Mba’érepa jajapo familia rembiasakue

3 Nefi 25:5–6

Jesucristo, omombe’úvo Malaquías ñe’ẽ nefitakuérape

Péina ápe, che amboúta peẽme upe proféta Elías-pe ou mboyve Ñandejára ára tuicha ha oporomondyietéva; Ha haʼe oguerujeýta tuvakuéra korasõ taʼyrakuérape, ha taʼyrakuéra korasõ ituvakuérape, ani che aju ha aipyʼajopy yvy peteĩ ñeʼẽngái reheve.

Salvador oikovejeyva’ekue he’ijey Malaquías promésa Elías rehegua Amérikapegua tavayguakuérape, ohechaukávo iñimportanteha.

Péina ápe, Che aikuaaukáta peẽme pe Sacerdocio, Elías, pe proféta po rupi, ou mboyve Ñandejára ára tuicha ha oporomondyietéva. Ha ha’e omoĩ’atãta ta’yrakuéra korasõme umi promésa tuvakuérape ojejapova’ekue, ha umi ta’ýra korasõ ou jeýta ituvakuérape. Upeicha’ỹramo, opa pe yvy oñehundipaitéta ijejúpe.

Moroni he’i Malaquías ñe’ẽ: Elías omoĩjeýta sacerdocio autorida ha oñotỹta ta’yrakuéra korasõme umi promésa tuvakuérape ojejapova’ekue.

José Smith—Tembiasakue 1:38–39

José Smith, omombe’újeývo Moroni ñe’ẽ

Ha avei, he’i pe kínto versíkulo kóicha: Péina ápe, Che aikuaaukáta peẽme pe Sacerdocio, Elías, upe proféta po rupive, Ñandejára ára tuicha ha oporomondyietéva ou mboyve. Ha’e avei he’i versíkulo uperiregua ambue hendáicha: Ha ha’e oñotỹta ta’yrakuéra korasõme umi promésa ojejapova’ekue tuvakuérape, ha ta’yrakuéra korasõ ojeréta ituvakuérape. Upeicha’ỹramo, pe yvy tuichakue oñemonandipáta ijejúpe.

José Smith omombe’u mba’éicha Moroni he’i chupe Malaquías profecía Elías rehegua 1823-pe.

Opa rire ko visiõ, ojehechauka oréve ambue visiõ tuicha ha igloriósova; oñembo’ýgui ore renondépe Elías, upe Proféta, ojeguerahava’ekue yvágape ohasa’ỹre ñemano, ha he’i: Péina ápe, og̃uahẽmbaitéma ára oñeñe’ẽ haguégui Malaquías juru rupi—otestifikávo ha’e, [Elías upe Proféta] oñemboutaha Ñandejára ára tuicha ha oporomondyietéva mboyve— Ombojere hag̃ua tuvakuéra korasõ ta’yrakuérape, ha ta’yrakuéra korasõ tuvakuérape, ani hag̃ua opa upe yvy ojejopy peteĩ ñe’ẽngáipe— Upévare, oñemoĩ pende pópe ko dispensasiõ llavekuéra; ha kóva rupi peikuaáta Ñandejára ára tuicha ha oporomondyietéva hi’ag̃uimaha, jepeve upe okẽme.

Elías ojehechauka Kirtland Témplope 1836-pe ha ome’ẽ ko tembiapo llavekuéra José Smith ha Oliver Cowdery-pe.

Doctrina ha Konveniokuéra 98:16

Ñandejára, José Smith rupive

Upévare, peheja ñorairõguasu ha pemomarandu py’aguapy, ha peñeha’ãmbaite pembojere hag̃ua ta’yrakuéra korasõ tuvakuérape, ha tuvakuéra korasõ ta’yrakuérape;

Ñandejára he’i Santokuérape omba’apo kyre’ỹ hag̃ua ombojere hag̃ua ta’yrakuéra ha tuvakuéra korasõ ojuehe.

