhugpong sa duta paagi sa Iya awtoridad ginahugpong sa wala’y katapusan sa langit.

Doktrina kag mga Kasugtanan 127:6–7

Ang Ginuo, sa isa ka sulat halin kay Joseph Smith

Sa pagkamatuod, ini ang siling sang Ginuo sa inyo parte sa inyo mga minatay: Kon ang bisan sin-o sa inyo bunyagan para sa inyo mga minatay, dapat may tagsulat, kag pasaksihon sia sang inyo mga bunyag; pabation sia sa iya mga dulunggan agud makapamatuod sang kamatuoran, siling sang Ginuo; Agud nga ang tanan ninyo nga sinulatan masulat sa langit; kon ano man ang inyo hugpongon sa duta pagahugpongon sa langit; kon ano man ang inyo hubaron sa duta pagahubaron sa langit;

Ang mga bunyag paagi sa proxy dapat may saksi kag rekord agud masulat man sila sa langit.

Doktrina kag mga Kasugtanan 128:8

Joseph Smith, sa isa ka sulat sa mga Santos

Karon, nasandig ang kinaiya sining ordinansa sa gahum sang pagkapari suno sa rebelasyon ni Jesucristo kon sa diin gintugotan nga kon ano man ang inyo hugpongon sa duta pagahugpongon sa langit; kag kon ano man ang inyo hubaron sa duta pagahubaron sa langit. Ukon, sa iban nga pulong, sa lain naman nga pagtan-aw sang paglubad, kon ano man ang inyo nasulat sa duta igasulat sa langit, kag kon ano man ang indi ninyo nasulat sa duta indi igasulat sa langit; kay ang mga patay pagahukman halin sa sinang ginsulat sa mga libro suno sa ila kaugalingon nga mga binuhatan kon sila man mismo ang naghikot sang mga ordinansa sa ila kaugalingon nga propria persona, ukon paagi sa ila kaugalingon nga mga representante suno sa ordinansa nga ginhanda sang Dios para sa ila kaluwasan antes pa gintuga ang kalibutan, suno sa mga rekord nga ginsulat nila parte sa ila mga minatay.

Ang mga ordinansa nga ginsulat sa duta paagi sa awtoridad sang pagkapari ginasulat sa langit, nabaton man sa kaugalingon ukon paagi sa proxy.

Doktrina kag mga Kasugtanan 128:9

Joseph Smith, sa isa ka sulat sa mga Santos

Ayhan para sa iban daw tuman ka di-kinaandan sang doktrina nga aton ginahambalan—isa ka gahum nga nagasulat ukon nagahugpong sa duta kag nagahugpong sa langit. Apang, sa bilog nga katuigan sang kalibutan, sa tagsa ka tion nga ang Ginuo nagahatag sing isa ka dispensasyon sang pagkapari sa bisan sin-o nga tawo paagi sa matuod-tuod nga rebelasyon ukon sa bisan ano nga grupo sang mga tawo, ini nga gahum pirme gid nga ginahatag. Gani, kon ano man ang ginhimo sinang mga tawo nga may awtoridad, sa ngalan sang Ginuo, kag ginhimo ini sing husto kag sing matutum, kag nagsulat sing husto kag matutum nga rekord sang amo man, ini nangin isa ka layi sa duta kag sa langit, kag indi mahimo nga bawion suno sa mga mando sang dakong Jehova. Ini isa ka matuod nga pahayag. Sin-o bala ang makapamati sini?

Ang gahum sa paghugpong sa duta kag sa langit ginhatag sa kada dispensasyon, kag ang matutom nga mga rekord nagahimo nga nagahugpong ang buluhaton.

Kag natabo ini nga nakita man sang akon amay nga si Lehi, sa mga lamina nga saway ang lista sang kaliwatan sang iya mga katigulangan; gani iya nahibal-an nga kaliwat sia ni Jose; huo, bisan inang Jose nga amo ang anak ni Jacob, nga ginbaligya sa Egipto, kag amo ang gin-amligan sang kamot sang Ginuo, agud maamligan niya ang iya amay nga si Jacob, kag ang tanan niya nga panimalay halin sa pagkamatay sa gutom.

Nakita ni Lehi ang iya genealohiya sa mga lamina nga saway kag nahibaluan niya nga kaliwat sia ni Jose sang Egipto.

Tan-awa, mga anak ko, ginapangabay ko nga dumdumon ninyo ang pagtuman sang mga kasugoan sang Dios; kag luyag ko nga ipahayag ninyo sa katawhan ining mga pulong. Tan-awa, ginhatag ko sa inyo ang mga ngalan sang aton una nga mga ginikanan nga naghalin sa duta sang Jerusalem; kag ini akon ginhimo agud nga kon madumduman ninyo ang inyo mga ngalan madumduman ninyo sila; kag kon madumduman ninyo sila madumduman ninyo ang ila mga binuhatan; kag kon madumduman ninyo ang ila mga binuhatan mahibal-an ninyo nga ini nasiling, kag nasulat man, nga ang mga ini maayo.

Ginhingalan ni Helaman ang iya mga anak suno sa matarong nga mga katigulangan agud ang pagdumdom sang ila mga ngalan magapahanumdom sa ila sang kaayo sang ila mga katigulangan.