Doctrina ha Konveniokuéra 138:47–48

Joseph F. Smith, omombe’úvo ivisiõ omanova’ekuére

Elías upe Proféta oñotỹtava ta’yrakuéra korasõme umi promésa tuvakuérape ojejapova’ekue, Ohecha tenondévo tembiapo guasu ojejapótava Ñandejára témplope, dispensasiõ ára oñekumplipaitetahápe, omanova’ekue rredensiõrã, ha ojesella hag̃ua ta’yrakuéra ituvakuérare, ani opa upe yvy ojejopy peteĩ ñe’ẽngáipe ha oñehundipaite ijejúpe.

Elías misión ohechauka tenondetemi témplo rembiapo omanova’ekuépe g̃uarã ha ta’yrakuéra ñesella ituvakuérare.

Koʼág̃a, pe ánga ñeime rehegua pe ñemano ha jeikovejey paʼũme—péina ápe, ojeikuaauka chéve peteĩ ángel rupive, opa yvyporakuéra espíritu, ojeívo ko tete omanokuaávagui, heẽ, opa yvypóra espíritu, tahaʼe hekoporã térã hekoñañáva, ojeguerahajey upe Tupãme omeʼẽvaʼekue chupekuéra tekove. Ha upérõ ojehúta, umi hekojojavaʼekue espíritu oñemog̃uahẽta peteĩ vyʼa ñeimépe, hérava paraíso, peteĩ pytuʼu ñeimépe, peteĩ ñeime pyʼaguapýpe, opytuʼutahápe hikuái opa ijehasaʼasy ha jepyʼapy, ha vyʼaʼỹgui.

Alma ombo’e espíritu oikove meme omano rire, ha umi hekojojáva oike pytu’u reko héravape paraíso.

Doctrina ha Konveniokuéra 137:7–9

Ñandejára, peteĩ visiõme José Smith-pe

Upérõ, ou chéve Ñandejára ñe’ẽpu, he’ívo: Opavave omanova’ekue oikuaa’ỹre ko evanhélio, omog̃uahẽtavakuri ojehejáramo chupekuéra opyta, ha’éta Tupã reino celestial eredéro; Avei opavave omanóva ko’ág̃a guive oikuaa’ỹre upéva, omog̃uahẽtavakuri opa ikorasõme, ha’éta ko rréino eredéro; Che, Ñandejára, ahusgátagui opa tekovépe hembiapokuére, umi ikorasõ oipotaháicha.

Umi omanova’ekue ohendu’ỹre evanhélio ha ohupytyva’ekuéramo, ndojeheja’ỹi okápe; Tupã ohusga korasõ rembipota rupi.

Doctrina ha Konveniokuéra 138:11

Joseph F. Smith, omombe’úvo ivisiõ omanova’ekuére

Ajepy’amongeta aja ko’ã mba’e ojehaívare, che ñeikũmby ojehesape’ákuri ha Ñandejára Espíritu opytu’u che ári, ha ahecha umi omanova’ekue aty, michĩ ha tuicháva.

Presidente Joseph F. Smith visiõ espiritukuéra múndo rehegua 1918-pe oñepyrũ ojepy’amongeta aja Kuatiañe’ẽ Marangatúre.

Doctrina ha Konveniokuéra 138:30

Joseph F. Smith, omombe’úvo ivisiõ omanova’ekuére

Ha katu péina ápe, ha’e omohenda imbaretekuéra ha ohenói maranduharakuéra umi hekojojáva apytépe, oñemondévo pu’aka ha autorida reheve, ha okomisiona chupekuéra oho ha ogueraha hag̃ua evanhélio resape umi oĩvape pytũmbýpe, jepeve opa yvypóra espíritu-pe; ha péicha oñehekombo’eva’ekue evanhélio umi omanova’ekuépe.

Salvador omohenda espíritu hekojojávape ogueraha hag̃ua evanhélio opa omanova’ekuépe.

Doctrina ha Konveniokuéra 138:32–34

Joseph F. Smith, omombe’úvo ivisiõ omanova’ekuére

Péicha oñembo’eva’ekue evanhélio umi iñangaipápe omanova’ekuépe, oikuaa’ỹre añeteguáva, térã jejapyharápe ombotove haguére profetakuérape. Ko’ãvape oñembo’eva’ekue Tupãre jerovia, angaipágui ñearrepenti, ñemongarai vikário angaipakuéra rremisiõrã, ha Espíritu Santo don po ñemoĩ rupive, Ha opa ambue evanhélio prinsípio ha’ekuéra tekotevẽva oikuaa, ikatu hag̃ua ojekalifika ojehusga hag̃ua hikuái hetépe tekovekuéraicha, ha katu oikove espíritupe Tupãicha.

Espiritukuéra múndope oñembo’e evanhélio opaite, ñemongarai vikário avei.

Doctrina ha Konveniokuéra 138:53–54

Joseph F. Smith, omombe’úvo ivisiõ omanova’ekuére

Proféta José Smith ha che ru Hyrum Smith, Brigham Young, John Taylor, Wilford Woodruff ha ambue espíritu poravopyre, oñeñongatuva’ekue osẽ hag̃ua ára oñekumplipaitetahápe, opartisipa hag̃ua upe tembiapo guasu ára pahapegua pyendakuéra ñemoĩme, Oĩháme jepe umi témplo ñemopu’ã, ha umi ordenánsa omanova’ekue rredensiõrã ipype ojejapóva, oĩva’ekue avei espiritukuéra múndope.

Espíritu iporãitéva oñeñongatu omoĩ hag̃ua ára pahapegua tembiapo pyenda, témplo ha ordenánsa omanova’ekuépe g̃uarã avei.

Doctrina ha Konveniokuéra 138:57–59

Joseph F. Smith, omombe’úvo ivisiõ omanova’ekuére

Ahechákuri élder-kuéra ijeroviarekóva ko dispensasiõmegua, osẽvo hikuái tekove yvy ariguágui, ojapo meme hembiapokuéra ombo’évo evanhélio arrepentimiénto ha rredensiõ rehegua, Tupã Ra’y Unihénito temikuave’ẽ rupi, umi oĩva pytũmby ha angaipa ñeñapytĩmby poguy apytépe, pe omanova’ekue espíritu-kuéra múndo guasúpe. Umi omanóva oñearrepentíva oñerredimíta, iñe’ẽrendu rupi Tupã rogapegua ordenansakuérare. Ha ohasa rire hikuái jehavira ijejapyharakuérare, ha ojejohéi ha oñemopotĩ, ohupytýta peteĩ jopói hembiapokuéicha, ha’égui hikuái salvasiõ eredéro.

Umi ijeroviarekóva ombo’e meme omano rire, ha omanova’ekue oñearrepentíva oñerredimi témplo ordenánsa rupive.

Ha opavave espíritu oĩva ka’irãime osẽ, ha oñembo’y Tupã akatúape; ha ambuekuéra opyta umi pytũmby itasãme upe ára guasu huísio peve.

Enoc visiõme, espíritu ñeñapytĩmbýpe oĩva osẽ Tupã akatúa gotyo Salvador rembiapo rupi.

Doctrina ha Konveniokuéra 124:29–30

Ñandejára, José Smith rupive

Ndaipórigui yvy ári peteĩ píla ñemongarairã, ha’ekuéra, che santokuéra, ikatuhápe oñemongarai umi omanóvare— Ko ordenánsa ha’égui che rogapegua, ha ndaikatúi aguerohory, ndaha’éirõ pene mboriahu árape, ndaikatúi jave pemopu’ã peteĩ óga chéve g̃uarã.

Ñandejára he’i omanova’ekue ñemongarai oĩva’erãha Itémplope.

Doctrina ha Konveniokuéra 128:5

José Smith, peteĩ kártape Santokuérape g̃uarã

Oiméne peimo’ã ko’ã mba’e hesete oñemohendaha; ha katu pehejami ta’e peẽme upéicha ojejapoha, oñembohovái hag̃ua Tupã rembipota, jasegívo pe ordenánsa ha ñembosako’i Ñandejára oordena ha omoĩva’ekue pe múndo ojejapo mboyve, omanóva ojesalva hag̃ua, umi omanova’ekue evanhélio jeikuaa’ỹre.