Karon ining propesiya ginhambal ni Adan, samtang natandog sia sang Balaan nga Espiritu, kag isa ka lista sang kaliwatan ang ginsulat parte sa mga anak sang Dios. Kag ini amo ang libro sang kaliwatan ni Adan nga nagasiling: Sa adlaw nga gintuga sang Dios ang tawo, kaangay sa Dios ginhimo niya sia;

Halin sa panahon ni Adan, gintipigan ang genealohiya sang mga anak sang Dios, ang una nga narekord nga rekord sang pamilya.

Apang ang sinulatan sang mga amay nga mga patriarka, parte sa kinamatarong sang Pagkapari, gin-amligan sang Ginuong Dios sa akon kaugalingon nga mga kamot; gani ang ihibalo parte sa ginsuguran sang pagtuga, kag amo man sang mga planeta, kag sang mga bituon, sa paagi nga ginpahibalo ang mga ini sa mga amay, gin-amligan ko tubtob sini nga adlaw, kag tinguhaan ko nga magsulat sing pila sining mga butang sa sining sinulatan, para sa kaayohan sang akon kaliwatan nga matawo pagkatapos nakon.

Gintipigan ni Abraham ang mga rekord sang iya mga amay kag nagsulat para sa kaayuhan sang iya kaliwatan.

Doktrina kag mga Kasugtanan 128:18

Joseph Smith, sa isa ka sulat sa mga Santos

Mahimo kuntani ako makahatag sing mas maathag pa nga paglubad sini apang husto na ini kaathag subong agud magsigo sa akon katuyoan. Husto na nga mahibaloan sa ini nga sitwasyon nga ang duta pagasakiton sang sumpa luwas lang kon may yara sang isa ka sahi sang kaw-id nga magaangot sang mga amay sa mga anak nga parte sa pila ukon iban pa nga topiko—kag tan-awa ano ina nga topiko? Ini amo ang bunyag para sa mga minatay. Kay indi kita maperpekto kon wala sila; kag indi man sila maperpekto kon wala kita. Indi man sila ukon kita maperpekto kon wala inang mga nagkalamatay sa ebanghelyo; kay importante ini sa pagsugod sang dispensasyon sang kabug-osan sang mga panahon nga ang amo nga dispensasyon nagasugod na sa pagluntad, nga ang bug-os kag kompleto kag perpekto nga pag-isa, kag pag-angot sang mga dispensasyon, kag mga yabi, kag mga gahum, kag mga himaya mahanabo, kag ipahayag halin sa panahon ni Adan bisan pa tubtob sa subong nga panahon. Kag indi lamang ini, kundi inang mga butang nga wala gid napahayag halin pa sa pagtuga sang kalibutan kundi ginlipdan sa mga maalam kag mga mahinalungon, igapahayag sa mga kabataan kag mga nagasoso pa lang sa sining dispensasyon sang kabug-osan sang mga panahon.

Ang buluhaton para sa mga minatay amo ang “kaw-id nga nagaangot” sang mga henerasyon sa isa ka himpit nga paghiliusa.

Doktrina kag mga Kasugtanan 128:22

Joseph Smith, sa isa ka sulat sa mga Santos

Mga kauturan, indi bala kita magpadayon sa amo kadako nga kawsa? Mag-abante kag indi mag-atras. Kaisog, mga kauturan; kag abante, abante sa kadalag-an! Papangalipaya ang inyo mga tagipusuon, kag mangin tuman kamasinadyahon. Pakantaha sa hinali ang kalibutan. Pahambala ang mga patay sang mga ambahanon sang wala’y katapusan nga pagdayaw sa Haring Emmanuel nga nag-ordin, antes ginhimo ang kalibutan, sinang magabulig sa aton sa pagtubos sa ila halin sa ila bilanggoan; kay pagahilwayon ang mga preso.

Ang malipayon nga panawagan ni Joseph Smith nga magpadayon sa pagtubos sang mga minatay, kay pagahilwayon ang mga preso.

Doktrina kag mga Kasugtanan 128:24

Joseph Smith, sa isa ka sulat sa mga Santos

Tan-awa, ang dako nga adlaw sang Ginuo malapit na; kag sin-o bala ang makalampuwas sang adlaw sang iya pagkari, kag sin-o bala ang makatindog kon magpakita sia? Kay pareho sia sang kalayo sang manugtunaw, kag pareho sang habon sang manuglaba; kag magapungko sia bilang manugtunaw kag manugtinlo sang pilak, kag pagatinloan niya ang mga anak ni Levi, kag hugasan sila pareho sang bulawan kag pilak agud makahatag sila sa Ginuo sang halad sa pagkamatarong. Gani, maghatag kita sa Ginuo bilang isa ka simbahan kag isa ka katawhan, kag bilang mga Santos sa Ulihing mga Adlaw sang halad sa pagkamatarong; kag maghalad kita sa iya balaan nga templo kon matapos na ini, isa ka libro nga nagaunod sang mga rekord sang aton mga minatay nga mangin bagay sang bug-os nga pagbaton.

Ginaagda ang mga Santos nga maghalad sa templo sang isa ka takos nga libro nga nagaunod sang mga rekord sang ila mga minatay.