Salvasiõ umi omanova’ekue evanhélio’ỹre g̃uarã oñemohenda múndo ojejapo mboyve.

Doctrina ha Konveniokuéra 128:15

José Smith, peteĩ kártape Santokuérape g̃uarã

Ha ko’ág̃a, che joyke’ykuéra pejehayhuetéva, peheja ta’emi peẽme ko’ãva ha’eha umi prinsípio omanóva ha oikovéva rehegua noñembohasareíriva’erã, ñane salvasiõ reheguávape. Isalvasiõkuéra tekotevẽgui ha imba’eguasúgui ñane salvasiõrã, Pablo he’iháicha tuvakuérare—ha’ekuéra ndaikatuiha oñemoĩporãmba ñande rehe’ỹ—ni ñande ndaikatúi ñañemoĩporãmba umi omanóva ñanemba’éva ỹre.

Ñane salvasiõ ha ñande ypykuéra salvasiõ ojoaju; ni peteĩ noñemoĩporãmbái ambue’ỹre.

Doctrina ha Konveniokuéra 132:46

Ñandejára, José Smith rupive

Ha añetehápe, añetehápe, Che ha’e ndéve, umi reselláva yvy ári ojeselláta yvágape; ha reñapytĩva yvy ári, che rérape ha che ñe’ẽ rupive, he’i Ñandejára; oñeñapytĩta tapiaite g̃uarã umi yvágape; ha oimeraẽ tekove angaipa reñyrõva yvy ári, oñeñyrõta tapiaite g̃uarã umi yvagápe; ha oimeraẽ tekove angaipa rejokóva yvy ári, ojejokóta yvágape.

Ñandejára omoañete oñesellava’ekue yvy ári Iautorida rupive oñesellaha opa ára g̃uarã yvágape.

Doctrina ha Konveniokuéra 127:6–7

Ñandejára, peteĩ kárta José Smith ohaiva’ekuépe

Añetehápe péicha he’i peẽme Ñandejára umi omanóva pene mba’éva rehe: Oimeraẽ peẽ peñemongaraívo pene omanova’ekuére, toĩ upépe peteĩ haihára ha’e hag̃ua testígo ohecháva pene ñemongarai; ha tohendu ijapysa rehe, otestifika hag̃ua añeteguágui, he’i Ñandejára; Opa mba’e pehaíva, ojehai hag̃ua yvágape; umi peñapytĩva yvy ári, oñeñapytĩ hag̃ua yvágape; umi pejoráva yvy ári, ojejora hag̃ua yvágape;

Ñemongarai ambue rérape oguerekova’erã testígo ha ojehaiva’erã ikatu hag̃uáicha ojehai avei yvágape.

Doctrina ha Konveniokuéra 128:8

José Smith, peteĩ kártape Santokuérape g̃uarã

Ko’ág̃a, ko ordenánsa reko ha’e upe sacerdocio pu’aka, Jesucristo rrevelasiõ rupive, oñeme’ẽha rupi, umi peñapytĩva yvy ári toñeñapytĩ yvágape, ha umi pejoráva yvy ári tojejora yvágape. Ambue ñe’ẽme, ñama’ẽ ambuéicharõ upe ñembohasáre, umi pehaíva yvy ári ojehaíta yvágape, ha umi ndapehaíriva yvy ári, ndojehaimo’ãi yvágape; umi kuatiañe’ẽre ojehusgátagui umi omanóva pene mba’éva, hembiapokuére, taha’e ha’ekueraite ojapóvaramo ijehegui umi ordenánsa, térã iñahentekuéra rupive, upe ordenánsa Tupã ombosako’iva’ekuépe isalvasiõrãme oĩháicha, múndo ojejapo mboyve, umi jehaipyre ogueraha háicha hikuái umi omanóva imba’évagui.

Ordenánsa ojehaíva yvy ári sacerdocio autorida rupive ojehai yvágape, ojehupytýramo tapicha voi térã ambue rérape.

Doctrina ha Konveniokuéra 128:9

José Smith, peteĩ kártape Santokuérape g̃uarã

Oĩne ha’etévape ipy’aguasuha ko doctrina ñañe’ẽvarehína—peteĩ pu’aka ohaíva térã oñapytĩva ko yvy ári ha avei yvágape. Upevére, opa múndo árape, Ñandejára ome’ẽ vove peteĩ sacerdocio dispensasiõ peteĩ tekovépe térã tekovekuéra atýpe, rrevelasiõ añete rupive, akóinte oñeme’ẽva ko pu’aka. Upéicha, opa mba’e umi kuimba’e ojapova’ekue autorida reheve, Ñandejára rérape, ha ojapo hikuái añetépe ha jeroviarekópe, ha ogueraha hikuái peteĩ jehaipyre umívagui, oĩporãva ha ijeroviapýva, kóva ha’ékuri peteĩ léi yvýpe ha yvágape, ha, upe Jehová guasu apoukapykuérape he’iháicha, ndaikatúikuri oñembopaharei. Ko ñe’ẽ añetegua. Mávapa ikatu ohendu?

Pu’aka oñapytĩ hag̃ua yvy ári ha yvágape oñeme’ẽ opa dispensasiõme, ha jehaipyre ijeroviapýva ojapo tembiapo oñapytĩha.

Ha ojehu che ru, Lehi, ojuhu avei umi pláncha bronce-guigua ári ituvakuéra genealogía; upévare haʼe oikuaa José ñemoñareha; heẽ, pe José haʼevaʼekue Jacob raʼy oñevendevaʼekue Egipto-pe, ha oñeñongatuvaʼekue Ñandejára po rupive, oñongatu hag̃ua itúva, Jacob-pe, ha mayma hogaguakuérape ani hag̃ua omano ñembyahýigui.

Lehi ojuhu ijypykuéra jehaipyre bronce planchakuérape ha oikuaa ou hague José Egipto-pegua ñemoñaregui.

Péina ápe, che raʼykuéra, che aipota penemanduʼa peneñeʼẽrendu hag̃ua Tupã rembiapoukapykuérare; ha che aipota peje koʼã ñeʼẽ tavayguakuérape. Péina ápe, che ameʼẽkuri peẽme ñande rukuéra peteĩha osẽvaʼekue Jerusalén retãgui réra; ha ajapókuri upéva penemanduʼávo pende rérare penemanduʼa hag̃ua hesekuéra; ha penemanduʼávo hesekuéra penemanduʼa hag̃ua hembiapokuérare; ha penemanduʼávo hembiapokuérare peikuaa hag̃ua mbaʼérepa ojeʼe, ha avei ojehai, hekojojahague hikuái.

Helamán ombohéra ita’yrakuérape ypykuéra hekojojáva rérape, imandu’ávo hérare imandu’a hag̃ua ypykuéra iporãhaguére.

Ko’ág̃a, ko profesía Adán oñe’ẽva’ekue oñeispirávo Espíritu Santo-re, ha oñeñongatu jepi peteĩ Tupã ra’ykuéra genealogía. Ha kóva ha’ékuri Adán ñemoñareaty kuatiañe’ẽ, he’iva’ekue: Ára Tupã ojaporamoguare yvypóra, Tupã ra’angáicha ojapova’ekue;

Adán ára guive ojeñongatu Tupã ra’yrakuéra ypykuéra jehaipyre, familia jehaipyre peteĩha ojeikuaáva.

Ha katu tuvakuéra kuatiajehaipyre, jepeve umi patriarca, sacerdocio derécho reheguáva, Ñandejára che Tupã oñongatúkuri che poitépe; upévare, che añongatúkuri ko ára peve peteĩ apopyre ñepyrũmby kuaapy ha avei umi planéta ha mbyjakuéra, umíva ojekuaauka haguéicha tuvakuérape, ha añeha’ãta ahai ko’ã mba’e ko jehaipyre ári, che ñemoñare mba’eporãrã oútava che rire.

Abraham oñongatu ituvakuéra jehaipyre ha ohai iñemoñare rehehápe.

Doctrina ha Konveniokuéra 128:18

José Smith, peteĩ kártape Santokuérape g̃uarã

Ikatúkuri ame’ẽ peteĩ ñembohasa hesakãvéva kóvagui, ha katu che aipotávape g̃uarã hesakã porãma oĩhaichaite. Iporãnte ojeikuaa, ko kásope, pe yvy ojejopytaha peteĩ ñe’ẽngái reheve, ndaipóriramo umi túva ha ta’ýra apytépe peteĩ mbojoajuha oimeháichagua, taha’e peteĩ térã ambue mba’e rehegua—ha péina ápe, mba’épa upe mba’e? Ha’e umi omanóvare ñemongarai. Hesekuéra’ỹ ñande ndaikatúi ñañemoĩporãmba, ni ndaikatúi oñemoĩporãmba hikuái ñande rehe’ỹ. Ni ndaikatúi ñande ni ha’ekuéra ñañemoĩporãmba umi omanova’ekue’ỹre evanhéliope; oñepyrũvo upe dispensasiõ ára oñekumplipaitetaha, dispensasiõ oñepyrũmava, tekotevẽ ojejapo ha ojeikuaauka peteĩ ñembojoajupa oĩmbaitéva ha oĩporãmbáva, ha péicha avei umi dispensasiõ, lláve, pokatu ha glória ñembojoaju, Adán ára guive, ára ko’ag̃agua peve. Ha ndaha’éi kóvante, ha katu umi mba’e araka’eve ojeikuaauka’ỹva’ekue, pe yvy ojejapo ypy guive, ha katu oñeñomiva’ekue umi iñarandu ha iñakãguapývagui, ojeikuaaukáta mitãra’y ha mitã okambúvape, kóva, ko dispensasiõ ára oñekumplipaitetahápe.

Tembiapo omanova’ekuépe g̃uarã ha’e pe joaju mbarete ombojoajúva generasiõnguéra peteĩ ñembojoaju hekoporãitévape.

Doctrina ha Konveniokuéra 128:22

José Smith, peteĩ kártape Santokuérape g̃uarã

Joyke’ykuéra, ndajahaiva’erãpa tenonde ko káusa guasuetépe? Peñemotenonde, pejevyrangue. Py’aguasu, hermano-kuéra; ha tapeho tenonde, tapeho ñesẽtenondépe! Tahory pene korasõ ha tapenerenyehẽ vy’águi. Tahyapu purahéipe upe yvy. Tohupi umi omanóva ñemomorã purahéi ijapyra’ỹva Rréi Emanuel-pe, oordenava’ekue, múndo oiko mboyve, upe mba’e ohejátava ñandéve ñarredimi chupekuéra iprisiõgui; umi oñeñapytĩva oñemosãsótagui.

José Smith ohenói vy’ápe jaha hag̃ua tenonde gotyo omanova’ekue rredensiõme, ñeñapytĩmbýpe oĩva osẽtagui sãsópe.

Doctrina ha Konveniokuéra 128:24

José Smith, peteĩ kártape Santokuérape g̃uarã

Péina ápe, hi’ag̃uíma Ñandejára ára guasu; ha mávapa ogueropu’akáta ijeju ára, ha mávapa opytáta ñembo’yhápe ha’e ojehechauka vove? Ha’égui tata oporomopotĩvaicha ha havõ jejoheirãicha; ha oguapýta pláta ñemoporã ha ñemopotĩháicha; omopotĩtagui Leví ra’ykuérape, omopotĩta chupekuéra óro ha plátaicha, oikuave’ẽ hag̃ua Ñandejárape peteĩ ñeme’ẽmby tekojojápe. Ñaikuave’ẽ upévare Ñandejárape, tupao ha tavayguakuéra ramo, ha Santokuéra Ára Pahapegua ramo, peteĩ ñeme’ẽmby tekojojápe; ha jagueraha isánto témplope, oĩmba vove, peteĩ kuatiañe’ẽ oguerekóva umi omanóva ñanemba’éva jehaipyre, upe hekomarangatúva opa jeguerohoryrã.

Santokuéra oñehenói ome’ẽ hag̃ua témplope peteĩ kuatiañe’ẽ hekoporãva oguerekóva omanova’ekue ijehaipyre.